ދިވެހިރާއްޖޭގެ 58 ވަނަ ޖުމްހޫރީ ދުވަހުގެ ތަހުނިޔާ ރައީސުލްޖުމްހޫރިއްޔާ ފޮނުއްވައިފި

ދިވެހިރާއްޖޭގެ 58 ވަނަ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ލޮބުވެތި ރައްޔިތުންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވައިފިއެވެ.

ރައީސުލްޖުމްހޫރިއްޔާ މި ތަހުނިޔާގެ މެސެޖު ފޮނުއްވާފައި ވަނީ މިއަދު އެކްސްގައި ކުރެއްވި ޕޯސްޓެއްގައެވެ. އެމަނިކުފާނުގެ ޕޯސްޓުގައި، ދިވެހިރާއްޖޭގެ 58 ވަނަ ޖުމްހޫރީ ދުވަހުގެ ތަހުނިޔާއާއި ހެޔޮއެދުންތައް ލޮބުވެތި ދިވެހި އުޚްތުންނާއި އަޚުންނަށް އަރިސްކުރައްވާ ކަމަށް ވިދާޅުވެފައިވެއެވެ.

ޯދިވެހިރާއްޖޭގެ 58 ވަނަ ޖުމްހޫރީ ދުވަހުގެ ތަހުނިޔާއާއި ހެޔޮއެދުންތައް ލޮބުވެތި ދިވެހި އުޚްތުންނާއި އަޚުންނަށް ދަންނަވަން! https://t.co/jKlZKOiLuP

— Dr Mohamed Muizzu (@MMuizzu) November 11, 2026

ދިވެހިރާއްޖޭގައި ޖުމްހޫރީ ދުވަހުގެ ގޮތުގައި ފާހަގަކުރަމުން އަންނަނީ ކޮންމެ އަހަރެއްގެ ވެސް ނޮވެމްބަރު 11 ވަނަ ދުވަހެވެ. މި ދުވަސް ރާއްޖޭގައި ފާހަގަކުރަނީ ޒަމާންތަކެއްވެފައިވާ ރަސްކަމުގެ ނިޒާމު ނިމުމަކަށް ގެނެސް، ރާއްޖޭގެ ދެވަނަ ޖުމްހޫރިއްޔާ އިޢުލާނުކުރެވުނު ތާރީޚީ މުނާސަބަތާއި ގުޅުވައިގެންނެވެ.

ރާއްޖޭގެ ދެވަނަ ޖުމްހޫރިއްޔާ ފެށިގެން ދިޔައީ 11 ނޮވެމްބަރު 1968 ގައެވެ. އެ ދުވަހު ރާއްޖޭގެ ދެވަނަ ޖުމްހޫރިއްޔާގެ ފުރަތަމަ ރައީސްގެ ގޮތުގައި މަޤާމުގެ ހުވާކުރެއްވީ އިބްރާހީމް ނާޞިރެވެ. މީގެ ކުރިން ރާއްޖޭގައި ފުރަތަމަ ފަހަރަށް ޖުމްހޫރިއްޔާއެއް އިޢުލާނުކުރެވުނީ 1 ޖެނުއަރީ 1953 ގައެވެ. އެފަހަރު ވެރިކަމާއި ހަވާލުވެވަޑައިގެންނެވީ މުޙައްމަދު އަމީނެވެ.

ޖުމްހޫރީ ދުވަހަކީ ދިވެހިރާއްޖޭގެ ވެރިކަމުގެ ނިޒާމަށް އައި އެންމެ ބޮޑު ބަދަލު ރަމްޒުކޮށްދޭ ދުވަހެވެ. މިއަދު ފާހަގަކުރަމުން މިދަނީ ރާއްޖޭގެ ދެވަނަ ޖުމްހޫރިއްޔާއަށް 58 އަހަރު ފުރުނު މުނާސަބަތެވެ.