ކާވާ ކްލަބް ޗެމްޕިއަންޝިޕް: ސެމީގައި ހެލްޕް ނޭޕާލް އަތުން އެޗްޑީސީ ބަލިވެއްޖެ

ނޭޕާލުގެ ކަތުމަންޑޫގައި މިހާރު ކުރިޔަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ކްލަބް ޗެމްޕިއަންޝިޕްގެ ދެވަނަ ސެމީ ފައިނަލް މެޗުގައި ނޭޕާލްގެ ހެލްޕް ނޭޕާލް ސްޕޯޓްސް ކްލަބުން ރާއްޖޭގެ ކްލަބު އެޗްޑީސީ ބަލިކޮށްފިއެވެ. 

ހުކުރު ދުވަހުގެ ހަވީރު ކުޅުނު މި މެޗު ހެލްޕް ނޭޕާލުން ކާމިޔާބުކޮށްފައިވަނީ ސީދާ 3 ސެޓުންނެވެ. 

މެޗުގެ ފުރަތަމަ ސެޓުގައި އެޗްޑީސީއަށް ހެދެމުން ދިޔަ ގޯސްތަކުގެ ފައިދާނަގައި، ހެލްޕް ނޭޕާލް ޓީމުން ވަނީ ތަފާތު ބޮޑުކޮށް ސެޓު ކާމިޔާބުކޮށްފައެވެ. އެގޮތުން ހެލްޕް ނޭޕާލް ޓީމުގެ އެޓޭކްތައް ރިސީވް ކުރުމުގައި އެޗްޑީސީއަށް ގިނަ ފަހަރު ނާކާމިޔާބުވަމުން ދިޔައިރު، އެ ޓީމުން މި ސެޓު ގެންދިޔައީ 25-16 އިންނެވެ.

ދެވަނަ ސެޓުގައި އެޗްޑީސީއިން ކޮންމެވެސް ވަރަކަށް ކުޅުން ރަގަޅު ކުރި ނަމަވެސް، ހެލްޕް ނޭޕާލު ޓީމުން ވަނީ ދުލެއް ނުދީ 25-18 އިން މި ސެޓު ވެސް ކާމިޔާބުކޮށްފައެވެ.

މެޗުގެ ތިން ވަނަ ސެޓުގެ ފުރިހަމަ ކޮންޓްރޯލް ވެސް ހެލްޕް ނޭޕާލު ޓީމުން ވަނީ ނަގާފައެވެ. ނަމަވެސް ކުރީ ދެ ސެޓަށް ވުރެން ގިނަ ޕޮއިންޓު އެޗްޑީސީއިން ވަނީ މި ސެޓުގައި ހޯދާފައެވެ. ހެލްޕް ނޭޕާލު ޓީމުން މި ސެޓު ކާމިޔާބުކުރީ 25-21 އިންނެވެ. 

ލީގު ބުރުގައި މި ދެ ޓީމު ބައްދަލުކުރި މެޗު ވެސް ކާމިޔާބުކޮށްފައިވަނީ ހެލްޕް ނޭޕާލު ޓީމުންނެވެ. އެ މެޗުގައި އެޗްޑީސީގެ މައްޗަށް އެމީހުން ކުރި ހޯދީ 3-1 ސެޓުންނެވެ.

މުބާރާތުގެ ތިން ވަނަ ހޮވާ މެޗު މިއަދު ކުޅުމަށް ހަމަޖެހިފައިވާއިރު އެ މެޗުގައި ބައްދަލުކުރާނީ އެޗްޑީސީ އާއި އިރާން ކްލަބެވެ. ސެމީގައި އިރާން ކްލަބް ބަލިވީ އިންޑިއާގެ ކަލިކަޓް ހީރޯޒްގެ އަތުން 3-1 ސެޓުންނެވެ. 

ލީގު ބުރުގައި އެޗްޑީސީ އާއި އިރާން ކްލަބް ބައްދަލުކުރި މެޗުގައި ފޯރިގަދަ ކުޅުމެއް ފެނިގެން ދިޔައިރު، އެ މެޗު 3-2 ސެޓުން ކާމިޔާބުކުރީ އިރާން ކްލަބެވެ.