މިފްކޯގެ ގިނަ ޚިދުމަތްތަކެއް ޑިޖިޓަލައިޒްކޮށްފި

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ފޯރުކޮށްދޭ ގިނަ ޚިދުމަތްތަކެއް އެއް ފުރާޅެއްގެ ދަށުން ފަސޭހަކަމާއެކު ލިބޭނެ އިންތިޒާމު ހަމަޖެއްސުމުގެ ގޮތުން، އެ ކުންފުނީގެ އައު އޮންލައިން ޕޯޓަލް ރަސްމީކޮށް ތަޢާރަފުކޮށްފިއެވެ.

މި ޕޯޓަލް އިފްތިތާޙުކޮށްފައިވަނީ މިފްކޯގެ 33 ވަނަ އަހަރީ ދުވަސް ފާހަގަކުރުމުގެ ގޮތުން ބޭއްވި ރަސްމީ ޙަފްލާގައެވެ. މި އޮންލައިން ޕޯޓަލަކީ މިފްކޯގެ ވިޔަފާރި ބައިވެރިންނާއި، ވަޒީފާއަށް އެދޭ ފަރާތްތަކުގެ އިތުރުން ސަޕްލަޔަރުންނަށް ޚާއްޞަކޮށްގެން ފަރުމާކޮށްފައިވާ މަރުކަޒީ ޑިޖިޓަލް ޕްލެޓްފޯމެކެވެ.

އަލަށް ތަޢާރަފުކުރި މި ޕޯޓަލް މެދުވެރިކޮށް ލިބިގެންދާ މުހިންމު ޚިދުމަތްތަކުގެ ތެރޭގައި:

• މަސްފިހާރަ ޕާޓްނަރުންގެ ގޮތުގައި ރަޖިސްޓްރީވުން
• މިފްކޯގެ ވަޒީފާތަކަށް ކުރިމަތިލުމާއި، ކެރިއަރ ފުރުޞަތުތައް ބަލައިލުން
• ޕްރޮކިއުމަންޓާއި ޓެންޑަރުތަކަށް ޚާއްޞަ ވެންޑަރުންނާއި ސަޕްލަޔަރުން ރަޖިސްޓްރީވުން
  

މިފްކޯއިން މަޢުލޫމާތު ދޭ ގޮތުގައި، މިއީ އެ ކުންފުނީގެ ޚިދުމަތްތައް ޒަމާނީކޮށް، ކަސްޓަމަރުންނާއި ވިޔަފާރިވެރިންނަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން އެޅުނު މުހިންމު ފިޔަވަޅެކެވެ. އަދި މި ޕޯޓަލްގެ އިތުރުން، ކުންފުނީގެ އެތެރޭގެ ހިންގުމާއި ކަސްޓަމަރުންނަށް އަމާޒުކޮށްގެން އިތުރު ޑިޖިޓަލް ޚިދުމަތްތައް ތަރައްޤީކުރުމުގެ މަސައްކަތް މިހާރުވެސް ދަނީ ކުރެވެމުންނެވެ.

މިފްކޯއިން އަބަދުވެސް މަސައްކަތް ކުރަމުންދަނީ އައު އީޖާދުތަކާއެކު ޓެކްނޮލޮޖީގެ ރޮނގުން ކުރިއެރުންތައް ހޯދައި، ޚިދުމަތްތަކުގެ ފެންވަރު އެންމެ މަތީ ދަރަޖައިގައި ދެމެހެއްޓުމަށް ކަމަށް އެ ކުންފުނިން ހާމަކުރެއެވެ.