ޚަބަރު
އަލިފާނުގެ ހާދިސާއާ ގުޅިގެން ރެހެންދި އެވޯޑު ހަފްލާ ފަސްކޮށްފި

2018 ވަނަ އަހަރު ބޭއްވި ރެހެންދި އެވޯޑު ހަފްލާގެ ތެރެއިން--- ފޮޓޯ: ވުޒާރާ
ހުލާސާ
ހަފްލާ ދެން އޮންނާނެ ތާރީހެއް، ހަފްލާގެ ދައުވަތު އަރުވާފައިވާ ފަރާތްތަކަށް އަންގާނެކަމަށް އެ ވުޒާރާއިން ހާމަކުރޭ.
ރެހެންދި އެވޯޑަކީ ތަފާތު އެކި ދާއިރާތަކުން ފާހަގަކޮށްލެވޭ އަންހެނުންނަށް ދެމުން އަންނަ އެވޯޑެއް.
ބުރާސްފަތި ދުވަހު މާލޭގައި ހިނގި އަލިފާނުގެ ހާދިސާއާ ގުޅިގެން، އާދީއްތަ ދުވަހުގެރޭ ބޭއްވުމަށް ތާވަލުކޮށްފައި އޮތް 10 ވަނަ ރެހެންދި އެވޯޑު ހަފްލާ ފަސްކޮށްފިއެވެ.
މި އަލިފާނުގެ ހާދިސާ ހިނގާފައިވަނީ އަމީނީ މަގުގައި ހުންނަ ސަރުކާރުގެ ގިނަ އޮފީސްތަކެއް ހިންގަމުން ދިޔަ އިމާރާތެއްގައެވެ. މި އަލިފާންގަނޑު ނިއްވާލުމަށް ހަތަރު ގަޑިއިރު ހޭދަވިއިރު، މި ހާދިސާގައި އެ އިމާރާތް ވަނީ އެއްކޮށް އަނދާ އަޅިޔަށްވެފައެވެ. ގެދޮރުވެރިކަމާ ބެހޭ ވުޒާރާއާއި، ޢިމާރާތްކުރުމާ ބެހޭ ވުޒާރާއާއި، ތިމާވެއްޓާއި ބެހޭ ވުޒާރާގެ މަސައްކަތްތައް އެ އިމާރާތުގައި ހިނގަމުންދާއިރު، އެތަނުން ސަލާމަތް ކުރެވުނީ މަދު އެއްޗެކެވެ.
މި ހާދިސާއި ގުޅިގެން އެ ތިން މިނިސްޓްރީގެ ހިދުމަތްތައް ވަގުތީ ގޮތުން މެދުކަނޑާލާފައިވާއިރު އެ މިނިސްޓްރީތަކުގެ ހިދުމަތްތައް ފެށޭނެ ސީދާ ތާރީހެއް އަދި ސަރުކާރުން ހާމައެއް ނުކުރެއެވެ.
ރެހެންދި އެވޯޑު ހަފްލާ ފަސްކުރިކަން އެންގުމުގެ ގޮތުން އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ނެރުނު ބަޔާނުގައި ބުނީ، އަލިފާނުގެ ހާދިސާއާ ގުޅިގެން މި މަހުގެ 15 ވަނަ ދުވަހުގެރޭ ދަރުބާރު ގޭގައި ބޭއްވުމަށް ތާވަލުކޮށްފައި އޮތް އެވޯޑު ހަފްލާ ފަސްކޮށްފައިވާ ކަމަށާއި، ހަފްލާ ދެން އޮންނާނެ ތާރީހެއް، ހަފްލާގެ ދައުވަތު އަރުވާފައިވާ ފަރާތްތަކަށް އަންގާނެކަމަށެވެ.
ރެހެންދި އެވޯޑުގެ އިތުރުން، މިރޭ ބާއްވަން ހަމަޖައްސާފައި އޮތް މަސްވެރިންގެ ދުވަހުގެ ރަސްމީ ޖަލްސާ ވެސް މިހާރު ވަނީ ފަސްކޮށްފައެވެ.
ރެހެންދި އެވޯޑަކީ ތަފާތު އެކި ދާއިރާތަކުން ފާހަގަކޮށްލެވޭ އަންހެނުންނަށް ދެމުން އަންނަ އެވޯޑެކެވެ. އަދި މި އެވޯޑު ހަފްލާ ބާއްވަމުން އަންނަނީ ބައިނަލްއަގްވާމީ އަންހެނުންގެ ދުވަހާއި ގުޅުވައިގެންނެވެ.