ސިޓީ ކައުންސިލްގެ ހަލާކުވި ޑިޕާޓްމަންޓްތަކަށް ދާއިމީ ހައްލެއް ގެނައުމަށް ރައީސުލްޖުމްހޫރިއްޔާ ނިންމަވައިފި: ނަރީޝް

މާލެ ސިޓީ ކައުންސިލްގެ އިމާރާތުގައި ހިނގި ހިތާމަވެރި އަލިފާނުގެ ހާދިސާގައި ބޭނުން ނުކުރެވޭ ވަރަށް ހަލާކުވެފައިވާ ކައުންސިލްގެ އެންމެ ބޮޑު ދެ ޑިޕާޓްމަންޓް ކަމަށްވާ ލޭންޑް އެންޑް ބިލްޑިންގ ޑިޕާޓްމަންޓާއި ވައިޓަލް އެންޑް ރެޖިސްޓްރޭޝަން ޑިޕާޓްމަންޓްގެ ހިންގުން ވަގުތީގޮތުން ކުރިއަށް ގެންދިއުމަށްޓަކައި ވަގުތީ އަދި  ދާއިމީ ހައްލެއް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މިކަން ހާމަކުރައްވާފައިވަނީ މާލެ ސިޓީ ކައުންސިލްގެ ޑެޕިއުޓީ މޭޔަރ އަޙްމަދު ނަރީޝް އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައެވެ. އޭނާ ވިދާޅުވި ގޮތުގައި ރައްޔިތުންނަށް ޚިދުމަތް ފޯރުކޮށްދިނުމަށްޓަކައި ވީ އެންމެ އަވަހަކަށް ކައުންސިލްގެ އާންމު ޚިދުމަތްތަކާ ބެހޭ ބައިގެ ގޯތި ތެރޭގައި ސަރުކާރުގެ ޚަރަދުގައި ވަގުތީ އިމާރާތެއް އެޅުމަށް ވަނީ ނިންމަވާފައެވެ.

މީގެ އިތުރުން، ދާއިމީ އޮފީހެއް ސަރުކާރުގެ އިމާރާތަކުން ހަމަޖެއްސުމަށްވެސް ރައީސުލްޖުމްހޫރިއްޔާ ވަނީ ނިންމަވާފައެވެ. ވަގުތީ އޮފީސް 2 ހަފްތާގެ ތެރޭގައި ނިންމުމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ، މިނިސްޓްރީ އޮފް ލޯކަލް ގަވަރމަންޓް އެންޑް ޕަބްލިކް ވޯކްސް އަދި މާލެ ސިޓީ ކައުންސިލް ގުޅިގެން މަސައްކަތް ކުރުމަށް ރައީސުލްޖުމްހޫރިއްޔާ އިރުޝާދު ދެއްވާފައިވާ ކަމަށް ޑެޕިއުޓީ މޭޔަރ ނަރީޝް ވިދާޅުވިއެވެ.

މި ނިންމެވުމާ ގުޅިގެން، މާލެ ސިޓީ ކައުންސިލްގެ މޭޔަރާއި ކައުންސިލް މެންބަރުންނާއި ކައުންސިލްގެ ވެރިންނާއި މުވައްޒަފުންގެ ނަމުގައި ރައީސުލްޖުމްހޫރިއްޔާއަށް ނުހަނު އިޚްލާޞްތެރިކަމާއެކު ޝުކުރު ދަންނަވާފައިވާ ކަމަށްވެސް ޑެޕިއުޓީ މޭޔަރ ނަރީޝް ފާހަގަކުރެއްވިއެވެ.

ބުރާސްފަތި ދުވަހު ހިނގާދިޔަ ހިތާމަވެރި ހާދިސާގައި ބޭނުން ނުުކުރެވޭ ވަރަށް ހަލާކުވެފައިވާ މާލެ ސިޓީ ކައުންސިލްގެ އެންމެ ބޮޑު ދެ ޑިޕާރޓްމަންޓް ކަމަށްވާ ލޭންޑް އެންޑް ބިލްޑިންގ ޑިޕާރޓްމަންޓާއި ވައިޓަލް އެންޑް ރެޖިސްޓްރޭޝަން ޑިޕާރޓްމަންޓުގެ ހިންގުން ވަގުތީގޮތުން ހިންގުމަށް ކައުންސިލް…

— Ahmed Narysh (@ahmed_narysh) December 14, 2024

ބުރާސްފަތި ދުވަހު ހިނގި މި ހިތާމަވެރި ހާދިސާއަކީ މާލެ ސިޓީގެ ރައްޔިތުންނަށް ދެމުން އައި ގިނަ ޚިދުމަތްތަކެއް ވަގުތީގޮތުން މެދުކެނޑުމަށް މަޖުބޫރުވި ހާދިސާއެކެވެ. ނަމަވެސް، މި އަވަސް ފިޔަވަޅުތަކާއެކު ރައްޔިތުންނަށް ދެމުން އައި ޚިދުމަތްތައް އަލުން ފެށޭނެކަމަށް އުންމީދު ކުރެވެއެވެ.