އަންހެނުންގެ އިޤްތިޞާދީ ބާރުވެރިކަން އިތުރުކުރުމަކީ ދިވެހި ސަރުކާރުގެ އެންމެއިސް އެއްއަމާޒު - ވަޒީރު ޢައިޝަތު ޝިހާމް

އަންހެނުންގެ އިޤްތިޞާދީ ބާރުވެރިކަން އިތުރުކުރުމަށް އަމާޒުކޮށްގެން ބޭއްވޭ ފުރަތަމަ ވޯކްޝޮޕް މިއަދު ފެށިއްޖެއެވެ. މި ވޯކްޝޮޕް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. އާއިޝަތު ޝިހާމް ވިދާޅުވީ މިއަދަކީ މަސައްކަތުގެ ދާއިރާގައި އަންހެނުންނަށް ހަމަހަމަ އަދި އިންސާފުވެރި ފުރުޞަތުތައް ހޯދައިދިނުމަށް ކުރެވޭ މަސައްކަތުގައި ވަރަށް މުހިންމު ދުވަހެއް ކަމަށެވެ.

"އެމްޕަވަރިންގ ވިމެން އޮންޓްރެޕްރެނިއަރސް ތްރޫ ޑިޖިޓަލް ޓްރާންސްފޮމޭޝަން" ގެ ނަމުގައި ބޭއްވޭ މި ވޯކްޝޮޕްގެ މަޤްޞަދަކީ 100 އަންހެން ވިޔަފާރިވެރިން ޑިޖިޓަލް ވަސީލަތްތަކުގެ ބޭނުން ހިފައި އެ ބޭފުޅުންގެ ވިޔަފާރިތައް ބަދަލުކުރުމަށް ބާރުވެރިކުރުވުން ކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ އަންހެނުންގެ އިޤްތިޞާދީ ބާރުވެރިކަން އިތުރުކުރުމަކީ ދިވެހި ސަރުކާރުގެ އެންމެ އިސް އަމާޒުތަކުގެ ތެރޭގައި ހިމެނޭ ކަމެއް ކަމަށެވެ. މިގޮތުން، އަންހެނުން ހިންގާ ސްޓާޓްއަޕްތަކާއި ވިޔަފާރިތަކަށް ޚާއްޞަކޮށްގެން 100 މިލިއަން ރުފިޔާގެ ލޯނު ދޫކުރުމަށް ސަރުކާރުން ވަނީ ކަނޑައަޅާފައިވާ ކަމަށާއި، މީގެ % 25 ނުކުޅެދުންތެރިކަން ހުންނަ އަންހެނުންނަށް ޚާއްޞަކުރެވިފައިވާ ކަމަށް ވަޒީރު ފާހަގަކުރެއްވިއެވެ.

މި ވޯކްޝޮޕް އިންތިޒާމްކޮށްފައިވަނީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ، އޭޝިއަން އެންޑް ޕެސިފިކް ޓްރެއިނިންގ ސެންޓަރ ފޯ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ފޯ ޑިވެލޮޕްމަންޓް (އޭޕީސީއައިސީޓީ) އަދި ބިޒްނަސް ސެންޓަރ ކޯޕަރޭޝަން (ބީ.ސީ.ސީ) އާ ގުޅިގެންނެވެ.

ވަޒީރު ވިދާޅުވީ މި ވޯކްޝޮޕަކީ ހަމައެކަނި ތަމްރީނުދިނުމަށްވުރެ ބޮޑު އެއްޗެއް ކަމަށާއި، އެއީ ޑިޖިޓަލް އިޤްތިޞާދުގެ ފުރުޞަތުތައް ހޯދުމަށް ބޭނުންވާ މަޢުލޫމާތާއި، ހުނަރާއި، އިތުބާރު އަންހެނުންނަށް ލިބިދިނުމާ ބެހޭ ކަމެއް ކަމަށެވެ. އަދި އަންހެނުން ބާރުވެރިކުރުވުމަކީ ދިވެހިރާއްޖޭގެ އިތުރަށް ޝާމިލުވާ، އުޖާލާ މުސްތަޤްބަލަކަށް ކުރެވޭ އިންވެސްޓްމަންޓެއް ކަމުގައި ވަޒީރު ފާހަގަކުރެއްވިއެވެ.