ޚަބަރު
ރާއްޖެއާއި ޕާކިސްތާނާ ދެމެދު ވިޔަފާރިއާއި އިޤްތިޞާދީ ގުޅުން ބަދަހިކުރަން މަޝްވަރާކޮށްފި
ރާއްޖެއާއި ޕާކިސްތާނާ ދެމެދު ވިޔަފާރިއާއި އިޤްތިޞާދީ ގުޅުން ބަދަހިކުރަން މަޝްވަރާކުރުން. ފޮޓޯ: އިގްތިސާދީ ވުޒާރާ
ދިވެހިރާއްޖެއާއި ޕާކިސްތާނާ ދެމެދު އޮތް ވިޔަފާރީގެ ގުޅުން އިތުރަށް ބަދަހިކޮށް، އިޤްތިޞާދީ ދާއިރާއިން އެއްބާރުލުން ފުޅާކުރުމާ ގުޅޭގޮތުން މަޝްވަރާތަކެއް ބާއްވައިފިއެވެ.
މި މަޝްވަރާތައް ކުރިއަށްދިޔައީ އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު، ޕާކިސްތާނުގެ ފެޑެރަލް މިނިސްޓަރ އޮފް ކޮމާސް ޖާމް ކަމާލް ޚާން އަދި ފެޑެރަލް މިނިސްޓަރ އޮފް މެރިޓައިމް އެފެއާޒް މުޙައްމަދު ޖުނައިދު އަންވަރު ޗައުދަރީއާއެކު އިއްޔެ އޮންލައިންކޮށް ބޭއްވެވި ބައްދަލުވުމުގައެވެ.
މި ބައްދަލުވުމާ ގުޅޭގޮތުން ވަޒީރު މުޙައްމަދު ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވީ، އިއްޔެ ހެނދުނު ބޭއްވުނު މި ބައްދަލުވުމަކީ މިދާއިރައިން ރަނގަޅު ނަތީޖާއެއް ނެރެވޭ ފަދަ ބައްދަލުވުމެއް ކަމަށެވެ. އަދި ދެ ޤައުމުގެ ދެމެދުގައި ވިޔަފާރީގެ ގުޅުން ބަދަހިކުރުމަށާއި، އިޤްތިޞާދީ ގުޅުންތައް ފުޅާކުރުމަށް ލިބިފައިވާ ފުރުޞަތުތަކުގެ ބޭނުން ފުރިހަމައަށް ހިފުމާއި ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނުކަން ވަޒީރު ފާހަގަކުރެއްވިއެވެ.
Minister @em_saeed met Pakistan’s Federal Minister for Commerce, Jam Kamal Khan, and Federal Minister for Maritime Affairs, Muhammad Junaid Anwar Chaudhry. Also present were Shimad Ibrahim, CEO and Managing Director of STO, and Captain Hussain Shafeeq, CEO and Managing Director of Maldives Ports Limited. The meeting focused on strengthening trade and economic cooperation between the Maldives and Pakistan and on further deepening bilateral ties. @mincompk @MaritimeGovPK @stoplc @portmv
— Ministry of Economic Development,Transport & Trade (@MoEDmv) November 18, 2026
މި ބައްދަލުވުމުގައި އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ޝިމާދު އިބްރާހީމާއި، މޯލްޑިވްސް ޕޯޓްސް ލިމިޓެޑްގެ ސީއީއޯ އަދި މެނޭޖިންގ ޑިރެކްޓަރ ކެޕްޓަން ޙުސައިން ޝަފީޤު ވެސް ބައިވެރިވެވަޑައިގެންނެވިއެވެ.
ރާއްޖެ އާއި ޕާކިސްތާނާ ދެމެދު ހާރިޖީ ގުޅުން ގާއިމުކުރެވުނުތާ 60 އަހަރު ފުރުމުގެ މުނާސަބަތާ ދިމާކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ޕާކިސްތާނަށް ތިން ދުވަހުގެ ރަސްމީ ފުރަމާނަ ދަތުރުފުޅެއް ކުރައްވައިފައެވެ. އަދި ޕާކިސްތާނުގެ އިސްވެރިންނާއެކު ބޭއްވި ބައްދަލުކުރެއްވުމުގެ ތެރެއިން ދެ ގައުމަށް ފައިދާހުރި ދާއިރާތަކުން އެއްބާރުލުން އިތުރުކުރުމަށްވެސް މަޝްވަރާ ކުރެއްވިއެވެ.
ދިވެހިރާއްޖެއާއި ޕާކިސްތާނަކީ ޒަމާނުއްސުރެ ގާތް ގުޅުމެއް ދަމަހައްޓަމުން އަންނަ ދެ ޤައުމަށް ވާއިރު، އިޤްތިޞާދީ އަދި ވިޔަފާރީގެ ދާއިރާއިން ދެ ޤައުމުގެ ގުޅުން އިތުރު ހަރުފަތަކަށް ގެންދިއުމަށް ދަނީ މަސައްކަތް ކުރަމުންނެވެ.