އިރުތިޝާމްގެ ސަފީރުކަމުގެ ފަތްކޮޅު އިނގިރޭސި ރަސްގެފާނަށް އަރުވައިފި

ދިވެހިރާއްޖެއިން ޔުނައިޓެޑް ކިންގްޑަމް އޮފް ގްރޭޑް ބްރިޓަން އެންޑް ނޮދަރން އަޔަލޭންޑް (އިނގިރޭސިވިލާތް) އަށް ކަނޑައެޅުއްވި އައު ސަފީރު، ޑޮކްޓަރ އިރުތިޝާމް އާދަމްގެ ސަފީރުކަމުގެ ފަތްކޮޅު، ރަސްގެފާނު ޗާލްސް ތިނަކަށް މިއަދު އަރުވައިފިއެވެ. ފަތްކެޅޮ އެރުވުމުގެ ރަސްމިއްޔާތު ކުރިޔަށް ގޮސްފައިވަނީ ބަކިންގްހަމް ޕެލަސްގައެވެ. 

މި ރަސްމިއްޔާތުގައި ޑޮކްޓަރ އިރުތިޝާމަށް މަރުހަބާ ދަންނަވައި ރަސްގެފާނު ވިދާޅުވީ، ދިވެހިރާއްޖެ އާއި އިނގިރޭސިވިލާތާއި ދެމެދު އޮތް ޒަމާނީ ގުޅުމާއި އެކުވެރިކަން އިތުރަށް ބަދަހިކުރެއްވުމަށް ބޭނުންފުޅުވާކަމަށެވެ. 

މީގެ އިތުރުން، މި ރަސްމިއްޔާތުގައި ޑޮކްޓަރ އިރުތިޝާމް ވަނީ، ރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ފަރާތްޕުޅުން އިނގިރޭސިވިލާތުގެ ރަސްގެފާނަށް ތަހުނިޔާއާއި ހެޔޮއެދުންތައް އަރިސްކުރައްވާފައެވެ. އަދި ދެ ގައުމުން ގުޅިގެން، ދެ ގައުމުގެ މަސްލަހަތު ހިމެނޭ ކަންކަމުގައި ވަރަށް ކައިރިން މަސައްކަތް ކުރައްވާނެކަމުގެ ޔަގީންކަން ދެއްވާފައިވެއެވެ.

މި ރަސްމިއްޔާތަށްފަހު، ޑިޕްލޮމެޓިކް އާދަކާދައިގެ މަތިން އިނގިރޭސިވިލާތުގައި އޮންނަ ޚާއްސަ ރިސެޕްޝަނުގައި ވެސް ޑޮކްޓަރ އިރުތިޝާމް ބައިވެރިވެ ވަޑައިގެންނެވިއެވެ.  

ސެއިންޓް  ޖޭމްސް  ކޯޓް  ލަންޑަން  -  އަ  ތާޖް  ހޮޓެލްގައި  ބޭއްވުނު މި  ރިސެޕްޝަނުގައި  ކޮމަންވެލްތުގެ ސެކްރެޓަރީ ޖެނެރަލް އާއި ސާކް  އަދި  ކޮމަންވެލްތު ޤައުމުތަކުގެ  ސަފީރުންނާއި، ޑިޕްލޮމެޓިކް  ކޯ ގެ  ޑީން  ކަމުގައިވާ  ހޮންޑިއޫރަސްގެ  ސަފީރު  އިވާން  ރޮމޭރޯ-މާރޓިނޭޒް އާއި އިނގިރޭސިވިލާތުގެ  ފޮރިން،  ކޮމަންވެލްތު  އެންޑް  ޑިވެލޮޕްމަންޓް  އޮފީހުގެ  ސައުތު  އޭޝިއާ  ޑިޕާޓްމަންޓުގެ  އޮފިޝަލުންނާއި،  ކޮމަންވެލްތު ސެކްރެޓޭރިއޭޓްގެ  އިސް ބޭފުޅުން ބައިވެރިވެވަޑައިގެތެވެ. މީގެ އިތުރުން  މޯލްޑިވްސް-ޔޫ.ކޭ.  ޕާލިމަންޓަރީ  ގްރޫޕްގެ  ކޯ-ޗެއަރ   އާއި އިނގިރޭސިވިލާތު ސަރުކާރުގެ  އެހެނިހެން އިދާރާތަކުގެ އިސްވެރިންނާއި ބައިނަލްއަޤްވާމީ  ޖަމާޢަތްތަކުގެ  އިސްވެރިންނާއި  އިނގިރޭސިވިލާތުގައި  ދިރިއުޅޭ  ބައެއް ދިވެހިންނާއި މީޑިއާގެ ފަރާތްތައް ބައިވެރިވެވަޑައިގެންފައިވެއެވެ.