Ads by Exprox

ޚަބަރު

އުނގޫފާރު ރީޖަނަލް ހޮސްޕިޓަލުގައި އެމް.އާރު.އައި.ގެ ހިދުމަތް ފަށައިފި

އުނގޫފާރު ރީޖަނަލް ހޮސްޕިޓަލުގައި އެމް.އާރު.އައި.ގެ ހިދުމަތް ފަށައިފި

އެމްއާރުއައި ހިދުމަތް ފެއްޓެވުމަށް ބޭއްވި ރަސްމިއްޔާތުގައި ވަޒީރު ނާޒިމް--- ފޮޓޯ: ސިއްހީ ވުޒާރާ

މިފްތާޙް މުޙައްމަދު

މިފްތާޙް މުޙައްމަދު

13 ޑިސެމްބަރު 2024، 06:37

13 ޑިސެމްބަރު 2024، 06:37

ހުލާސާ

ވަޒީރު ވިދާޅުވީ، އުނގޫފާރު ހޮސްޕިޓަލުގައި އެމް. އާރު. އައި. ގެ ހިދުމަތްދޭން ފެށުމަކީ، ޓާރޝަރީ ފެންވަރަށް ހޮސްޕިޓަލް ބަދަލުކުރުމަށް ކުރަންޖެހޭ މަސައްކަތުގެ އެއްބައި ކަމަށް.

އުނގޫފާރު ރީޖަނަލް ހޮސްޕިޓަލުގައި މެގްނެޓިކް ރެޒޮނެންސް އިމޭޖިންގ (އެމް. އާރު. އައި.) ގެ ހިދުމަތް ފަށައިފިއެވެ. މި ހިދުމަތް ރަސްމީކޮށް ފައްޓަވާ ދެއްވީ ބުރާސްފަތި ދުވަހުގެ ރޭ ބޭއްވި ހާއްސަ ރަސްމިއްޔާތެއްގައި، ސިއްހީ ވަޒީރު އަބްދުﷲ ނާޒިމް އިބްރާހިމްއެވެ.

އުނގޫފާރު ރީޖަނަލް ހޮސްޕިޓަލުގައި މި ހިދުމަތް ފެށިއިރު، އެ ހޮސްޕިޓަލް ޓާރޝަރީ ފެންވަރަށް ބަދަލުކޮށްދެއްވުމަށް ރައީސުލްޖޫމްހޫރިއްޔާ ޑޮކްޓަރ މުހައްމަދު މުއިއްޒު ވަނީ ވައުދުފުޅުވެ ވަޑައިގެންފައެވެ. މިކަމަށް އިޝާރާތް ކުރައްވައި ވަޒީރު ވިދާޅުވީ، އުނގޫފާރު ހޮސްޕިޓަލުގައި އެމް. އާރު. އައި. ގެ ހިދުމަތްދޭން ފެށުމަކީ، ޓާރޝަރީ ފެންވަރަށް ހޮސްޕިޓަލް ބަދަލުކުރުމަށް ކުރަންޖެހޭ މަސައްކަތުގެ އެއްބައި ކަމަށެވެ.  

މީގެ އިތުރުން، ރައީސުލްޖުމްހޫރިއްޔާގެ ވައުދުފުޅުތައް ފުއްދެވުމަށް ހުއްޓުމެއްނެތި އެ މަނިކުފާނު 24 ގަޑިއިރު މަސައްކަތްޕުޅު ކުރައްވަމުން ގެންދަވާކަމަށާއި، އެގޮތުގެ މަތީން އުނގޫފާރު ރީޖަނަލް ހޮސްޕިޓަލް ޓާރޝަރީ ފެންވަރަށް ބަދަލުކުރެއްވޭނެކަމުގެ ޔަގީންކަން އެ މަނިކުފާނުގެ އެބައޮތް ކަމަށް ވިދާޅުވިއެވެ. 

އެގޮތުން އެ ހޮސްޕިޓަލް ޓާޝަރީ ފެންވަރަށް ބަދަލު ކުރުމަށް ސިއްހީ ވުޒާރާއިން އިތުރަށް ކުރަން ހުރި މަސައްކަތްތައް ދެނެގަނެ، އެކަންކަން ބާރު ސުޕީޑުގައި ކުރިޔަށް ގެންދަވާނެ ކަމަށް ވެސް ވަޒީރު ނާޒިމް ވަނީ ވިދާޅުވެފައެވެ.

ވަޒީރުގެ ވާހަކަފުޅުގައި އެ މަނިކުފާނު ވަނީ، ބަލި ޖެހުމުގެ ކުރިން ބަލިން ރައްކާތެރިވެ ތިބޭ ބަޔަކަށް ދިވެހިން ހެދުމުގެ ސިޔާސަތުގެ މަސައްކަތްތަކަށް ވެސް އަލިއަޅުވާލައްވާފައެވެ. އެގޮތުން، ޕްރައިމަރީ ހެލްތު ކެއަރ ނުވަތަ އިބްތިދާއީ ސިއްޙީ ޚިދުމަތުގެ ނިޒާމު ރަށްރަށުގައި ޤާއިމްކުރުމުގެ މަސައްކަތް މިހާރު ފަށާފައިވާކަމަށާއި، 2025 ވަނަ އަހަރު  ނިމުމުގެ ކުރިން އެ ނިޒާމު، މީހުން ދިރިއުޅޭ ހުރިހާ ރަށެއްގައި ޤާއިމްކުރެވޭނެކަމަށް ވަޒީރު ވަނީ ވިދާޅުވެފައެވެ. 

މި ލިޔުން ކިޔާލުމުން

Ads by MSS