ޚަބަރު
އަންނަ ހަފްތާގެ ބުރާސްފަތި ދުވަހަކީ ރަސްމީ ބަންދު ދުވަހެއް
ރައީސް އޮފީސް - ފޮޓޯ: ރައީސް އޮފީސް
މި ހިނގާ ނޮވެންބަރު މަހުގެ 12 ވާ ބުރާސްފަތި ދުވަހަކީ، ރަސްމީކޮށް ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މިއަދު ހަމަޖައްސަވައިފިއެވެ.
ރައީސް މި ގޮތަށް ނިންމެވީ، ދިވެހިރާއްޖޭގެ ޖުމްހޫރީ ދުވަހުގެ މުނާސަބަތުގައި ބަންދުވާ ނޮވެންބަރު މަހުގެ 11 ވާ ބުދަ ދުވަހާ ގުޅިގެން، ހަފުތާ ބަންދުގެ ދުވަސްތަކާއެކު ސަރުކާރުގެ މުވައްޒަފުންނަށް މެދުކެނޑުމެއްނެތި ޗުއްޓީ ހޭދަކުރުމުގެ ފުރުޞަތު ފަހިކޮށްދެއްވުމުގެ މަޤްޞަދުގައެވެ.
ޖުމްހޫރީ ދުވަހަކީ ކަލަންޑަރުގައި ގައުމީ ބަންދު ދުވަހެއްގެ ގޮތުގައި ކަނޑައެޅިފައިވާ ދުވަހަކަށް ވެފައި، ޖެހިގެން އަންނަ ބުރާސްފަތި ދުވަހަކީ ރަސްމީ މަސައްކަތު ދުވަހަކަށް ވާތީ، މުވައްޒަފުންނަށް ޗުއްޓީގެ ފައިދާ އެންމެ ފުރިހަމައަށް ލިބިދިނުމަށްޓަކައި އެ ދުވަސް ބަންދުކޮށްދެއްވުމަށް ސަރުކާރުން ނިންމެވީއެވެ.
މި ނިންމެވުމާއެކު، ޖުމްހޫރީ ދުވަހުގެ ބަންދަށްފަހު، ހަފުތާ ބަންދުގެ ދުވަސްތައް ކަމުގައިވާ ހުކުރާއި ހޮނިހިރު ހިމެނޭހެން، ސަރުކާރުގެ މުވައްޒަފުންނަށް ވިދިވިދިގެން ހަތަރު ދުވަހުގެ ޗުއްޓީއެއް ލިބިގެންދާނެއެވެ. ސަރުކާރުގެ ރަސްމީ މަސައްކަތްތައް ދެން އަލުން ފެށޭނީ އަންނަ އާދީއްތަ ދުވަހުއެވެ.
Ads by MSS
