ޣައްޒާގައި މާބަނޑު އެތައްހާސް ބަޔަކު ކޮންމެހެން ބޭނުންވާ ތަކެއްޗާއި ނުލައި އުޅެމުންއެބަދޭ: ރިޕޯޓުތައް

ފަަލަސްޠީނުގެ ޣައްޒާގައި އެތައްހާސް މާބަނޑު އަންހެނަކު ކޮންމެހެން ބޭނުންވާ ފަރުވާއާއި އެހެނިހެން ތަކެއްޗާއި ނުލައި ދުވަސްތައް ހޭދަކުރަމުންދާ ކަމަށް ކަމާއި ގުޅުން ހުރި ފަރާތްތަކުގެ ރިޕޯޓުކުން ބުނެފިއެވެ. 

ޣައްޒާގެ އަންހެނުން، އޭގެ ތެރޭގައި 50،000 މާބަނޑު އަންހެނުން ހިމެނޭ ގޮތަށް، އިންސާނީ ވަޞީލަތްތައް ނެތި ފިނި މޫސުން ގާތްވަމުން އަންނައިރު ކޮންމެހެން ބޭނުންވާ ތަކެތީގެ  ދަތިކަން އިންތިހާއަށް ތަހައްމަލު ކުރަމުންދާ ކަމަށް އދ ގެ ކަމާބެހޭ އިދާރާއިން ބުނެފައިވެއެވެ. 

ފިނިމޫސުމުގެ ގަދަ ފިނިހޫނުމިނުގެ ސަބަބުން ބޯކޮށް ވާރޭވެހުމާއި ކަނޑުގެ އުދައެރުން އިތުރުވާނެ ކަމަށް ލަފާކޮށްފައިވާއިރު އޭގެ ސަބަބުން  ފެނުގެ ސާފުތާހިރުކަމާއި ސާފުތާހިރުކަން ކުޑަވުމާއި ނަރުދަމާ ޖަމާވުމުގެ ސަބަބުން ބަލި ފެތުރުން އިތުރަށް ގޯސްވަމުންދާނެ ކަމުގެ ބިރުވެރިކަން އޮތް ކަމަށް އދ ގެ ރިޕޯޓުގައި ވަނީ ފާހަގަކޮށްފައެވެ. މީގެއިތުރުން ސާފުތާހިރުކަމުގެ ހާލަތު ދަށްވުމާއި ސެނިޓައިޒް ކުރާނެ  ޕްރޮޑަކްޓްތައް ނެތުމުން އިންފެކްޝަންތައް ޖެހި ފެތުރުމުގެ ބިރުވެރިކަން އޮތް ކަމަށްެވެސް އދގެ ރިޕޯޓުތަކުގައި ވަނީ ބުނެފައެވެ. 

އދގެ ރިޕޯޓުގައިވާ ގޮތުން 72 އިންސައްތަ އަންހެނުންނަށް މައްސަރު ކަންތައް ޖެހުމުން ސާފުތާހިރު ވުމަށް ބޭނުންވާ ސާމާނު ލިބުމުގައި ދަތިތަކެއް ކުރިމަތިވާކަމަށެވެ. 

މީގެއިތުރުން ކާބޯތަކެތީގެ ރައްކާތެރިކަން ނެތުމާއި ކާނާ ލިބުން ދަތިވުން އިތުރުވަމުންދާއިރު، މުޅި ޣައްޒާގައި 38،000 ފުރާވަރުގެ އަންހެން ކުދިންނާއި 8،000 މާބަނޑު އަންހެނުން ހިމެނޭ ގޮތަށް ގާތްގަނޑަކަށް 345،000 މީހުންނަށް ބަނޑުހައިހޫނުކަމުގެ ހާލަތްތައް ކުރިމަތިވެފައިވާ ކަމަށް އދގެ ރިޕޯޓުގައި ބުނެފައިވެއެވެ. 

ކާބޯތަކެތީގެ ދަތިކަން ޖެހިފައި އޮތުމުގެ ސަބަބުން އާބާދީގެ 90 ޕަސެންޓް ވަނީ ބަނޑަށް ޖެހިފައެވެ.