ކާވާ ކްލަބް ޗެމްޕިއަންޝިޕް: މުބާރާތުގެ ތިންވަނަ ހޮވާ މެޗު އެޗްޑީސީއަށް ގެއްލިއްޖެ

ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ މެންސް ވޮލީބޯލް ކްލަބް ޗެމްޕިއަންޝިޕްގެ ތިންވަނަ ހޮވާ މެޗުގައި ރާއްޖޭގެ ކްލަބް އެޗްޑީސީ އާއި އިރާން ކްލަބް ބައްދަލުކުރި މެޗު ސީދާ ތިން ސެޓުން އިރާން ކްލަބް ކާމިޔާބުކޮށް، މުބާރާތުގެ ބްރޯންޒް މެޑަލް ހާސިލްކޮށްފިއެވެ.

ނޭޕާލުގެ ކަތުމަންޑޫގައި މި މަހުގެ 7-14 އަށް ކުރިޔަށްދިޔަ މި މުބާރާތުގައި ކްލަބް އެޗްޑީސީއިން ކުޅުނު ފުރަތަމަ މެޗު އެ ކްލަބުން ކާމިޔާބުކުރިއެވެ. ނޭޕާލްއަށް ނިސްބަތްވާ ގަންޑާކީއާ ބައްދަލުކޮށް ކްލަބް އެޗްޑީސީއިން އެ މެޗު ކާމިޔާބުކުރީ 3-2 ސެޓުންނެވެ. އަދި ދެވަނަ މެޗުގައި އިރާން ކްލަބުގެ އަތުން 3-2 ސެޓުން ނާކާމިޔާބާ ކުރިމަތިލާން ޖެހުނުއިރު، ތިން ވަނަ މެޗު އެ ޓީމަށް ގެއްލުނީ އިންޑިއާގެ ކަލިކަޓް ހީރޯޒްއާ ބައްދަލުކޮށް ސީދާ ތިން ސެޓުންނެވެ. 

ގްރޫޕް ސްޓޭޖުގެ ފަހު މެޗުގައި ހެލްޕް ނޭޕާލް ކްލަބާއި ބައްދަލުކޮށް 3-1 ސެޓުން މެޗު ގެއްލުނު ނަމަވެސް، ކްލަބް އެޗްޑީސީއަށް ސެމީ ފައިނަލްގެ ޖާގައެއް ލިބުނެވެ. މި މެޗުގައި އަނެއްކާ ވެސް ކުރިމަތިލާން ޖެހުނީ ހެލްޕް ނޭޕާލް ޓީމާއެވެ. ސެމީފައިނަލް މެޗު ހެލްޕް ނޭޕާލް ޓީމުން މިފަހަރު ކާމިޔާބުކުރީ ސީދާ 3 ސެޓުންނެވެ. 

މުބާރާތުގެ ތިން ވަނަ ހޮވާ މެޗުގައި ކްލަބް އެޗްޑީސީގެ ފަރާތުން ރަގަޅު ކުޅުމެއް ފެނިގެން ދިޔައެވެ. ނަމަވެސް އެ ޓީމަށް ކުރިމަތިވި މާޔޫސްކަމަކީ، އެއްވެސް ސެޓެއް ކުރީގައި އޮވެ ނިންމާނުލެވުމެވެ. 

މި މެޗުގެ ފުރަތަމަ ސެޓު ކްލަބް އެޗްޑީސީއަށް ގެއްލުނީ 25-21 ޕޮއިންޓުންނެވެ. އަދި ދެވަނަ ސެޓާއި ތިންވަނަ ސެޓު އެ ޓީމަށް ގެއްލިފައިވަނީ 27-25 ޕޮއިންޓުންނެވެ. 

މުބާރާތުގެ ފައިނަލުގައި އިންޑިއާގެ ކަލިކަޓް ހީރޯޒްއިން ވަނީ ހެލްޕް ނޭޕާލް ޓީމް 3-1 ސެޓުން ބަލިކޮށް، މުބާރާތުގެ ޗެމްޕިއަން ތަށި އުފުލާލާފައެވެ.