ޓެކްސީ ޑްރައިވަރުންގެ މުޒާހަރާގައި ބައިވެރިވި ފަރާތެއް ހައްޔަރުކޮށްފި

މިދިޔަ ބުދަ ދުވަހުގެ ރޭ ބައެއް ޓެކްސީ ޑްރައިވަރުން ކުރިއަށް ގެންދިޔަ މުޒާހަރާގައި އާންމު ދަތުރުފަތުރަށް ހުރަސް އަޅައި މަގު ބްލޮކް ކޮށް ފުލުހުންގެ ދައުރު އަދާކުރުމަށް ހުރަސް އެޅި މައްސަލައާ ގުޅިގެން، މިއަދު ކޯޓު އަމުރެއްގެ ދަށުން މީހަކުވަނީ ހައްޔަރުކޮށްފައެވެ.

ފުލުހުން މަޢުލޫމާތު ދެއްވާފައިވާ ގޮތުގައި ހައްޔަރުކުރެވުނު ފަރާތަކީ މާލެ، މއ. ނަހީދީމަންޒިލް، މިޞްބާޙް ޝަރީފް (31 އަހަރު) އެވެ. މި މައްސަލައިގައި އިތުރު ފަރާތްތަކެއް ބައިވެރިވެފައިވޭތޯ ބަލައި، ފުލުހުން ދަނީ ތަޙުޤީޤު ކުރަމުންނެވެ.

ޑިސެމްބަރ 11 ވަނަ ދުވަހުގެ ރޭ ހިނގި މި ހާދިސާގައި، ބައެއް ޓެކްސީ ޑްރައިވަރުން މަގުމަތީގައި އެއްވެ، ދަތުރުވެރިންނަށާއި އާންމު ރައްޔިތުންނަށް ދަތިވާ ގޮތަށް މަގުތައް ބަންދުކޮށް، އަދި ފުލުހުންގެ މަސައްކަތަށް ހުރަސްއަޅާފައެވެ. މި ޢަމަލުތަކަކީ ޤާނޫނާ ޚިލާފު ކަންކަން ކަމަށްވާތީ، ފުލުހުން ވަނީ މައްސަލަ ސީރިއަސްކޮށް ބަލަމުން ގެންދާ ކަމަށް ބުނެފައެވެ.