ހަނިމާދޫގައި އަލަށް އަޅާ މިސްކިތުގެ ބޭރު ސިމެންތި ޖެހުމާއި އެތެރެ ލެވެލްކުރުމުގެ މަސައްކަތް ބާރަށް ކުރިއަށް

ހދ. ހަނިމާދޫގައި 500 މީހުންގެ ޖާގައިގެ އާ މިސްކިތެއް އިމާރާތްކުރުމަށް ކުރިއަށްގެންދާ މަޝްރޫޢުގެ ދަށުން، މިސްކިތުގެ ބޭރުގައި ސިމެންތި ޖެހުމާއި އިމާރާތުގެ އެތެރޭގެ ބިންގަނޑު ލެވެލްކުރުމުގެ މަސައްކަތް ބާރަށް ކުރިއަށްދާ ކަމަށް އެމްޓީސީސީން ހާމަކޮށްފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނި ގޮތުގައި، މިސްކިތުގެ ގްރައުންޑް ފްލޯގެ ރޭނުމުގެ މަސައްކަތް ނިމި، މިހާރު ކުރިއަށްދަނީ އިމާރާތުގެ ބޭރު ފާރުތަކުގައި ސިމެންތި ޖެހުމުގެ މަސައްކަތެވެ. މީގެ އިތުރުން، އިމާރާތުގެ އެތެރޭގައި ތަޅުން އެޅުމަށާއި ޓައިލްސް ޖެހުމަށްޓަކައި ބިންގަނޑު އެއްވަރުކޮށް ލެވެލްކުރުމުގެ މަސައްކަތްވެސް އެ ކުންފުނީގެ ޓީމުތަކުން ދަނީ ކުރަމުންނެވެ.

މިނިސްޓްރީ އޮފް އިސްލާމިކް އެފެއާޒްގެ ފަރާތުން އެމްޓީސީސީއާ ހަވާލުކޮށްފައިވާ މި މަޝްރޫޢަކީ ކުރިން މަސައްކަތް ހުއްޓިފައި އޮތް މިސްކިތެއްގެ ނުނިމި ހުރި ބައިތައް ފުރިހަމަކުރުމަށް ހިންގާ މަޝްރޫޢެކެވެ. ޖުމްލަ 9.44 މިލިއަން ރުފިޔާގެ މި މަޝްރޫޢުގެ އެއްބަސްވުމުގައި ސޮއިކޮށްފައިވަނީ 8 އެޕްރީލް 2025 ގައެވެ. މި މަސައްކަތް އެމްޓީސީސީއާ ހަވާލުކުރީ 360 ދުވަހުގެ ތެރޭގައި ނިންމާ ގޮތަށެވެ.

ޖުމްލަ 7،933 އަކަފޫޓުގެ ބިމެއްގައި އަޅާ މި މިސްކިތުގެ މަސައްކަތުގެ ތެރޭގައި ކޮންކްރީޓް ސްޓްރަކްޗަރާއި ރޫފް ސްލެބް އެޅުމާއި، ރޭނުމާއި ސިމެންތި ޖެހުމުގެ އިތުރުން މައިގަނޑު ޔޫޓިލިޓީ ވަޔަރިންގއާއި، ތަޅުމުގައި ޓައިލްސް ޖެހުމާއި ފިނިޝިންގގެ ހުރިހާ މަސައްކަތްތައް ހިމެނެއެވެ.

ހަނިމާދޫގެ އަލަށް އާބާދުވަމުން އަންނަ ސަރަޙައްދުގައި ބިނާކުރާ މި މިސްކިތް ނިމުމުން، ޖަމާޢަތުގައި ނަމާދުކުރުމަށް އެ ރަށުގެ ރައްޔިތުންނަށް ދިމާވެފައިވާ ޖާގައިގެ ދަތިކަމަށް ބޮޑު ލުޔެއް ލިބިގެންދާނެއެވެ.