ދުނިޔެ

އެމެރިކާއިން އަލުން އީރާނަށް ޙަމަލާދޭން ތައްޔާރުވަނީ: މެދުއިރުމަތީގެ މަސްރަޙު ނުރައްކާތެރި ފައްތަރެއްގައި

އެމެރިކާއިން އަލުން އީރާނަށް ޙަމަލާދޭން ތައްޔާރުވަނީ: މެދުއިރުމަތީގެ މަސްރަޙު ނުރައްކާތެރި ފައްތަރެއްގައި

އެމެރިކާގެ ނޭވީ ބޯޓެއް

ޙަސްނާ އަޙްމަދް

ޙަސްނާ އަޙްމަދް

16 ނޮވެމްބަރު 2026، 11:42

16 ނޮވެމްބަރު 2026، 11:42

އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަން އިންތިހާއަށް ގޯސްވެ، އެމެރިކާއާއި އިސްރާއީލު ގުޅިގެން އަލުން އީރާނަށް ޙަމަލާދިނުމުގެ ފުރުޞަތު ވަރަށް ބޮޑަށް އިތުރުވެއްޖެއެވެ. ސަރަޙައްދުގެ އަސްކަރީ ހަރަކާތްތައް ވަރުގަދަވަމުންދާއިރު، އެމެރިކާއިން ދަނީ އީރާނުގެ މުހިންމު އަމާޒުތަކަށް ޙަމަލާދިނުމަށް ޢަމަލީ ގޮތުން ތައްޔާރުވަމުންނެވެ.

މި ޙާލަތާ ގުޅިގެން އެމެރިކާއިން ވަނީ ތިންވަނަ މަތިންދާބޯޓު އުފުލާ މަނަވަރު، ޔޫއެސްއެސް ތިއޮޑޯ ރޫޒްވެލްޓް ޢަރަބި ކަނޑުގެ ސަރަޙައްދަށް ފޮނުވާފައެވެ. އަދި އީރާނުގެ ބަނދަރުތަކަށް ވަދެނިކުމެވޭ މަގުތައް ބަންދުކުރުމުގެ މަސައްކަތް އެމެރިކާގެ އަސްކަރިއްޔާއިން ފަށާފައިވާއިރު، އެމެރިކާއާއި އިސްރާއީލުގެ އޮފިޝަލުން ވަނީ އީރާނުގެ ހަކަތައާއި އިޤްޞާދީ މުހިންމު އުމްރާނީ ވަސީލަތްތަކަށް އަމާޒުކޮށް ޙަމަލާދިނުމުގެ ޕްލޭންތަކެއް އެކުލަވާލާފައެވެ.

މަސްރަޙު ގޯސްވި ސަބަބުތައް
މި ކުރިމަތިލުންތައް އިތުރަށް ގޯސްވެގެން ދިޔައީ ބަޙްރައިނުގައި ހުންނަ އެމެރިކާގެ އަސްކަރީ ރާޑަރު މަރުކަޒަކަށް އީރާނުން ދިން ޑްރޯން ޙަމަލާތަކަކާ ގުޅިގެންނެވެ. މީގެ އިތުރުން އީރާނުގެ ނިއުކްލިއާ މަރުކަޒުތައް ބަލައި ފާސްކުރުމުގެ ފުރުޞަތު ބައިނަލްއަޤްވާމީ އެޓޮމިކް ހަކަތައާ ބެހޭ އިދާރާ (IAEA) އަށް ނުލިބި ދިގުލައިގެން ދިއުމަކީ ވެސް ހުޅަނގުގެ ކަންބޮޑުވުން ބޮޑުވެފައިވާ މައިގަނޑު އެއް ސަބަބެވެ.

ރައްދުގައި އީރާނުން ވަނީ ހަރުކަށި އިންޒާރުތަކެއް ދީފައެވެ. އީރާނުގެ އިސް އޮފިޝަލުން ވިދާޅުވަމުންދަނީ އެމެރިކާއިން އިސްވެ ޙަމަލާއެއް ދެންދެން މަޑުން ނުތިބޭނެ ކަމަށާއި، ބޭނުންވެއްޖެ ޙާލަތެއްގައި އީރާނުން އިސްވެ ޙަމަލާދިނުމަކީ ވެސް އެކަށީގެންވާ ކަމެއް ކަމަށެވެ.

ދެފަރާތުގެ ދެމެދުގައި އަސްކަރީ ޖަދަލުތައް މިހާ މަތީ ދަރަޖައަކަށް ގޮސްފައިވާއިރު، ބައިނަލްއަޤްވާމީ މުޖުތަމަޢުން ކަންބޮޑުވަނީ މި ކުރިމަތިލުމުގެ ސަބަބުން މުޅި މެދުއިރުމައްޗަށް ބޮޑު ހަނގުރާމައެއް ފެތުރި، ބައިނަލްއަޤްވާމީ ތެލުގެ ބާޒާރަށާއި ކަނޑުދަތުރުފަތުރަށް ބޮޑެތި ލޮޅުންތަކެއް އަރައިގެން ހިނގައިދާނެތީއެވެ.

Ads by MSS

Ads by MSS

މި ލިޔުން ކިޔާލުމުން

ކިޔުންތެރިންގެ ހިޔާލު
450