އަލިފާނުގެ ހާދިސާގެ ތަޙްޤީޤަށް ބޭރުގެ ޚާއްޞަ ޓީމެއްގެ އެހީތެރިކަން ހޯދަނީ

ބުރާސްފަތި ދުވަހު މާލޭގައި ހިނގި އަލިފާނުގެ ބޮޑު ހާދިސާގެ ފުރިހަމަ ތަޙްޤީޤެއް ކުރުމަށް ރާއްޖެއިން ބޭރުގެ ޚާއްޞަ ޓީމެއްގެ އެހީތެރިކަން ހޯދާނެ ކަމަށް ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވެއްޖެއެވެ.

އަލިފާނުގެ ހާދިސާއާ ގުޅިގެން  ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް ޝުޖާޢު ވިދާޅުވީ، މި ހާދިސާގެ ފުރިހަމަ ތަޙްޤީޤެއް ހިންގުމަށް ނިންމާފައިވާ ކަމަށާއި، އެ ތަޙްޤީޤު ކުރިއަށް ގެންދިއުމަށްޓަކައި ރާއްޖެއިން ބޭރުގެ ޓީމެއްގެ އެހީތެރިކަން ހޯދަން ނިންމާފައިވާ ކަމަށެވެ.

ކޮމިޝަނަރ ޝުޖާޢު އިތުރަށް ވިދާޅުވީ، ކުރިއަށް އޮތް ދެތިން ދުވަހުގެ ތެރޭގައި ބޭރުގެ އެ ޓީމަށް ދިވެހި ފުލުހުންގެ ތަޙްޤީޤީ ޓީމާއެކު މަސައްކަތުގައި ބައިވެރިވެވޭނެ އިންތިޒާމު ހަމަޖެއްސުމަށްޓަކައި ސަރުކާރުގެ ތެރެއިން ކުރަންޖެހޭ ކަންކަން ކުރަމުންދާ ކަމަށެވެ. އަދި ބޭރުގެ ތަޙްޤީޤީ ޓީމާއެކު ކުރެވޭ މަސައްކަތުން ހާދިސާ ހިނގައިދިޔަ ގޮތް ދެނެގަނެވޭނެ ކަމުގެ ޔަޤީންކަން އެބައޮތް ކަމަށް އޭނާ ވިދާޅުވިއެވެ.

"ބޭނުމަކީ މިވަރުގެ ބޮޑު އަލިފާނުގެ ހާދިސާއެއް ހިނގި ގޮތް ރައްޔިތުންނަށްވެސް އެނގެން ބޭނުންވާނެ. އަދި އެއާއެއްކޮށް ކުރިއަށް އޮތް ތަނުގައި މިފަދަ ހާދިސާތަކުން ރައްކާތެރިވުމަށްޓަކައިވެސް މިގޮތަށް ހިންގޭ ތަޙްޤީޤުތަކުން ލިބޭ މަޢުލޫމާތަކީ މުހިންމު މަޢުލޫމާތަކަށް ވާނެތީ،" ކޮމިޝަނަރ އޮފް ޕޮލިސް ވިދާޅުވިއެވެ.

ދިވެހި ފުލުހުންގެ ފަރާތުން މިހާރުވެސް އެ ހާދިސާގެ ތަޙްޤީޤު އަންނަނީ ކުރަމުންނެވެ. އެކަމާ ގުޅޭގޮތުން ސީޕީ ވިދާޅުވީ އަލިފާނުގެ ހާދިސާ ހިނގި ސަރަޙައްދުގައި ފޮރެންސިކް ޓީމުތަކުން ހަރަކާތްތެރިވަމުން އަންނަ ކަމަށާއި، މުހިންމު ސާމްޕަލްތައް ނެގުމާއި ތަނުގެ ވަށައިގެން ހުރި ސީސީޓީވީ ފުޓޭޖްތައް ތަޙްލީލުކުރުމުގެ މަސައްކަތްތައްވެސް ކުރިއަށްދާ ކަމަށެވެ.

މީގެއިތުރުން، މި ހާދިސާއާ ގުޅިގެން އެންމެ ފުރަތަމަ މަންޒަރު ދުށް މީހުންގެ ބަޔާންތައް ނެގުމުގެ މަސައްކަތާއި ހާދިސާގެ މަޢުލޫމާތު އެންމެ ފުރަތަމަ ލިބޭނެ ކަމަށް ޤަބޫލުކުރެވޭ މީހުންނާ ސުވާލުކުރުމުގެ މަސައްކަތްވެސް ކުރިއަށްދާ ކަމަށް ސީޕީ ޝުޖާޢު ވިދާޅުވިއެވެ.

އަދި ސީޕީ ވަނީ އެ ހާދިސާއާ ގުޅޭ އިތުރު މަޢުލޫމާތެއް ލިބިފައިވާނަމަ ހިއްސާ ކުރުމަށް އެދިވަޑައިގެން، އެކަމަށް ފަސޭހަ ނިޒާމެއް ހަމަޖައްސަވާނެ ކަމަށް ވިދާޅުވެފައެވެ.