މެދު އިރުމަތީގައި ރާއްޖޭގެ ފަތުރުވެރިކަން އިޝްތިހާރުކުރުމަށް އަންނަ އަހަރު ރޯޑްޝޯއެއް ބޭއްވުމަށް ނިންމައިފި

އަރަބި އިސްލާމީ ޤައުމުތަކާއި މެދު އިރުމަތީގެ ޤައުމުތަކަށް އަމާޒުކޮށްގެން އަންނަ އަހަރު ރޯޑްޝޯއެއް ބޭއްވުމަށް ނިންމައިފިކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވެއްޖެއެވެ.

ޝިއުރީ މިހެން ވިދާޅުވީ އިއްޔެ ރޭ ޕީއެސްއެމް ނިއުސްއިން ގެނެސްދިން "ޚިދުމަތްތެރިން" ޕްރޮގްރާމްގައި ވާހަކަދައްކަވަމުންނެވެ. މި ރޯޑްޝޯ ބާއްވާނީ މެދު އިރުމަތީގެ ހުރިހާ ޤައުމުތައް ހިމެނޭގޮތަށް ކަމަށް އޭނާ ވިދާޅުވިއެވެ.

"ސައުދީ، ޤަތަރު، ދުބާއީ، އަދި ބަހްރެއިން ފަދަ ޤައުމުތައް މީގެ ތެރޭގައި ހިމެނޭނެ. ކުރިއަށް އޮތް އަހަރު އަޅުގަނޑުމެންނަށް ފެނިގެންދާނީ މެދު އިރުމައްޗަށް ފޯކަސްކޮށްގެން ރޯޑްޝޯތަކާއި މާކެޓިންގ ޙަރަކާތްތައް ކުރިއަށް ގެންދާ މަންޒަރު،" ޝިއުރީ ވިދާޅުވިއެވެ.

މިއަހަރުގެ ފުރަތަމަ 10 މަސްދުވަހުގެ ތެރޭގައި މެދު އިރުމަތައި މެދު އިރުމަތިން ރާއްޖެއަށް 67،224 ފަތުރުވެރިން ޒިޔާރަތްކޮށްފައިވާއިރު، އެމްއެމްޕީއާރުސީން މާކެޓިންގ ޙަރަކާތްތައް ކުރިއަށް ގެންދަނީ އެއިރަކު އެންމެ މުހިންމު މާކެޓްތަކަށް އަމާޒުކޮށްގެންނެވެ.

މިގޮތުން، އަހަރުގެ ކުރީކޮޅު އިންޑިއާއިން ރާއްޖެއަށް އައި ފަތުރުވެރިންގެ އަދަދު ދަށްވުމާ ގުޅިގެން، އެމްއެމްޕީއާރުސީން ވަނީ އިންޑިއާގައި "ވެލްކަމް އިންޑިއާ" ގެ ނަމުގައި ބޮޑު ރޯޑްޝޯއެއް ބާއްވާފައެވެ. މި ރޯޑްޝޯ ބޭއްވުނީ އިންޑިއާގެ އެންމެ ބޮޑު 3 ސިޓީގައެވެ. މި ރޯޑްޝޯއަށްފަހު އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެފައިވާކަމަށް އެމްއެމްޕީއާރުސީން ވަނީ ފާހަގަކޮށްފައެވެ.