ޤާނޫނު އަސާސީގެ އިސްލާހާއެކު މެންބަރުންނަށް ރައްޔިތުންގެ އިތުބާރު އިތުރުވަމުންދޭ: މެންބަރު ޝާހިދު

ރައްޔިތުންގެ މަޖިލީހުގެ ދެވަނަ ދައުރުގެ މަސައްކަތް ނިމުމާ ގުޅިގެން، ޤާނޫނު އަސާސީއަށް ގެނެވުނު އިސްލާހުތަކާ ގުޅޭގޮތުން ހުޅުދޫ ދާއިރާގެ މެންބަރު މުޙައްމަދު ޝާހިދު ވަނީ މުހިންމު ވާހަކަތަކެއް ދައްކަވާފައެވެ. ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން މެންބަރު ޝާހިދު ވިދާޅުވީ، މި އިސްލާހުތަކާއެކު މެންބަރުންނަށް ރައްޔިތުންގެ އިތުބާރާއި ޔަޤީންކަން ލިބެމުންދާ ކަމަށެވެ.

ނިމިދިޔަ ދައުރުގައި ޤާނޫނު އަސާސީއަށް 5 އިސްލާހެއް ގެނެވުނު ކަމަށް ފާހަގަކުރައްވަމުން، އިދިކޮޅުން މި އިސްލާހުތަކާ ގުޅޭގޮތުން ރައްޔިތުންނަށް އޮޅުވާލަމުންދާ ކަމަށް މެންބަރު ޝާހިދު ފާހަގަކުރެއްވިއެވެ. މެންބަރުން ޕާޓީ ބަދަލުކުރުމާ ގުޅޭގޮތުން ވާހަކަދައްކަވަމުން، މެންބަރު ޝާހިދު ވިދާޅުވީ މިއީ ޤާނޫނު އަސާސީން ބާރުލިބެންޖެހޭ ންޖެހޭ ކަމެއްގެ ގޮތުގައި ދެކެވަޑައިގަންނަވާ ކަމަށެވެ.

"އަޅުގަނޑުމެން ބޭނުން އެބަވޭ އަޅުގަނޑުމެން ހޮވިގެން އައި ޕާޓީގެ މެންބަރެއްގެ ގޮތުގައި ތިބެ ދައުރު ހަމަވާން. އެ ޔަޤީންކަންވެސް އަޅުގަނޑުމެންނަށް އޮންނަން އެބަޖެހޭ," މެންބަރު ޝާހިދު ވިދާޅުވިއެވެ.

ޕީއެންސީގެ އެތެރޭގައި ޚިޔާލު ތަފާތުވުންތައް ހުރި ނަމަވެސް، މަޝްވަރާކޮށްގެން ކުރިއަށްދާ ކަމަށް މެންބަރު ޝާހިދު ވިދާޅުވިއެވެ. އަދި ރައީސުލްޖުމްހޫރިއްޔާ އާއި ޕާޓީ ލީޑަރޝިޕުންވެސް މިކަމަށް ފުރުޞަތު ދެއްވާ ކަމަށް ފާހަގަކުރެއްވިއެވެ.

މެންބަރު ޝާހިދު އިތުރަށް ވިދާޅުވީ، ޤާނޫނު އަސާސީއަށް ގެނެވުނު މި އިސްލާހުތަކަކީ ހަޤީޤީ މާނައިގައި ރައްޔިތުންނަށް ބާރުލިބިގެންދިޔަ އިސްލާހުތަކެއް ކަމަށެވެ. އިޤްތިޞާދީ ސަރަހައްދު ކަނޑައެޅުމާއި މިނިވަންކަމާއި އިސްތިޤްލާލު ހިމާޔަތް ކުރުމަށް މި އިސްލާހުތަކުގެ މުހިންމުކަން މެންބަރު ޝާހިދު ފާހަގަކުރެއްވިއެވެ.