ދުނިޔެ
ހަމަލާތަކަށް 435 ދުވަސް، މިއަދުވެސް އަނިޔާވެރިކަން ކުރިއަށް!
ޣައްޒާގެ ވެއްޓިފައިވާ ޢިމާރާތެއްގެ ކައިރި
އިޒްރާއިލުން ފަލަސްޠީނުގެ ނިކަމެތި ރައްޔިތުނަށް އަމާޒުކޮށް ދެމުންދާ ހަމަލާތަކަށް މިއަދަށް 435 ދުވަސް ވެފައިވާއިރު، މިއަދުވެސް އިޒްރާއިލުން ދަނީ ޣައްޒާގެ އެކި ހިސާބުތަކަށް ބާރުގަދަ ހަމަލާތައް ދެމުންނެވެ.
އެގޮތުން މިހާރު އިޒްރާއިލުން ދެމުންދާ ހަމަލާތައް އަމާޒުކޮށްފައިވަނީ ގެދޮރު ގެއްލި ޙާލުގައި ޖެހުމުގެ ސަބަބުން ޓެންޓު ތަކުގައި ދިިރިއުޅެމުންދާ މީހުންގެ ޓެންޓުތަކަށް އަމާަޒުކޮށްކަމަށް އަލްޖަޒީރާގައި ވަނީ ބުނެފައެވެެ.
އަލްޖަޒީރާގައި ބުނެފައިވަނީ ޣައްޒާ ސިޓީގެ އިރުއުތުރުގައި އޮންނަ ޖައްފާ ސްޓްރީޓްގައި ގެދޮރު ދޫކޮށްފައިވާ މީހުން ދިރިއުޅޭ ސްކޫލަކަށް އަމާޒުކޮށް ހަމަލާތަކެއް ދީފައިވާ ކަމަށެެވެ. މިހަމަލާގައި މީހަކު ޝަހީދުވިކަމުގެ ރިޕޯޓެއް އަދިއެއް ލިބިފައެއް ނުވެއެވެ.
މީގެ އިތުރުން ޚާން ޔޫނިސްގައި ގެދޮރު ގެއްލިފައިވާ މީހުން ދިރިއުޅޭ ޓެންޓަކަށް އަމާޒުކޮށް އިޒްރާއިލް ސިފައިން ދިން ހަމަލާއެއްގައި ފަލަސްޠީނުގެ 3 މީހަކު ޝަހީދުވެ އިތުރު ބަޔަކު ޒަޚަމްވެފައިވާކަމަަށެވެ. އަދި ޣައްޒާ ސިޓީގެ ހުޅަނގުން ގެދޮރު ގެއްލިފައިވާ މީހުން ދިރިއުޅޭ އަލް މަޖިދާ ވަސީލާ ސްކޫލަށް އިޒްރާއީލުން ދިން ހަމަލާއެއްގައި ފަލަސްޠީނުގެ 5 މީހަކު ޝަހީދުވެ، ގާތްގަނޑަކަށް 20 މީހަކު ޒަޚްމްވެފައިވާ ކަމަށް ވެސް އަލްޖަޒީރާގެ ނިއުސް ރިޕޯޓަރު ވަނީ މަޢުލޫމާތު ދީފައެވެ.
ފާއިތުވި ދެ މަސް ދުވަހުގެ ތެރޭގައި ހަރުކަށި ކަމާއި އެކު އިޒްރާއިލް ސިފައިން ވަށާލައިފައި އޮތް ޣައްޒާގެ އުތުރުގައި އިޒްރާއީލު ސިފައިން ވަނީ އެސަރަހައްދުގައި ހުންނަ ކަމަލް އަދުވްން ހޮސްޕިޓަލަށް އަމާޒުކޮށް ގިނަ ހަމަލާތަކެެއް ދީފައެވެ. މެޑިކަލް ޚިދުމަތްދޭ ތަންތަަނަށް އަމާޒުކޮށް އިޒްރާއިލުގެ ސިފައިން ދޭ ހަމަލާތަކުގެ ސަބަބުން ޣައްޒާގެ ގިނަ މެޑިކަލް ޚިދުމަތްދޭ ގިނަ ތަންތަން ވަނީ ޚިދުމަތް ނުދެވޭނެ ހެން އެއްކޮށްހެން ހަލާކުވެފައެވެ.
