ރޮނާލްޑޯގެ ދަރިފުޅު "އިންޝާﷲ" ބުނުމުން ގިނަބައެއްގެ ސަމާލުކަން

ދުނިޔޭގެ އެންމެ މަޝްހޫރު ފުޓްބޯޅަ ތަރިންގެ ތެރެއިން އެކަކު ކަމަށްވާ ކްރިސްޓިއާނޯ ރޮނާލްޑޯ އާއި މަޝްހޫރު ޔޫޓިއުބަރ "މިސްޓަރ ބީސްޓް" އާ ދެމެދު ހިނގި ސުވާލު ޖަވާބެއްގެ ތެރެއިން ބައެއް މިހާރު ވަނީ އިޖުތިމާއީ ވިއުގަތަކުގައި ވައިރަލްވެފައެވެ.

ރޮނާލްޑޯ އޭނާގެ ޔޫޓިއުބް ޗެނަލްގައި އަޕްލޯޑްކުރި މި ވީޑިއޯގައި އޭނާގެ ދަރިފުޅު ކްރިސްޓިއާނޯ ރޮނާލްޑޯ ޖޫނިއަރ އާ ސުވާލެއް ކުރުމަށް މިސްޓަރ ބީސްޓަށް ފުރުސަތު ދިނެވެ. މިގޮތުން މިސްޓަރ ބީސްޓް އޭނާއާ ސުވާލު ކުރީ ބްރޮނީ ޖޭމްސް ފަދައިން އޭނާގެ ބައްޕައާއެކު ކުޅެން ބޭނުންތޯއެވެ. މިއަށް ޖަވާބު ދެމުން ޖޫނިއަރ ބުނީ "އިންޝާﷲ" އެވެ.

14 އަހަރުގެ ރޮނާލްޑޯ ޖޫނިއަރ މިހާރު ކުޅެމުންދަނީ އޭނާގެ ބައްޕަ ކުޅޭ ސައުދީ އަރަބިއްޔާގެ އަލް-ނަސްރު ކްލަބުގެ ޒުވާނުންގެ ޓީމުގައެވެ. މި ވީޑިއޯ އިޖުތިމާއީ ވިއުގަތަކުގައި ވައިރަލްވުމާ ގުޅިގެން ގިނަ ބަޔަކު ސުވާލު އުފައްދަމުންދަނީ ރޮނާލްޑޯގެ ދަރިފުޅަކީ މުސްލިމެއްތޯ ނުވަތަ ސައުދީ އަރަބިއްޔާގެ ވެރިރަށް ރިޔާދުގައި ދިރިއުޅެމުންދާތީ އެ ޤައުމުގެ ސަގާފަތުގެ ބައެއް ކަންކަން ބޭނުންކުރަމުންދަނީތޯއެވެ.

ރޮނާލްޑޯ އަމިއްލައަށް މިކަމާ ގުޅޭގޮތުން ބުނެފައިވަނީ އެއްދުވަހަކުން އޭނާގެ ދަރިފުޅާއެކު ކުޅެން ލިބޭނެ ކަމަށް އުންމީދުކުރާ ކަމަށެވެ. ރޮނާލްޑޯ އާއި އޭނާގެ ދަރިފުޅާ ދެމެދު 25 އަހަރުގެ ތަފާތު އެބަހުއްޓެވެ.