އަންހެން ވިޔަފާރިވެރިން ބާރުވެރިކުރުވުމަށް ޑިޖިޓަލް ޓްރާންސްފޮމޭޝަން ޕްރޮގްރާމެއް ފަށައިފި

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އިސްނެގުމުގެ މަތިން، ޔޫ.އެން އެސްކޭޕްގެ އޭޝިއަން އެންޑް ޕެސިފިކް ޓްރެއިނިންގް ސެންޓަރ ފޮރ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ފޮރ ޑިވެލޮޕްމަންޓް (އޭޕީސީއައިސީޓީ) އާއި ގުޅިގެން ދިވެހިރާއްޖޭގައި "އެމްޕަވަރިންގް ވިމެން އެންޓަޕްރެނަރސް ތްރޫ ޑިޖިޓަލް ޓްރާންސްފޮމޭޝަން" ގެ ނަމުގައި ތަމްރީން ޕްރޮގްރާމެއް މިއަދު ފަށައިފިއެވެ.

މި ޕްރޮގްރާމްގެ އިފްތިތާޙީ ރަސްމިއްޔާތު ޝަރަފުވެރިކޮށްދެއްވާފައިވަނީ ރައީސުލްޖުމްހޫރިއްޔާގެ ނައިބުގެ އަނބިކަނބަލުން މެޑަމް ޢައިޝަތު އަފްރީން މުޙައްމަދެވެ. މީގެ އިތުރުން، އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމްވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.

އޭޕީސީއައިސީޓީގެ ވިމެން އައިސީޓީ ފްރޮންޓިއަރ އިނީޝިއޭޓިވްގެ ދަށުން ކުރިއަށްގެންދާ މި ޕްރޮގްރާމް އަމާޒުކުރެވިފައިވަނީ އަންހެން ވިޔަފާރިވެރިންނަށެވެ. މި ޕްރޮގްރާމް ކުރިއަށްދާނީ ޑިސެމްބަރު 14 އިން 16 އަށް، ތިން ދުވަހުގެ މުއްދަތަށެވެ. ސެޝަންތައް ނަގައިދޭނީ އިނގިރޭސި ބަހުން، އޭޕީސީއައިސީޓީގެ ފަންނީ މާހިރުންނެވެ. ޕްރޮގްރާމް ފުރިހަމަކުރާ ބައިވެރިންނަށް ސެޓްފިކެޓް ދެވޭނެއެވެ.

މި ކޯހުގެ މައިގަނޑު މަޤްޞަދަކީ އަންހެން ވިޔަފާރިވެރިންގެ މާލީ ހުނަރާއި ތަޙްލީލުކުރުމުގެ ޤާބިލުކަން އިތުރުކޮށްދިނުމެވެ. މީގެ ސަބަބުން އެ ފަރާތްތަކަށް އެމީހުންގެ މާލީ ޙާލަތު ވަޒަންކުރުމާއި މަޢުލޫމާތު އެކަށީގެންވާ ގޮތެއްގައި މާނަކުރުމުގެ ބާރު ލިބިގެންދާނެއެވެ. އަދި ވިޔަފާރި ދެމެހެއްޓުމުގެ ރޭވުންތެރިކަން އިތުރުވެ، ވިޔަފާރީގައި ދިމާވާ ހުރަސްތަކާއި ކުއްލި ޙާލަތްތައް މެނޭޖްކުރުމަށް ބޭނުންވާ ޢިލްމާއި ހުނަރު ލިބިގެންދާނެއެވެ.

މި ޕްރޮގްރާމްގެ ތެރެއިން، ޕްރޮފިޓް އެންޑް ލޮސް ސްޓޭޓްމަންޓްތައް ހެދުމާއި، ޕްރޮފިޓް އިތުރުކުރާނެ ގޮތްތަކާއި، ޕްރޮފިޓް މާޖިންސް، ވޭރިއަބަލް ކޮސްޓްސް އަދި ވިޔަފާރިއެއްގައި ހަދާނެ ޕްރޮފިޓް ލޮސް އެނެލިސިސް ސްމާޓް ވަސީލަތްތައް ބޭނުންކޮށްގެން ހަދާނެ ގޮތުގެ މަޢުލޫމާތު ލިބިދެވޭނެއެވެ.

މި  ޕްރޮގްރާމުން ނެރެން ބޭނުންވާ ނަތީޖާއަކީ އިޤްތިޞާދީގޮތުން ބާރުވެރިވެފައިވާ އަންހެނުން އިތުރުވެ، އެ ފަރާތްތަކުގެ ވިޔަފާރި ކުރިއަރުވަން ބާރު ލިބި، ފުޅާވެގެން ދިއުމެވެ. އަދި ވިޔަފާރީގައި އަންހެނުންނަށް ދިމާވާ ހުރަސްތައް ގިރާކޮށް ކުރިއަށްދާ އަންހެނުންތަކެއް އުފެއްދުމެވެ.