ޚަބަރު
އަލިފާނުގެ ޙާދިޘާއިން ގެއްލުންލިބުނު ޢިމާރާތުގެ ބިން ސާފުކުރުމުގެ މަސައްކަތް ފަށައިފި
އަލިފާނުގެ ޙާދިޘާގައި ގެއްލުންލިބުނު ޢިމާރާތް ފޮޓޯ:ވުޒާރާ
ބުރާސްފަތި ދުވަހު ހިނގި އަލިފާނުގެ ޙާދިޘާގައި ގެއްލުންލިބުނު ޢިމާރާތުގައި ހުރި ކުނިތައް ނަގައި އެބިން ސާފުކުރުމުގެ މަސައްކަތް މިއަދު ފަށައިފިއެވެ. މި މަސައްކަތް ކުރަމުން ދަނީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގެ ޕަބްލިކް ވާރކްސްގެ މުވައްޒަފުންނެވެ.
ސާފުކުރުމުގެ މަސައްކަތްތައް ކުރިއަށްދާގޮތާ ގުޅޭގޮތުން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ސިޓީތަކާއި އިދާރީ ދާއިރާތައްހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެފައިވަނީ، އަލިފާނުގެ ހާދިސާ ހިނގި ސަރަހައްދުގައި ހުރި ކުނިތައް ނަގައި، ބިން ސާފުކުރުމުގެ މަސައްކަތް ފަށާފައިވާ ކަމަށެވެ. އަދި މިހާރު ބަންދުކޮށްފައިވާ އަމީނީ މަގުގެ ބަންދުކޮށްފައިވާ ސަރަޙައްދު މާދަމާ ހުޅުވާލެވޭނެކަމަށް ލަފާކުރެވޭ ކަމަށްވެސް ވަޒީރު ވިދާޅުވިއެވެ.
ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ ހިންގާ އިމާރާތުގައި ބުރާސްފަތި ދުވަހު ހިނގި އަލިފާނުގެ ހާދިސާގައި އެ ވުޒާރާއާއި އެ އިމާރާތުގައި ހިންގަމުން އަންނަ އިމާރާތްކުރުމާއި ބިނާވެށްޓާބެހޭ ވުޒާރާ ވަނީ ބޭނުންނުކުރެވޭ ވަރަށް އަނދާފައެވެ. މީގެ އިތުރުން، އެ އިމާރާތާއި އިންވެގެން ހުންނަ ގްރީން ބިލްޑިންގައި ހިންގަމުން އަންނަ މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއަށްވެސް ވަނީ އަލިފާނުގެ އަސަރުކޮށްފައެވެ.
މި ހާދިސާގެ ސަބަބުން ތިން ވުޒާރާގެ މަސައްކަތްތައްވެސް ވަނީ ހުއްޓިފައެވެ. ނަމަވެސް ވުޒާރާތަކުގެ މަސައްކަތްތައް އަލުން ފެށުމަށްޓަކައި، ތިން ވުޒާރާގެ މަސައްކަތްވެސް ދަރުބާރުގެއަށް ވަނީ ބަދަލުކޮށްފައެވެ.
ވަޒީރު އާދަމް ޝަރީފް އުމަރު މިއަދު ވަނީ އަލިފާނުގެ ޙާދިޘާގައި ގެއްލުންލިބުނު ޢިމާރާތް ރޫޅައި، ބިން ސާފުކުރުމަށް ކުރަމުންދާ މަސައްކަތްތައް ބައްލަވާލައްވާފައެވެ. މި މަސައްކަތްތައް އަވަހަށް ނިންމައި، އާންމު ރައްޔިތުންނަށް ދިމާވެފައިވާ ދަތިތައް ޙައްލުކުރުމަށް ސަރުކާރުން މަސައްކަތް ކުރަމުންދާކަން ފާހަގަކުރެވެއެވެ.
