ސައިބަރ ކްރައިމްގެ އެންމެހާ ކުށުގެ ބާވަތްތަކުން ރައްކާތެރިވާނެ ގޮތް ރައްޔިތުނަށް އަންގައިދޭންޖެހޭ: ސީޕީ

ސައިބަރ ސެކިޔުރިޓީއާއި ސައިބަރ ކްރައިމްގެ އެންމެހާ ކުށުގެ ބާވަތްތަކުން ރައްކާތެރިވާނެ ގޮތް ރައްޔިތުންނަށް އަންގައިދޭންޖެހޭ ކަަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެެވެ. 

ސީޕީ ޝުޖާޢު މިހެން ވިދާޅުވީ ސައިބަރ އެކްސްޕޯ 2024 ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ. 

ސީޕީ ޝުޖާޢުގެ ވާހަކަފުޅުގައި ވިދާޅުވީ ސައިބަރ ކްރައިމްގެ ޤާނޫނުތަކާއި ޤަވާއިދުތަކަށް ރައްޔިތުން އަހުލުވެރިކުރުވުމަކީ ކޮންމެހެން ކުރަންޖެހިފައިވާ ކަމެއް ކަމަށެވެ.

މިކަމާ ގުޅޭގޮތުން ވާހަކަފުޅު ދައްކަވަމުން ސީޕީ ޝުޖާޢު ވިދާޅުވީ ސައިބަރ ސެކިއުރިޓީ އާއި ސައިބަރ ކްރައިމްގެ އެންމެހާ ކުށުގެ ބާވަތްތަކުން ރައްކާތެރިވާނެ ގޮތް ރައްޔިތުނަށް އަންގައިދީ އެކަމަށް ރައްޔިތުން އަހުލުވެރިކުރުވުމާއި ތުއްތު ޅަދަރިންނާއި އިސްރަށްވެހިން ސައިބަރ ކްރައިމްތަކުން ސަލާމަތްކުރުމަށް މަސައްކަތް ކުރަންޖެހޭ ކަމަށެވެ.

މީގެއިތުރުން ސައިބަރ ކްރައިމްގެ ޤާނޫނުތަކާއި ޤަވާއިދުތަކަށް ރައްޔިތުން އަހުލުވެރިކުރުވުމަކީވެސް ކޮންމެހެން ކުރަންޖެހިފައިވާ ކަމެއްކަން ސީޕީގެ ވާހަކަފުޅުގައި ފާހަގަކުރެއްވެވިއެވެ. 

 ސީޕީގެ ވާހަކަފުޅުގައި ވަނީ އެކަމުގެ ސަބަބުން އިންޓަރނޭޝަނަލް ބެސްޓް ޕްރެކްޓިސްތަކާއި ޤަނޫނުތަކަށް ލޯހުޅުވި ރާއްޖޭގެ އެކަށޭނެ ބަދަލުތައް ގެނައުމަށް ފަސޭހަވެގެންދާނެ ކަމަށް ވިދާޅުވެފައެވެ. 

ސައިބަރ އެކްސްޕޯގެ ތެރެއިން މިދާއިރާތަކުގެ ކުދި އަދި މެދުފަންތީގެ ވިޔަފާރިތައް އެއްތަނަކުން ބައްދަލުވެ، ގުޅުން ބަދަހިވުމުގެ ނަތީޖާއަކަށް ވެގެންދާނީ ކުދި ވިޔަފާރިތަކުގެ ޑިޖިޓަލް ސެކިއުރިޓީ ވަރުގަދަކުރުމަށް އައު ދޮރުތަކެއް ހުޅިވިގެން ދިއުންކަމަށާއި މި އެކްސްޕޯ ބޭއްވުމުގެ އެންމެ މުހިންމު އެއް އަމާޒަކީ އެއީ ކަމަށްވެސް ސީޕީ ޝުޖާޢުގެ ވާހަކަފުޅުގައި ވިދާޅުވިއެވެ. 

ތަހުޒީބުވަމުން އަންނަ ދުނިޔޭގެ ޓެކްނޮލޮޖީ ދާއިރާ ފުޅާވެ ފައްކާވެގެން އަންނައިރު ޓެކްނޮލޮޖީއާ އެއްހަމައެއްގައި ރާއްޖޭގެ ދުވެލި ހިފަހައްޓަން މަސައްކަތްކުރަން ޖެހޭ ކަމަށާއި މިކަން ކުރެވިގެން ދާނީ މި ދާއިރާގައި މަސައްކަތްކުރާ އެންމެހާ ފަރާތްތަކުން ގުޅިގެން މަސައްކަތްކޮށްގެން ކަމަށް ސީޕީ ޝުޖާޢު ވިދާޅުވިއެވެ.

ސީޕީ ވަނީ ސައިބަރ ކްރައިމްގެ ޝިކާރައަކަށްވެ، އަގުބޮޑެތި ގެއްލުންތަކެއްވެ، ޑޭޓާތައް ގެއްލި ފޫނުބެއްދޭ ވަރުގެ ބޮޑެތި ގެއްލުންތައްވެ، އެކަމުގެ ސަބަބުން ދިރިއުޅުމުގައި ގިނަ ތަކުލީފުތަކެއް އުފުލަންޖެހިފައިވާކަން ފާހަގަކުރައްވާފައެވެ.

މިކަން ހުއްޓުވުމަށްޓަކައި އެންމެ ގުޅިގެން އެކުގައި މަސައްކަތްކުރުމަށް އިހަށްވުރެ ބޮޑަށް މިއަދު މަސައްކަތްކުރަން ޖެހިފައިވާ ކަމަށާއި އެހެންކަމުން ސަރުކާރުގެ ވުޒާރާތަކާއި އަމިއްލަ ކުންފުނިތަކާއި އެކި ޖަމްޢިއްޔާތަކާއި ތައުލީމާއި ތަރުބިއްޔަތު ދޭ މުއްސަސާތަކުގެ މެދުގައި އޮންނަ ގުޅުން މިހާރަށްވުރެ ވަރުގަދަ ކުރަން ޖެހޭ ކަމަށްވެސް ސީޕީ ވިދާޅުވިއެވެ.

މިއަދު ދިވެހި ރައްޔިތުންގެ އަމާޒަކަށް ވާންވީސައިބަރ ސެކިއުރިޓީގެ ދާއިރާއިން އައު ފަންނުވެރިން ތައާރަފްކޮށް، މިދާއިރާއަށް ލޯބިޖެއްސުން ކަމަށް ސީޕީ ވިދާޅުވިއެވެ.