ކުޅިވަރު
ގޯލްޑް ކަޕް: ދިއްދޫ ރޮއްވާލުމަށްފަހު އޭދަފުށިން ކުއާޓާއަށް

އޭދަފުއްޓަށް މުހިންމު ދެ ގޯލު ކާމިޔާބުކޮށްދިން މުހައްމަދު ފާސިރު--- ފޮޓޯ: ސިޑިބަރި
ހުލާސާ
މެޗަށް ނިކުތް އިރު ގްރޫޕްގެ އެއްވަނައިގައި އޮތް ދިއްދޫ ބަލިކޮށް، އެ ޓީމު ކޮޅަށް ގިނަ ގޯލުތަކެއް ޖެހުމަށްފަހު ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލަށް އޭދަފުށި ދަތުރުކޮށްފި.
މެޗަށް ނިކުތް އިރު ގްރޫޕްގެ އެއްވަނައިގައި އޮތް ދިއްދޫ ބަލިކޮށް، އެ ޓީމު ކޮޅަށް ގިނަ ގޯލުތަކެއް ޖެހުމަށްފަހު ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލަށް އޭދަފުށި ދަތުރުކޮށްފިއެވެ. މިއަދު ހަވީރު ގަލޮޅު ދަނޑުގައި ކުޅުނު މި މެޗު އޭދަފުށިން ކާމިޔާބުކޮށްފައިވަނީ 4-1 އިންނެވެ.
މިއަދުގެ މެޗަށް ނިކުތް އިރު، ގްރޫޕް ފޭސް-2ގެ ގްރޫޕް-އެފްގެ އެއްވަނައިގައި 3 ޕޮއިންޓާއި ފައިދާ 2 ގޯލާއެކު އޮތީ ދިއްދޫއެވެ. އަދި ދެވަނައިގައި އޮތް މާފުއްޓަށް 3 ޕޮއިންޓު ލިބިފައިވީ ނަމަވެސް އެ ޓީމަށް އެއްވެސް ފައިދާ ގޯލެއް ނެތުމުން، ދެވަނައިގައި އޮތީ އެ ޓީމެވެ. އަދި މި ބުރުގެ ފުރަތަމަ މެޗުގައި މާފުށި އަތުން 2-0 އިން ބަލިވުމުން، އޭދަފުށި އޮތީ ގްރޫޕްގެ އެންމެ ފުލުގައެވެ. އެހެންކަމުން ކުއާޓާ ފައިނަލުން ޖާގަ ހޯދުމަށް ދެ ގޯލުގެ ތަފާތުން އޭދަފުށި މޮޅުވާން މަޖުބޫރެވެ.
އެ އަޒުމުގައި ނިކުމެ އޭދަފުށިން ދެއްކީ މޮޅު ކުޅުމެކެވެ. މުޅި މެޗު ވެސް ކޮންޓްރޯލް ކޮށްފައިވަނި އެ ޓީމެވެ. އަދި މެޗުގެ 21 ވަނަ މިނެޓުގައި އެ ޓީމުން ދިއްދޫގެ ގޯލު ފޫއަޅުވާލިއެވެ. މި ގޯލު ކާމިޔާބުކޮށްދިނީ އޭދަފުށި ޓީމުގެ އަލީ ނަސީމްއެވެ.
އޭދަފުށިން ދެވަނަ ގޯލެއް ޖެހުމަށް ކުރަމުން ދިޔަ މަސައްކަތް ކާމިޔާބުވީ މެޗުގެ ގަޑިއިރެއް ކުޅެވުނު ފަހުންނެވެ. ދެވަނަ ހާފުގެ 20 ވަނަ މިނެޓުގައި މި ގޯލު ކާމިޔާބުކުރީ ޖައުޝަން މުހައްމަދެވެ.
އޭދަފުށިން އެ ޓީމުގެ 3 ވަނަ ގޯލު ކާމިޔާބުކުރީ މެޗު ނިމެން 5 މިނެޓަށް ވެފައި ވަނިކޮށް، ދިއްދޫގެ ކީޕަރު މޫސާ ރަޝީދު ކައިރިން ނައްޓާލުމަށް ފަހު މުހައްމަދު ފާސިރެވެ. އަދި އިތުރު ވަގުތުގެ ހަތަރު ވަނަ މިނެޓުގައި، ފާސިރު ވަނީ އިތުރު ގޯލެއް ޖަހައި، އޭދަފުށްޓަށް ކުއާޓާ ފައިނަލް ޔަގީން ކޮށްދީފައެވެ.
މި މެޗުގައި ފާސިރު ކާމިޔާބުކުރި ދެ ގޯލާއި އަދި ނަސީމް ކާމިޔާބުކުރި ގޯލާއެކު، މި ދެ ކުޅުންތެރިން ވެސް މިވަނީ މުބާރާތުގައި މިހާތަނަށް 5 ގޯލު ކާމިޔާބުކޮށްފައެވެ. އަދި މިއީ އޭދަފުއްޓަށް މި މުބާރާތުގައި އެންމެ ގިނަ ގޯލު ކާމިޔާބުކޮށްދީފައިވާ ދެ ކުޅުންތެރިން ވެސް މެއެވެ.
މިއަދުގެ މެޗުގައި ދިއްދޫއިން ކާމިޔާބުކުރި ހަމައެކަނި ގޯލަކީ، އިތުރު ވަގުތުގެ ނުވަ ވަނަ މިނިޓްގައި ހުސެއިން ޒިމްޔާން ކާމިޔާބުކުރި ގޯލެކެވެ.
މި ގްރޫޕުގެ ހުރިހާ މެޗެއް މިހާރު ނިމިފައިވާއިރު، މި ގްރޫޕުން ކުއާޓާ ފައިނަލުގެ ޖާގަ ހޯދީ އޭދަފުށީގެ އިތުރުން މާފުށްޓެވެ.