ކާޑު އެތެރެކުރުމުގެ ކޯޓާ އެހެން ފަރާތަކަށް ދީފައި ނުވާކަމަށް އެސްޓީއޯއިން ބުނެފި

ރާއްޖެއަށް އިންޑިއާއިން އެތެރެކުރާ ކާޑުގެ ބާވަތްތަކަށް އެސްޓީއޯއަށް ދޫކޮށްފައިވާ ކޯޓާގެ ރައިޓްސް އެއްވެސް ބަޔަކަށް ދީފައިނުވާނެ ކަމަށް އެސްޓީއޯއިން މިއަދު ބުނެފިއެވެ.  މިކަން ހާމަކުރެއްވީ އެސްޓީއޯގެ މީޑިއާ އޮފިޝަލް ޔޫސުފް ޝާހު  އިންޑިއާއިން ރާއްޖެއަށް އެތެރެކުރަން އުޅުނު ހަކުރު ކޮންޓެއިނަރުތަކަކާ ގުޅިގެން ދެކެވޭ ވާހަކަތަކުގެ ޙަޤީޤަތް މީޑިއާއަށް ސާފުކޮށްދެއްވަމުންނެވެ.

ޝާހު ވިދާޅުވީ އެ މައްސަލައާއި އެސްޓީއޯއާއި އެއްވެސް ގުޅުމެއް ނެތް ކަމަށެވެ. އަދި އެސްޓީއޯގެ އެއްވެސް ޝިޕްމަންޓެއް ގެއްލިފައި ނުވާކަމަށާއި، އެސްޓީއޯ އިން އޯޑަރު ޖަހާފައިވާ އެއްވެސް ޝިޕްމަންޓެއް ނުލިބި ނުވާ ކަމަށް ވެސް އޭނާ ވިދާޅުވިއެވެ.

"މި މައްސަލައާ އެސްޓީއޯއާ ނުވަތަ ރާއްޖެއާ އެއްވެސް ބައިވެރިވުމެއް ނުވަތަ ގުޅުމެއް ވެސް ނެތް،" ޝާހު ވިދާޅުވިއެވެ.

އިންޑިއާއިން  ރާއްޖެއަށް ހަކުރު އެކްސްޕޯޓް ކުރުން މެދުކަނޑާލާފައިވާކަމަށް ދެކެވޭ ވާހަކައަކީ ޙަޤީޤަތެއް ނޫންކަމަށް ވެސް ޝާހު ވިދާޅުވިއެވެ.

އިންޑިއާއިން ރާއްޖެއަށް އެކްސްޕޯޓްކުރި ހަކުރު ކޮންޓެއިނަރުތަކެއް އޮޅުވާލައިގެން ސްރީލަންކާއަށް އެތެރެކޮށްފައިވާކަމަށް އިންޑިއާގެ ނޫސްތަކުގައި ރިޕޯޓްކޮށްފައިވާއިރު މިމައްސަލަ އިންޑިއާގެ ފޮރިން ޓްރޭޑާ ބެހޭ އިދާރާއިން ތަހުޤީޤުކުރަން ވަނީ ފަށާފައެވެ.

އިންޑިއާއަކީ ރާއްޖެއަށް ގިނަ އަދަދަކަށް ކާޑުގެ ބާވަތް އެތެރެކުރާ އެއް ޤައުމެވެ. އަދި އެސްޓީއޯއަކީ ރާއްޖެއަށް ކާޑުގެ ބާވަތްތައް ގެނައުމަށް ސަރުކާރުން ހަވާލުކޮށްފައިވާ ސަރުކާރު ކުންފުންޏެވެ.