ޚަބަރު
ސީއޭ މޯލްޑިވްސްގެ މަސައްކަތުން އިންވެސްޓަރުންގެ އިތުބާރު އިތުރުވާނެ: ޑީބީއެމްގެ ސީއީއޯ

(ޑީބީއެމް)ގެ ސީއީއޯ ނޮއެލް ގްރެގަރ ޕެޓަރސަން-ޖޯންސް ފޮޓޯ:ޕީއެސްއެމް
ރާއްޖޭގެ އިޤްތިޞާދަށް އިންވެސްޓަރުންގެ އިތުބާރު އިތުރުވެގެންދާނެކަމަށް ޑިވެލޮޕްމެންޓް ބޭންކު އޮފް މޯލްޑިވްސް (ޑީބީއެމް)ގެ ސީއީއޯ ނޮއެލް ގްރެގަރ ޕެޓަރސަން-ޖޯންސް ވިދާޅުވެއްޖެއެވެ. އެކައުންޓެންޓްސް އޮފް ދަ މޯލްޑިވްސް (ސީއޭ މޯލްޑިވްސް)އިން ކުރިއަށްގެންދާ މަސައްކަތްތަކުގެ ސަބަބުން މިކަން ވާނެކަމަށް އޭނާ ފާހަގަކުރެއްވިއެވެ.
ޕެޓަރސަން-ޖޯންސް މިހެން ވިދާޅުވެފައިވަނީ މިއަދު ފެށުނު "އައިއެފްއާރުއެސް އެންޑް އައިއެސްއޭ ފޯރަމް" ގެ ފެށުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. މި ފޯރަމަކީ ރާއްޖޭގައި ބާއްވާ އެކައުންޓިންގ ދާއިރާގެ އެންމެ ބޮޑު ފޯރަމެވެ.
ޕެޓަރސަން-ޖޯންސް ވިދާޅުވިގޮތުގައި، އޮޑިޓަރުންނާއި އޮޑިޓް ކުރެވިފައިވާ މާލީ ބަޔާންތަކުގެ ފެންވަރު ދެމެހެއްޓުމަށް ސީއޭ މޯލްޑިވްސްއިން ކުރާ މަސައްކަތްތަކުގެ ސަބަބުން ރާއްޖެއަށް އަންނަ އިންވެސްޓަރުންގެ އިތުބާރު އިތުރުވާނެއެވެ. ޚާއްޞަކޮށް ފަތުރުވެރިކަމާއި މަސްވެރިކަމުގެ ސިނާޢަތް ފަދަ އިޤްތިޞާދުގައި މުހިންމު ދާއިރާތަކުގައި ސައްޙަ މާލީ ރިޕޯޓުތަކަކީ ބޭރުގެ އިންވެސްޓަރުންގެ އިތުބާރު އިތުރުވާނެ ކަމެއްކަމުގައި އޭނާ ފާހަގަކުރެއްވިއެވެ.
މި ފޯރަމް އޮންނާނީ މިމަހުގެ 14 އިން 15 އަށެވެ. މިއީ ސީއޭ މޯލްޑިވްސްއިން މި ފޯރަމް ބާއްވާ ތިންވަނަ އަހަރެވެ. މިއަހަރުގެ ފޯރަމްގައި 250 އެއްހާ މީހުން ބައިވެރިވެފައިވެއެވެ. މި ފޯރަމަކީ ދިވެހިރާއްޖޭގައި މަސައްކަތްކުރާ އެކައުންޓެންޓުންނާއި އޮޑިޓަރުންގެ މެދުގައި ޢިލްމު ހިއްސާކުރުމާއި، މަޝްވަރާ އުފެއްދުމާއި، ފަންނީ ތަޖުރިބާ އިތުރުކުރުމަށް މުހިންމު ފޯރަމެކެވެ.
ސީއޭ މޯލްޑިވްސްއަކީ ދިވެހިރާއްޖޭގެ އެކައުންޓެންސީ ޕްރޮފެޝަންއާ ގުޅޭ ކަންތައްތައް ބައިނަލްއަޤްވާމީ އުސޫލުތަކާއި ހަމަތަކާ އެއްގޮތްވާ ގޮތުގެމަތިން ތަންޒީމުކޮށް، ދިވެހިރާއްޖޭގައި އެކައުންޓަންސީ ޕްރޮފެޝަނެއް ޤާއިމުކޮށް، އެ ޕްރޮފެޝަން ކުރިއެރުވުމަށް މަގުވުމަށް މަގުފަހިކުރުމަށްޓަކައި، ރާއްޖޭގެ ޗާޓަޑް އެކައުންޓެންޓުގެ ޤާނޫނުގެ ދަށުން އުފައްދަވާފައިވާ އިންސްޓިޓިއުޓެކެވެ.