ފުޓުބޯޅަ ސްކޫލް އެޅުމަށް އެފްއޭއެމްއަށް ދޫކުރި ބިން ނެގުމާ ގުޅިގެން ޝަކުވާ ހުށަހެޅުމަށް ހުޅުވާލައިފި

ފުޓުބޯޅަ ސްކޫލެއް އެޅުމަށް ހުޅުމާލެ ފޭސް-1 އިން ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އަށް ދޫކުރި ބިމަށް ކުލި ނުދައްކާތީ އެ ބިން އަނބުރާ ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ) އަށް ނަގާފައިވުމާ ގުޅިގެން ޝަކުވާއެއް އޮތްނަމަ، އެ ކަމެއް ހުށަހެޅުމަށް އެ ކުންފުނިން ހުޅުވާލައިފިއެވެ.

މި ފުރުސަތު ހުޅުވާލުމުގެ ގޮތުން އެޗްޑީސީއިން ބުރާސްފަތި ދުވަހު ކުރި އިއުލާނެއްގައި ބުނީ، އެ ކުންފުނިން ބިން ނަގާފައިވުމާ ގުޅިގެން ޝަކުވާއެއް އޮތްނަމަ، އެކަމާ ގުޅޭ ލިޔުންތަކާއެކު އެ ކުންފުންޏަށް އީމެއިލް ކުރުމަށެވެ. އަދި މި ފުރުސަތު އޮތީ މި މަހުގެ 31 ގެ ނިޔަލަށް ކަމަށް ވެސް އެ ކުންފުނިން ކުރި އިއުލާނުގައި ވެއެވެ. 

ރާއްޖޭގެ ފުޓުބޯޅަ ކުރިއެރުވުމަށްޓަކައި ގްރާސް-ރޫޓުން ފެށިގެން މަސައްކަތް ކުރުމުގެ ގައުމީ ޕްރޮޖެކެޓެއްގެ ދަށުން، ސްކޫލް އެޅުމަށް މި ހޯދި ބިމުގައި އެކަމަޑޭޝަން އިމާރާތެއް ހެދިއެވެ. އަދި މި ސްކޫލް ހިންގުމަށްޓަކައި އެފްއޭއެމްއިން ވަނީ ރެއާލް މެޑްރިޑްގެ ލެޖެންޑް މިޝޭލް ސަލްގާޑޯ ފުޓްބޯޅަ އެޑިއުކޭޝަން ކްލަބާއިއެކު އެއްބަސްވުމެއްގައި 2021 ގައި ސޮއެކޮށްފައެވެ. 

އެ އެއްބަސްވުމުގެ ދަށުން ހުޅުމާލޭގައި ގާއިމްކުރާ ފުޓުބޯޅަ ސްކޫލް ހިންގުމުގެ އިތުރުން މުޅި ރާއްޖޭގައި ގާއިމު ކުރާ 18 އެކެޑެމީއެއް އެ ކްލަބްގެ ބެލުމުގެ ދަށުން ހިންގުމަށް ނިންމިއެވެ. އަދި އެ ފުޓްބޯޅަ ސްކޫލްގެ ޓްރޭނިންތައް ސީދާ ސަލްގާޑޯގެ ބެލުމުގެ ދަށުން ކުރިޔަށް ގެންދިއުމަށާއި، އެ ސްކޫލަށް ބޭނުންވާ ކޯޗުން ކަނޑައަޅެމުގެ އިހުތިޔާރު ވެސް، އެ އެއްބަސްވުމުގެ ދަށުން ދީފައި އޮތީ ސަލްގާޑޯ އަށެވެ. 

ނަމަވެސް މި ޕްރޮޖެކްޓުގެ މަސައްކަތެއް ނުކޮށް، ފަހުން އެފްއޭއެމްއިން ވަނީ އެ ބިމުގެ ބައެއް ތަންތަން ވިޔަފާރި ކުރުމަށް ކުއްޔަށް ދޫކޮށްފައެވެ. 

އެފްއޭއެމް މިހާރު ހިންގަމުންދާ ނޯމަލައިޒޭޝަން ކޮމިޓީން ހާމަކޮށްފައިވާ ގޮތުގައި، މި ބިމުގެ ކުލީގެ ގޮތުގައި 8 މިލިއަން ރުފިޔާ ވަނީ އެ ކުންފުންޏަށް ނުދައްކައެވެ.