ގުރައިދޫ މެޗުގައި ފުވައްމުލަކު ސިޓީއަށް މުބާރާތުގެ ފުރަތަމަ ނާކާމިޔާބީއާ ކުރިމަތިލާން ޖެހިއްޖެ

ނައިންޓީ ޕްލަސް ގޯލްޑް ކަޕްގެ ގްރޫޕް ފޭސް-2ގެ ގްރޫޕް-އީގެ ފަހު މެޗުގައި، މުބާރާތުގެ ކުއާޓާ ފައިނަލުން ޖާގައެއް ޔަގީންކޮށްފައި އޮތް ގުރައިދޫއިން، މުބާރާތުގައި އެންމެ މޮޅަށް ކުޅެ މިހާތަނަށް އެއްވެސް މެޗަކުން ބަލިވެފައިނުވާ ފުވައްމުލަކު ސިޓީއަށް ބަލިކޮށްފިއެވެ. 

ހޮނިހިރު ދުވަހުގެރޭ ގަލޮޅު ދަނޑުގައި ކުޅުނު މި މެޗުގައި ފުވައްމުލަކު ސިޓީގެ މައްޗަށް ގުރައިދޫއިން ކާމިޔާބު ހޯދީ 1-0 އިންނެވެ. އަދި މި ކާމިޔާބާ އެކީ ގުރައިދޫއަށް ވަނީ ޖުމްލަ 6 ޕޮއިންޓާއެކު ގްރޫޕްގެ އެއްވަނަ ލިބިފައެވެ. 

ގުރައިދޫއިން ތިމަރަފުށީ މެޗު ވެސް 1-0 އިން ކާމިޔާބުކޮށްފައިވާއިރު، ތިމަރަފުއްޓާއި ފުވައްމުލަކު ސިޓީ ބައްދަލުކުރި މެޗު 1-1 އިން އެއްވަރުވެފައި ވުމުން، ފުވައްމުލަކު ސިޓީއާއި ތިމަރަފުށި އޮތީ ހުރިހާ ގޮތަކުން ވެސް އެއްވަރުވެފައެވެ. އެހެންކަމުން މި ގްރޫޕުން ކުއާޓާ ފައިނަލަށް ދަތުރުކުރާ ދެވަނަ ޓީމެއް ކަނޑައަޅާނީ ގުރުއަތަކުންނެވެ.

ރޭގެ މެޗުގައި ގުރައިދޫގެ ހަމައެކަނި ގޯލު ކާމިޔާބުކުރީ އެ ޓީމުގެ އަހުމަދު ޝުއޫންއެވެ. ގުރައިދޫއަށް ހާފުގެ މެދެއްހާ ހިސާބުން ލިބުނު ހިލޭ ޖެހުމުގައި ފުވައްމުލަކު ސިޓީގެ ޕެނަލްޓީ އޭރިއާ ތެރެއަށް ބޯޅަ ފޮނުވާލުމުން އިދިކޮޅު ޓީމުގެ ކުޅުންތެރިއެއްގެ ގައިގަ ޖެހުމަށްފަހު އެ ބޯޅަ ލިބުނީ ޝުއޫންއަށެވެ. އަދި އޭނާ ވަނީ އެ ބޯޅަ ގޯލުގެ ދާގަނޑުގެ ތެރެއަށް ފޮނުވާލާ، ގުރައިދޫއަށް ލީޑު ނަގާދީފައެވެ.

މި މެޗުގައި ވެސް ފުވައްމުލަކު ސިޓީއިން ވަނީ މޮޅު ކުޅުމެއް ކުޅެ، ގިނަ ހަމަލާތަކެއް އުފައްދާފައެވެ. ނަމަވެސް ގުރައިދޫގެ ކީޕަރު، އަހުމަދު ސަމީރު ވަނީ އެ ޓީމުގެ ގޯލު ދިފާއު ކުރުމުގައި ސާބިތުކަމާއެކު ކާމިޔާބީ ހޯދާފައެވެ. މުބާރާތުގައި އެންމެ ގިނަ ގޯލު ޖަހާފައިވާ ފުވައްމުލަކު ސިޓީގެ ގާނާ ފޯވާޑް، ކޯފީ އުވޫސޫއަށް ވެސް އޭނާ ފޫއަޅުވައެއް ނުލެވުނެވެ. 

މުބާރާތުގެ ކުއާޓާ ފައިނަލަށް ދަތުރުކުރާ 6 ޓީމެއް މިހާރު ވަނީ ޔަގީންވެފައެވެ. އެއީ، ނައިފަރު، ގުރައިދޫ، މާފުށި، އަލިފުށި، މާލޭ ސިޓީ އަދި އޭދަފުށްޓެވެ.

މުބާރާތުގައި މިއަދު ހަވީރު ކުޅޭނީ އަލިފުއްޓާއި މާލޭ ސިޓީއެވެ. މި ދެ ޓީމު ވެސް ވަނީ ކުއާޓާ ފައިނަލުން ޖާގަ ހޯދާފައެވެ. އަދި މިރޭގެ މެޗުގައި އައްޑޫ ސިޓީއިން ނިކުންނާނީ ނައިފަރާއި ދެކޮޅަށެވެ. ކުއާޓާ ފައިނަލުން ޖާގަ ހޯދުމަށް އައްޑޫ ސިޓީއަށް ބޮޑު ފުރުސަތެއް އޮތް އިރު، އެ ޓީމުން ޖެހޭނީ ދެ ގޯލުގެ ތަފާތުން ބަލިނުވެ ސަލާމަތް ވާށެވެ.