ވޯލްޑް އެކުއަޓިކްސް މުބާރާތުގައި ފެތެމުގެ ގައުމީ ރެކޯޑުތަކެއް އައުކޮށްފި

ހަންގޭރީގެ ބުޑަޕެސްޓުގައި މިހާރު ކުރިޔަށްދާ ވޯލްޑް އެކުއަޓިކްސް ސްވިމިން ޗެމްޕިއަންޝިޕް (25 މީޓަރު) ގައި ފެތުމުގެ ގައުމީ ރެކޯޑުތަކެއް އައުކޮށްފިއެވެ. ތިން ކެޓަގަރީއަކުން މި ރެކޯޑުތައް އައުކޮށްފައި ވަނީ ރާއްޖޭގެ ގައުމީ ފެތުންތެރިން ކަމަށްވާ މުހައްމަދު އާން ހުސެއިން، މުހައްމަދު ރިހާން ޝިހާމް އަދި ހަމްނާ އަހުމަދުއެވެ.

އެގޮތުން މުހައްމަދު އާން ހުސެއިން އައުކުރީ ފިރިހެނުންގެ ޝޯރޓްކޯސް 100 މީޓަރ ފްރީސަޓައިލް އިވެންޓުގެ ރެކޯޑެވެ. އަދި މުހައްމަދު ރިހާން ޝިހާމް ފިރިހެނުންގެ ޝޯރޓްކޯސް 200 މީޓަރ ބަޓަރފްލައި އިވެންޓުގެ ރެކޯޑު އައުކުރި އިރު ހަމްނާ މުހައްމަދު އައުކުރީ އަންހެނުންގެ ޝޯރޓްކޯސް 100 މީޓަރ ބްރެސްޓްސްޓްރޯކް އިވެންޓުގެ ގައުމީ ރެކޯޑެވެ. 

ފިރިހެނުންގެ ޝޯރޓްކޯސް 100 މީޓަރ ފްރީސަޓައިލް އިވެންޓުގެ ގައުމީ ރެކޯޑު އާން އައުކުރީ 00:52.29 ސިކުންތުން ރޭސް ނިންމައިގެންނެވެ. މި އިވެންޓުގެ ޤައުމީ ރެކޯޑު މީގެ ކުރިން ވެސް އޮތީ އޭނާގެ އަތުގައެވެ. ކުރިން އޭނާގެ ރެކޯޑަކީ  00:53.45  ސިކުންތެވެ. އެއީ މިދިޔަ މަހު ހަންގޭރީގައި ބޭއްވުނު އެ ޤައުމުގެ 20 ވަނަ ނެޝަނަލް ޝޯޓް-ޓްރެކް ޗެމްޕިއަންޝިޕްގައި އޭނާ އައުކުރި ރެކޯޑެކެވެ. 

އަންހެނުންގެ ޝޯޓްކޯސް 100 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް ހަމްނާ އައުކުރީ، 01:20.69 މިނެޓުން ރޭސް  ނިންމައިގެންނެވެ. އާންއެކޭ އެއްގޮތަށް، މި ރެކޯޑު ވެސް ކުރިން އޮތީ ހަމްނާގެ އަތުގައެވެ. ހަމްނާގެ ކުރީގެ ރެކޯޑަކީ 01:22.65  މިނެޓެވެ. އޭނާ ވެސް މި ރެކޯޑު އައުކުރީ  މިދިޔަ މަހު ހަންގޭރީގައި ބޭއްވުނު އެ ޤައުމުގެ 20 ވަނަ ނެޝަނަލް ޝޯޓް-ޓްރެކް ޗެމްޕިއަންޝިޕްގައެވެ.

ފިރިހެނުންގެ ޝޯޓްކޯސް 200 މީޓަރު ބަޓަފްލައި އިވެންޓުގެ ގައުމީ ރެކޯޑް ރިހާން އާކޮށްފައިވަނީ 02:17.93 މިނެޓުން ރޭސް ނިންމައިގެންނެވެ. މި ރެކޯޑު ކުރިން އޭނާގެ އަތުގައި އޮތީ މިދިޔަ އޮކްޓޫބަރު މަހު ބޭއްވުނު އޭޝިއަން އޯޕަން ސްކޫލްސް އިންވިޓޭޝަނަލް (އޭއޯއެސްއައި) ޝޯޓްކޯސް (25 މީޓަރު) އޭޖް ގްރޫޕް ސްވިމިން ޗެމްޕިއަންޝިޕްސްގައި ވާދަކޮށް 02:21.75 އިން ރޭސް ފުރިހަމަކޮށްގެންނެވެ.