ދުނިޔެ
އޮސްޓްރޭލިއާގައި 10 އަހަރުގެ ކުޑަކުދިންނަށް ބޮޑެތި މީހުންނާއި އެއްފަދަ އަދަބު ދިނުމަށް ޤާނޫނު ފާސްކޮށްފި

އަދަބު ދިނުމަސް ބޭނުންކުރާ ޖަލެއް ފޮޓޯ:އިންޓަނެޓް
އޮސްޓްރޭލިއާގެ ކުއީންސްލޭންޑް ސްޓޭޓުން 10 އަހަރުގެ ކުޑަކުދިންނަށް ބޮޑެތި މީހުންނާއި އެއްފަދަ އަދަބު ދިނުމަށް ޤާނޫނު ފާސްކޮށްފިއެވެ. މި ޤާނޫނުގެ ދަށުން މީހުން މެރުމާއި، ބޮޑެތި އަނިޔާގެ މައްސަލަތަކާއި، ވައްކަމުގެ މައްސަލަތަކުގައި ކުޑަކުދިންނަށްވެސް ބޮޑެތި މީހުންނާއި އެއްފަދަ އަދަބު ދެވޭނެއެވެ.
ސަރުކާރުން ބުނާ ގޮތުގައި މި ޤާނޫނު ފާސްކުރީ "ޒުވާނުން ކުށްކުރާ މިންވަރާމެދު މުޖުތަމަޢުގެ ކަންބޮޑުވުން" އޮތުމާއި ގުޅިގެންނެވެ. އަދި މި ޤާނޫނަކީ ކުށްކުރުން ހުއްޓުވުމަށް މަގުފަހިވާނެ ކަމެއް ކަމަށް ސަރުކާރުން ދެކެއެވެ.
ނަމަވެސް، ގިނަ މާހިރުން ދައްކާ ވާހަކައަކީ ހަރުކަށި އަދަބުތަކުން ޒުވާނުންގެ ކުށްކުރުން މަދެއް ނުވާނެ ކަމަށެވެ. އަދި މިފަދަ އަދަބުތަކުން ކުށްކުރުން އިތުރުވެދާނެ ކަމަށްވެސް އެ ފަރާތްތަކުން ބުނެއެވެ.
އދ. އިންވެސް މި އިސްލާހުތަކާމެދު ފާޑުކިޔާފައިވެއެވެ. އދ. އިން ބުނާ ގޮތުގައި މި އިސްލާހުތަކަކީ ކުޑަކުދިންގެ ހައްޤުތަކާ ބެހޭ މުޢާހަދާތަކާ ޚިލާފު، އަދި ބައިނަލްއަޤްވާމީ ޤާނޫނާ ޚިލާފު އިސްލާހުތަކެކެވެ.
މި ޤާނޫނު ފާސްކުރުމާއެކު، ކުއީންސްލޭންޑްގެ ބަންދުގައި ތިބޭ ކުޑަކުދިންގެ އަދަދު އިތުރަށް އިތުރުވާނެ ކަމަށް ލަފާކުރެވެއެވެ. މިހާރުވެސް އޮސްޓްރޭލިއާގެ އެހެން އެއްވެސް ސްޓޭޓަކަށްވުރެ ގިނަ ކުޑަކުދިން ބަންދުގައި ތިބެނީ ކުއީންސްލޭންޑްގައެވެ.
އޮސްޓްރޭލިއާގެ ކުޑަކުދިންގެ ކޮމިޝަނަރު، އޭން ހޮލަންޑްސް މި ބަދަލުތަކަށް ކިޔާފައިވަނީ "ބައިނަލްއަޤްވާމީ ލަދުވެތިކަމެއް" ކަމަށެވެ. އޭނާ ބުނާ ގޮތުގައި ކުޑަކުއްޖަކު ހަގު އުމުރެއްގައި ޝަރުޢީ ނިޒާމާ ކުރިމަތިލާން ޖެހުނު ވަރަކަށް، އެ ކުއްޖަކު އިތުރު ބޮޑެތި ކުށްތައް ކުރުމުގެ ފުރުސަތު ބޮޑުވާނެއެވެ.
މި ޤާނޫނުގެ ސަބަބުން ކުށުގެ ޝިކާރައަކަށްވާ ފަރާތްތަކަށްވެސް ނޭދެވޭ އަސަރުތަކެއް ކުރާނެ ކަމަށް ޤާނޫނީ މާހިރުން ބުނެއެވެ. އެ ފަރާތްތަކުން ބުނާ ބުނާ ގޮތުގައި މި ޤާނޫނުގެ ސަބަބުން ކުޑަކުދިން ކުށަށް އިޢުތިރާފުވުން މަދުވެ، ޝަރީޢަތްތައް ދިގުލައިގެން ހިނގައިދާނެއެވެ.