އިސްރާއީލުން ޣައްޒާއަށް ދެމުންދާ ޙަމަލާތައް ޝަރުތަކާނުލާ ހުއްޓާލުމަށް އދ އިން ގޮވާލައިފި

ފަލަސްތީނުގެ ޣައްޒާއަށް ޔަހޫދީ އިސްތިޢުމާރީ ފައުޖުން ދެމުންދާ ޙަމަލާތައް އެއްވެސް ޝަރުތަކާ ނުލައި ވަގުތުން ހުއްޓައިލުމަށް ބާރު އަޅައި، އދގެ ޢާންމު މަޖިލީހުން ޤަރާރެއް ފާސްކޮށްފިއެވެ. މި ޤަރާރު ފާސްކުރެވުނީ އދގެ ޢާންމު މަޖިލީހުގެ 153 ޤައުމުގެ ވޯޓާ އެކުގައެވެ.

ޣައްޒާގައި ދިރިއުޅޭ ފަލަސްތީނުގެ މައުސޫމް ދެ މިލިޔަން މީހުންނާ ދެކޮޅަށް ޔަހޫދީ އިސްތިޢުމާރީ ފައުޖުން ހިންގަމުންދާ ލާއިންސާނީ ޖަރީމާތައް ހުއްޓުވުމަށް މީގެ ކުރިން ފާސްކޮށްފައިވާ ދެ ޤަރާރާ ޚިލާފަށް، މި ފަހަރުގެ ޤަރާރުގައި ޔަހޫދީ ދައުލަތަށް ގޮވާލާފައިވާ ގޮވާލުން ވަނީ ކުރީ ފަހަރުތަކަށް ވުރެ ހަރުކަށި އިބާރާތަކުންނެވެ.

އެމެރިކާއާއި އިސްރާއީލާ އެކު އިތުރު ހަތް ޤައުމަކުން މި ޤަރާރާ ދެކޮޅަށް ވޯޓު ދިން އިރު، 13 ޤައުމަކުން ވަކި ކޮޅަކަށް ވޯޓު ދީފައެއް ނުވެއެވެ. އދގެ ޢާންމު މަޖިލީހުގެ ޤަރާރުތަކަށް ޢަމަލުކުރުން ލާޒިމު ނުވި ނަމަވެސް، މި ޤަރާރުން އިސްރާއީލުން ހަނގުރާމައިގެ ނަމުގައި ފަލަސްތީނުގައި ހިންގަމުންދާ ލާއިންސާނީ ޖަރީމާތަކާ މެދު ދުނިޔޭގެ ގިނަ ޤައުމުތައް ދެކޭ ގޮތް ހާމަކޮށްފައިވާތީ، އޭގައި ސިޔާސީ ބުރަދަން ހުންނާނެކަމަށް ބެލެވެއެވެ.

މީގެ އިތުރުން، އދގެ ޢާންމު މަޖިލީހުން ވަނީ އދގެ ރެފިޔުޖީ އޭޖެންސީ (އަންރުވާ)ގެ ދިފާޢުގައި ތެދުވެ، އިތުރު ޤަރާރެއް ފާސްކޮށްފައެވެ. މި ޤަރާރުގައި އަންރުވާގެ ދައުރު ފުރިހަމައަށް އަދާކުރެވޭ ގޮތަށް، އެއްވެސް ހުރަހެއް ނެތި މަސައްކަތް ކުރެވޭނެ މަގު ފަހިކުރުމަށް އިސްރާއީލަށް ގޮވާލާފައިވެއެވެ.

އދގައި ހުންނަވާ އެމެރިކާގެ ސަފީރުގެ ނައިބު ރޮބަޓް ވުޑް ވިދާޅުވީ މި ދެ ޤަރާރުގައި ވެސް ބޮޑެތި މައްސަލަތަކެއް ހުރި ކަމަށެވެ. ނަމަވެސް، ޢާންމު މަޖިލީހުން މިއަދު ފާސްކުރި ޤަރާރުގައި، ހަމާސުން ރަހީނުކޮށްފައިވާ ޔަހޫދީން މިނިވަންކުރަން ވެސް ގޮވާލާފައިވާކަން ފާހަގަކުރެވެއެވެ.