ވަޒީރު ޝިޔާމް، ޗައިނާގެ ޔާޒޫ ބޭ ސައިންސް އެންޑް ޓެކްނޮލޮޖީ ސިޓީއަށް ޒިޔާރަތްކުރައްވައިފި

މަސްވެރިކަމާއި ދަނޑުވެރިކަމާއި ކަނޑުގެ ވަސިލަތްތަކާއި ބެހޭ ވަޒީރު އަޙްމަދު ޝިޔާމް، ޗައިނާގެ ސާންޔާގައި ހުންނަ ޔާޒޫ ބޭ ސައިންސް އެންޑް ޓެކްނޮލޮޖީ ސިޓީ އިންޑަސްޓްރީ ޕްރޮމޯޝަން ސެންޓަރަށް ޒިޔާރަތްކުރައްވައިފިއެވެ.

މި ޒިޔާރަތަކީ، 7 ވަނަ ސިމްޕޯޒިއަމް އޮން ގްލޯބަލް މެރިޓައިމް ކޯޕަރޭޝަން އެންޑް އޯޝަން ގަވަރނަންސް އިންތިޒާމުކުރި ފަރާތްތަކުގެ ޚާއްޞަ ދައުވަތަކަށް ޗައިނާގެ ހައިނާންއަށް މިނިސްޓަރު ކުރައްވަމުންދާ ރަސްމީ ދަތުރުފުޅުގެ ތެރެއިން ކުރެއްވި މުހިންމު ޒިޔާރަތެކެވެ.

މި ޒިޔާރަތުގެ މައިގަނޑު މަޤްސަދަކީ ދެމެހެއްޓެނިވި ގޮތެއްގައި ބްލޫ އެކޮނޮމީ ކުރިއަރުވައި ވަރުގަދަ ކުރުމަށް ރާއްޖެ އިން ކުރަމުންދާ މަސައްކަތްތަކަށް ބޭނުންވާ ފަންނީ އެހީތެރިކަމާއި، ޒަމާނީ ވަސީލަތްތައް ދެނެގަތުމެވެ. މިގޮތުން، މަސްވެރިކަމުގެ ދާއިރާއާއި، އެކުއާކަލްޗަރ ނުވަތަ ކަނޑުމަސް އާލާކުރުން އަދި މެރިން ސައިންސްގެ ދާއިރާއިން ޗައިނާއިން ހޯދާފައިވާ ބޮޑެތި ކުރިއެރުންތަކާއި، ސައިންސާއި ޓެކްނޮލޮޖީގެ އީޖާދުތައް މިނިސްޓަރުގެ ވަފުދުން ވަނީ އަމަލީ ގޮތުން ބައްލަވާލައްވާފައެވެ.

ޔާޒޫ ބޭ ސައިންސް އެންޑް ޓެކްނޮލޮޖީ ސިޓީއަކީ ކަނޑުގެ ދިރާސާތަކާއި، އެކުއާކަލްޗަރގެ އައު ނަމޫނާތައް ތަރައްޤީ ކުރުމުގައި ބައިނަލްއަޤުވާމީ ގޮތުން ފާހަގަކޮށްލެވޭ މަރުކަޒެކެވެ. މި މަރުކަޒަށް ކުރެއްވި ޒިޔާރަތުގައި ދެ ޤައުމުގެ ދެމެދުގައި މަސްވެރިކަމާއި ކަނޑުގެ ވަސީލަތްތައް ތަރައްޤީ ކުރުމުގެ ދާއިރާއިން ގުޅިގެން މަސައްކަތް ކުރެވިދާނެ ދާއިރާތަކާ މެދު ފުޅާދާއިރާއެއްގައި ވަނީ މަޝްވަރާކުރައްވާފައެވެ.

Minister @Shiyamaldives and his delegation visited the Yazhou Bay Science and Technology City Industry Promotion Center in Sanya, China, as part of his official visit to Hainan, undertaken at the invitation of the organisers of the 7th Symposium on Global Maritime Cooperation and Ocean Governance. The visit provided an opportunity to explore technological innovations, research advancements and potential areas of cooperation in fisheries, aquaculture and marine science, supporting the Maldives’ efforts to advance a sustainable blue economy.

— Min of Fisheries, Agriculture and Ocean Resources (@MFAORmv) November 5, 2026

ވަޒީރު ޝިޔާމް ޗައިނާގެ ސާންޔާގައި ހުންނަ ޔާޒޫ ބޭ ސައިންސް އެންޑް ޓެކްނޮލޮޖީ ސިޓީ އިންޑަސްޓްރީ ޕްރޮމޯޝަން ސެންޓަރަށް ކުރެއްވި މި ޒިޔާރަތުގައި އެމަނިކުފާނުގެ އަރިހުގައި ދިވެހި ވަފުދުންވެސް ބައިވެރިވެ ވަޑައިގެންނެވިއެވެ.

މި ދަތުރުފުޅުގެ ސަބަބުން ރާއްޖޭގެ ކަނޑުގެ ވަސީލަތްތަކުން އުފެއްދުންތެރިކަން އިތުރުކޮށް، ތިމާވެށްޓާއި ރައްޓެހި ގޮތްތަކަށް މަސްވެރިކަމާއި އެކުއާކަލްޗަރ ކުރިއެރުވުމަށް ބޭނުންވާ ފަންނީ އިލްމާއި ތަޖުރިބާ ހޯދުމަށް މަގުފަހިވެގެންދާނެއެވެ.