އުނގޫފާރު ކައުންސިލްގެ އަމާޒަކީ އާމްދަނީ 4.2 މިލިޔަނަށް އިތުރުކުރުން

އުނގޫފާރު ކައުންސިލްގެ އާމްދަނީ އަހަރަކު 4.2 މިލިޔަން ރުފިޔާއަށް އިތުރުކުރުމަށް މަސައްކަތް ކުރަމުންދާ ކަމަށް އެ ކައުންސިލްގެ ރައީސް ޢަބްދުﷲ ރަޝީދު ވިދާޅުވެއްޖެއެވެ.

ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައި ޢަބްދުﷲ ރަޝީދު ވިދާޅުވީ، ކައުންސިލަށް އާމްދަނީ އިތުރުކުރެވެން އޮތް އެންމެ ފަސޭހަ ގޮތަކީ ބިން ކުއްޔަށް ދޫކުރުން ކަމަށެވެ. މިހާތަނަށް 10 ބިމެއް ކުއްޔަށް ދޫކޮށްފައިވާ ކަމަށާއި، މި ބިންތަކުން އަހަރަކު 2.4 މިލިޔަން ރުފިޔާގެ އާމްދަނީއެއް ލިބޭ ކަމަށް އޭނާ ވިދާޅުވިއެވެ.

އަންނަ އަހަރު އިތުރު ބިންތަކެއް ކުއްޔަށް ދީގެން އަހަރަކު ލިބޭ އާމްދަނީ 1.8 މިލިޔަން ރުފިޔާ އިތުރުކުރެވޭނެ ކަމަށް ރަޝީދު ވިދާޅުވިއެވެ. މީގެ އިތުރުން، ލޯކަލް ޓޫރިޒަމަށް ބިން ކުއްޔަށް ދޫކުރުމާއި، ކައުންސިލުން އިމާރާތްކޮށްގެން ތަންތަން ކުއްޔަށް ދޫކުރުމަށްވެސް ނިންމާފައިވާ ކަމަށް އޭނާ ހާމަކުރެއްވިއެވެ.

އުނގޫފާރާ 2 ކިލޯމީޓަރު ދުރުގައިވާ ރ. އުނގުލުގައި ސިނާޢީ މަސައްކަތްތައް ކުރުމަށް ނިންމާފައިވާ ކަމަށާއި، މި ރަށް ދެއްވުމަށް ސަރުކާރުގައި އެދިފައިވާ ކަމަށްވެސް ކައުންސިލްގެ ރައީސް ވިދާޅުވިއެވެ. އުނގުލުގައި ފައިބަރު، މަސްވެރިކަން އަދި ދަނޑުވެރިކަމުގެ މަސައްކަތްތައް ކުރެވޭނެ ކަމަށާއި، މިކަމުން ރައްޔިތުން ބާރުވެރިކޮށް، ކައުންސިލަށް ލިބޭ އާމްދަނީ ބޮޑުތަނުން އިތުރުކުރެވޭނެ ކަމަށް އޭނާ ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކައުންސިލްތައް ބާރުވެރިކުރުވައި، އާމްދަނީ އިތުރުކުރުމަށް މަގުފަހިކޮށްދިނުމަށް ގިނަ މަސައްކަތްތަކެއް ކުރައްވަމުންދާ ކަމަށް ފާހަގަކުރެވެއެވެ. މީގެ ތެރޭގައި ކައުންސިލްތަކުގެ އިޚްތިޞާޞުން ބޭރުން ފަޅު ރަށްރަށް އިޤްތިޞާދީ މަސައްކަތްތަކަށް ދޫކުރުން ހިމެނެއެވެ. މި ނިންމުމުގެ ސަބަބުން ކައުންސިލްތަކުގެ އާމްދަނީ އިތުރުކުރުމަށް އިތުރު ފުރުޞަތުތަކެއް ހުޅުވިގެން ގޮސްފައިވެއެވެ.