އޯޒޯން މުއާހަދާތައް ތަންފީޒުކުރުމުގައި އެންމެންގެ ބައިވެރިވުން ކަށަވަރުކުރުމަށް ރާއްޖެއިން ގޮވާލައިފި

އޯޒޯން ފަށަލަ ހިމާޔަތްކުރުމާ ގުޅޭ ބައިނަލްއަޤްވާމީ މުއާހަދާތައް ތަންފީޒުކުރުމުގައި، ހުރިހާ ޤައުމުތަކެއްގެ ބައިވެރިވުން ޔަޤީންކޮށް، އެ ޤައުމުތަކުގެ ބޭނުންތަކަށް ރިޢާޔަތްކުރުމުގެ މުހިންމުކަން ރާއްޖެއިން ފާހަގަކޮށްފިއެވެ.

މިކަމަށް ގޮވާލައްވާފައިވަނީ މޮންޓްރިއަލް ޕްރޮޓޮކޯލްގެ ބައިވެރިންގެ 38 ވަނަ ބައްދަލުވުން، އެމް.އޯ.ޕީ 38 ގައި ރާއްޖޭގެ ފަރާތުން ޤައުމީ ބަޔާން އިއްވަވަމުން، މޫސުމީ ބަދަލުތަކާ ތިމާވެއްޓާ ހަކަތައާއި ބެހޭ ވުޒާރާގެ ސްޓޭޓް މިނިސްޓަރ ޢަލީ ފާރިސް ޔޫސުފްއެވެ.

ސްޓޭޓް މިނިސްޓަރ ޢަލީ ފާރިސް ދެއްވި ބަޔާނުގައި، އޯޒޯން މުއާހަދާތައް ކާމިޔާބުކަމާއެކު ތަންފީޒުކުރުމަށްޓަކައި އެންމެހައި ޤައުމުތަކުގެ ބޭނުންތައް ދެނެގަނެ، އެކަންކަމަށް އިޖާބަދެވޭނެ ފަދަ އިންސާފުވެރި ނިޒާމެއް އޮތުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. އަދި މި އަމާޒަށް ވާސިލުވުމަށްޓަކައި މަލްޓިލެޓަރަލް ފަންޑުގެ އެހީތެރިކަން ދެމެހެއްޓެނިވި ގޮތެއްގައި އަދި ފަސޭހަކަމާއެކު ލިބޭނެ މަގު ފަހިވެފައި އޮތުމަކީ ކޮންމެހެން ބޭނުންތެރި ކަމެއްކަން އެމަނިކުފާނު ފާހަގަކުރެއްވިއެވެ.

Delivering the National statement at #MOP38, State Minister His Excellency Ali Faris Yusuf stressed the need to ensure that the implementation of the Ozone Treaties continues to be inclusive and responsive to the needs of all Parties, and emphasized the importance of sustained and accessible financial and technical assistance through the Multilateral Fund, particularly in supporting technology transfer, capacity-building, and the adoption of energy-efficient, low-global-warming-potential alternatives.

— Min. of Climate Change, Environment and Energy, MV (@MoEnvmv) November 6, 2026

މީގެއިތުރުން، ތަރައްޤީވަމުން އަންނަ ޤައުމުތަކަށް ބޭނުންވާ މާލީ އަދި ފަންނީ އެހީތެރިކަން އިތުރުކުރުމަށާއި، އައު ޓެކްނޮލޮޖީތައް ފޯރުކޮށްދިނުމާއި، ޤާބިލުކަން އިތުރުކުރުމަށް އެހީތެރިވުމަށްވެސް އެމަނިކުފާނު ގޮވާލެއްވިއެވެ. ވަކިން ޚާއްޞަކޮށް، ހަކަތަ މަދުން ބޭނުންކުރާ އަދި ދުނިޔެ ހޫނުވުމަށް ބާރުއަޅާ މިންވަރު ކުޑަ (ލޯ ގްލޯބަލް ވާމިންގ ޕޮޓެންޝަލް) ވަސީލަތްތަކަށް ބަދަލުވުމަށް ބާރުއެޅުމުގެ މުހިންމުކަން ރާއްޖޭގެ ބަޔާނުގައި ވަނީ ފާހަގަކުރައްވާފައެވެ.

ރާއްޖެއަކީ ތިމާވެށީގެ ގޮތުން ނާޒުކު ޤައުމަކަށް ވުމާއެކު، މޫސުމީ ބަދަލުތަކުންނާއި އޯޒޯން ފަށަލައަށް ލިބޭ ގެއްލުންތަކުން އަރައިގަތުމަށް ބައިނަލްއަޤްވާމީ ފެންވަރުގައި ކުރެވޭ މަސައްކަތްތަކުގައި ރާއްޖެއިން އަބަދުވެސް އަންނަނީ އިސް ދައުރެއް އަދާކުރަމުންނެވެ.