ޚަބަރު
މީޑިއާތަކާ ގުޅޭ ޝަކުވާތައް އޮންލައިންކޮށް ހުށައެޅޭނެ އިންތިޒާމް ހަމަޖައްސައިފި

މޯލްޑިވްސް މީޑިއާ ކައުންސިލްގެ އޮފީސް
ރާއްޖޭގެ މީޑިއާ ތަކާ ގުޅޭ ޝަކުވާތައް އޮންލައިންކޮށް ހުށައެޅޭނެ އިންތިޒާމް މޯލްޑިވްސް މީޑިއާ ކައުންސިލް (އެމްއެމްސީ) އިން ހަމަޖައްސައިފިއެވެ.
އެމްއެމްސީ އިން ކޮށްފައިވާ ޕޯސްޓެއްގައި ބުނެފައިވަނީ މީޑިއާތަކާ ގުޅޭ ޝަކުވާތައް އޮންލައިން ކޮށް ހުށައެޅޭނެ އިންތިޒާމް ހަމަޖައްސާފައިވަނީ ވަން ގަވް ޕްލެޓްފޯމް މެދުވެރިކޮށް ކަމަށެވެ.
މީޑިއާތަކާ ގުޅޭ ޝަކުވާތައް އޮންލައިންކޮށް ހުށައެޅޭނެ އިންތިޒާމް ހަމަޖެހިގެން ދިޔުމުން ރާއްޖޭގެ މީޑިއާތަކާ ގުޅޭ ޝަކުވާތައް ހުށައަޅަން ފަސޭހަ ވެގެންދާނެއެވެ.
މީޑިއާތަކާ ގުޅޭ ޝަކުވާތައް އެންމެ ގިނައިން ހުށައަޅަނީ ދައުލަތުގެ ފަރާތުން ކަމަށް އެމްއެމްސީ އިން ވަނީ ބުނެފައެވެ. އެއީ ދައުލަތުގެ އެކި މުއައްސަސާތަކާ ގުޅޭގޮތުން ދޮގު ޚަބަރު ފެތުރުމާއި ބެހޭ މައްސަލަތަކެވެ.
އެމްއެމްސީ އަކީ ދިވެހިރާއްޖޭގެ މީޑިއާތަކުގެ މިނިވަންކަން ކަށަވަރުކޮށް، ޒިންމާދާރު ނޫސްވެރިކަމެއް ކުރިއެރުވުމަށް މަސައްކަތްކުރާ މިނިވަން މުއައްސަސާއެކެވެ. އެމުއައްސަސާ އުފައްދައިފައިވަނީ 2010 ވަނަ އަހަރުއެވެ.