"ދަ ގޯޓް ލައިފް": އުފައްދަން 16 އަހަރު ، ގިނަބަޔަކަށް ކަމުދިޔަ ހަޤީގީ ހާދިސާއެއް

ނެޓްފްލިކްސްގައި ދައްކަމުންދާ "ދަ ގޯޓް ލައިފް" ނަމަކަށް ކިޔާ ފިލްމަކުން ގިނަ ބަޔަކު ހައިރާންވެ، އެ ފިލްމަށް ތަޢުރީފު ކުރަމުންދާ ކަމަށް ބައެއް މީޑިއާތަކުން ރިޕޯޓުކޮށްފިއެވެ. މި ފިލްމަކީ ހަޤީޤީ ވާހަކައެއްގެ މައްޗަށް ބިނާކޮށް ހަދާފައިވާ ފިލްމެކެވެ.

މި އަހަރުގެ މާރިޗު މަހު ދައްކަން ފެށި މި ފިލްމަކީ، ވަޒީފާއެއްގެ އުންމީދުގައި ސަޢޫދީ ޢަރަބިއްޔާއަށް ދިޔަ އިންޑިއާގެ މީހަކަށް ދިމާވި ހިތާމަވެރި ހާދިސާއެއްގެ ވާހަކަ ކިޔައިދޭ ފިލްމެކެވެ. ފިލްމުގައި ދައްކާގޮތުން، އޭނާއަށް މަޖުބޫރުކުރުވަނީ އެއްވެސް މުސާރައެއް ނުލިބި، ގޮވާމުގައި ބަކަރި ހުއިހައްޕަން އުޅެންށެވެ.

މި ފިލްމަކީ 2008 ވަނަ އަހަރު ޝާއިޢުކުރި "އާދުޖީވިތަމް" ނަމަކަށް ކިޔާ މަލަޔާލަމް ފޮތެއްގެ މައްޗަށް ބިނާކޮށް ހަދާފައިވާ ފިލްމެކެވެ. މި ފޮތަކީ ނަޖީބް ނަމަކަށް ކިޔާ މީހެއްގެ ހަޤީޤީ ވާހަކައެވެ. ޓައިމްލައިން ޑެއިލީގެ ރިޕޯޓެއްގައި ބުނެފައިވާ ގޮތުން، މި ފިލްމް ވަނީ ގިނަ  ޤައުމުތަކުގައި މަނާކުރެވިފައެވެ. ނަމަވެސް، ފަހުން ވަނީ އެފިލަމު ދެއްކުމުގެ ހުއްދަ ދީފައެވެ.

ނެޓްފްލިކްސް މެންބަރުންގެ މެދުގައި މި ފިލްމް ވަރަށް މަޤްބޫލުވެފައިވާ ކަމަށް ފާހަގަކުރެވެއެވެ. "ނެޓްފްލިކްސް ބޭންގާޒް" ނަމަކަށް ކިޔާ ފޭސްބުކް ގްރޫޕެއްގައި ގިނަ ބަޔަކު މި ފިލްމަށް ތަޢުރީފުކޮށްފައިވެއެވެ. އޭގެ ތެރެއިން އެކަކު ބުނެފައިވަނީ މި ފިލްމަކީ "އައުޓްސްޓޭންޑިންގ" ފިލްމެއް ކަމަށެވެ.

ރޮޓަން ޓޮމޭޓޯސް ވެބްސައިޓުގައި މި ފިލްމަށް 88 ޕަސެންޓް ރޭޓިންގ ލިބިފައިވާ ކަމަށް ވެސް ވަނީ ފާހަގަކުރެވިފައެވެ. ފަސްޓް ޕޯސްޓްގެ ގަނޭޝް އަގްލަވޭ ބުނެފައިވަނީ މި ފިލްމުގައި ސުކުމާރަން އަދާކޮށްފައިވާ ދައުރަކީ އޭނާގެ ކެރިއަރގެ އެންމެ ރަނގަޅު އެއް ދައުރު ކަމަށެވެ.