ވޭޕްކުރުމާއި ވޭޕް ވިއްކުން މާދަމާއިން ފެށިގެން މަނާވާނެ

ރާއްޖޭގައި ވޭޕް ކުރުމާއި ވޭޕް ވިއްކުން އަދި ވޭޕް ގެންގުޅުން މާދަމާއިންް ފެށިގެން މަނާވާނެއެވެ.

މި ކަމަކީ ދުންފަތާ ބެހޭ ޤާނޫނަށް ގެނެވުނު ބަދަލުގެ ދަށުން އަންނަ ބަދަލެކެވެ. ދުންފަތް ކޮންޓްރޯލް ކުރުމާއި ބެހޭ ޤާނޫނަށް ގެނައި މިބަދަލުގެ ދަށުން ރާއްޖޭގައި ވޭޕް ބޭނުންކޮށް އެތަކެތީގެ ވިޔަފާރިކުރުން މަނާކޮށް، ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ކަނޑައެޅައިފައިވެއެވެ.

ދުންފަތް ކޮންޓްރޯލް ކުރުމާއި ބެހޭ ޤާނޫނަށް ހުށަހެޅި އިސްލާޙް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީޤު ކުރެއްްވީ މިދިޔަ މަހުގެ 13 ވަނަ ދުވަހެވެ.

މި ބިލް ރައީސް ތަސްދީޤު ކުރެއްވުމާއެކު ރާއްޖެއަށް ވޭޕް އާއި ވޭޕް ކުރުމަށް ބޭނުންވާ ތަކެތި އެތެރެ ކުރުން މިދިޔަ ނޮވެމްބަރު މަހުގެ 15 ވަނަ ދުވަހުން ފެށިގެން ވަނީ މަނާވެފައެވެ. އަދި ޑިސެމްބަރު މަހުގެ 15 ވަނަ ދުވަހުން ފެށިގެން ވޭޕް ވިއްކުމާއި ބޭނުން ކުރުން އަދި ގެންގުޅުންވެސް މަނާވެގެންދާނެއެެވެ. އަދި މި ޤާނޫނާ ޚިލާފުވެއްޖެ ނަމަ ބޮޑު ޖޫރުމަނާއެއް ދައްކަން ޖެހޭނެ ކަމަށް މިޤާނޫނުގައި މިހާރު ވަނީ ބަޔާންކޮށްފައެވެ. 

މި ޤާނޫނާއި ޚިލާފުވާ ފަރާތްތައް ޖޫރިމަނާ ކުރުމަށް ކަނޑައަޅައިފައިވާ ޢަދަދުތައް:-

• ވޭޕާއި ވޭޕް ކުރަން ބޭނުން ކުރާ ތަކެތި ރާއްޖެއަށް އެތެރެ ކޮށްފިނަމަ، އެތެރެ ކުރި މީހަކު 50،000 ރުފިޔާއިން ޖޫރިމަނާ.
•  އެތެރެ ކުރާ ކޮންމެ ވޭޕަކަށް އިތުރު 10،000 ރުފިޔާގެ މަގުން ޖޫރިމަނާ.
•  ރާއްޖޭގައި ވޭޕް ވިއްކާ ކޮންމެ މީހަކަށް 20،000 ރުފިޔާގެ ޖޫރިމަނާއެއް، އަދި ވިއްކި ކޮންމެ ވޭޕަކަށް 10،000 ރުފިޔާގެ މަގުން ޖޫރިމަނާ.
•  ހިލޭ މީހަކަށް ވޭޕެއް ދީފިނަމަ 10،000 ރުފިޔާގެ ޖޫރިމަނާ.
• ވޭޕް ބޭނުން ކުރާ މީހަކު 5،000 ރުފިޔާއިން ޖޫރިމަނާ.