ވިޔަފާރި / ޚަބަރު
އެމްއެމްއޭއިން 1 މިލިއަން ރުފިޔާގެ ދިރާސީ ފަންޑެއް އިފްތިތާޙްކޮށްފި
ދިރާސީ ފަންޑް އިފްތިތާޙްކުރުން ފޮޓޯ:އެމްއެމްއޭ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދިރާސީ މަސައްކަތްތައް ކުރުމަށް 1 މިލިއަން ރުފިޔާގެ ފަންޑެއް އިފްތިތާޙްކޮށްފިއެވެ. މި ފަންޑް އިފްތިތާޙްކޮށްފައިވަނީ އެމްއެމްއޭއިން ދެ ދުވަހުގެ މުއްދަތަށް ކުރިއަށްގެންދާ ރިސަރޗް ކޮންފަރެންސްގެ ތެރެއިންނެވެ.
މަރުކަޒީ ބޭންކުން ޤާއިމްކުރި މި ފަންޑަކީ އެ އިދާރާގެ ދިރާސީ މަސައްކަތްތަކަށް ޚާއްސަކޮށްގެން އުފައްދާފައިވާ ފަންޑެކެވެ. މި ފަންޑް އިފްތިތާޙުކުރެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރު ޑރ. މަޙްމޫދު ޝައުޤީއެވެ. އެމްއެމްއޭގެ މި ފަންޑުގެ އަމާޒަކީ ދިރާސާތައް ކުރުމަށް ހިތްވަރުދީ، ދިރާސާ ކުރާ ފަރާތްތަކަށް ފަހި މާޙައުލެއް ބިނާކުރުމެވެ.
މީގެ އިތުރުން، މި ކޮންފަރެންސްގެ ތެރެއިން ދިރާސީ މަސައްކަތް ކުރުމަށް ދެ އެއްބަސްވުމެއްގައިވެސް ސޮއިކޮށްފައިވެއެވެ. އޭގެ ތެރެއިން އެއް އެއްބަސްވުން ޤާއިމްކޮށްފައިވަނީ ދިރާގާ އެކުގައެވެ. އަނެއް އެއްބަސްވުން ޤާއިމްކޮށްފައިވަނީ މެލޭޝިއާގެ އިސްލާމް ސެލަންގޯރު ޔުނިވަރސިޓީއާ އެކުގައެވެ.
މި ކޮންފަރެންސްގައި ރާއްޖެއާއި ރާއްޖެއިން ބޭރުގެ ދިރާސާވެރިންނާއި މާލީ އިދާރާތަކުގެ ބޭފުޅުންނާއި އިޤްތިޞާދީ އަދި ފައިނޭންޝަލް ޓެކްނޮލޮޖީ ދާއިރާގައި ހަރަކާތްތެރިވާ ގިނަ ފަރާތްތަކެއް ބައިވެރިވިއެވެ. ކޮންފަރެންސްގެ ފުރަތަމަ ސެޝަންގައި އެމްއެމްއޭގެ ގަވަރުނަރު އަޙްމަދު މުނައްވަރުގެ އިތުރުން، އެމްއެންޔޫގެ ޗާންސެލަރު ޑރ. ޝައުޤީ އަދި ރިޒާވް ބޭންކް އޮފް އިންޑިއާގެ ޑެޕިއުޓީ ގަވަރުނަރު ވަނީ ވާހަކަފުޅު ދައްކަވާފައެވެ.
We are pleased to announce the official signing of an MOU between the Maldives Monetary Authority and Dhiraagu. This partnership symbolizes a shared commitment to advancing research and driving innovation for a sustainable future.#MMAResearchConference #InnovationInPartnership… pic.twitter.com/WZQuvqKntZ
— MMA (@MMA_Maldives) December 14, 2024
މިއީ މަރުކަޒީ ބޭންކުން އިންތިޒާމްކޮށްގެން ބާއްވާ ފުރަތަމަ ރިސަރޗް ކޮންފަރެންސްއެވެ. މި ކޮންފަރެންސްގައި ކީނޯޓް ވާހަކަތަކާއި ޕެނަލް ޑިސްކަޝަންތަކާއި ދިރާސީ ކަރުދާސްތައް ހުށަހެޅުމުގެ އިތުރުން ވޯކްޝޮޕްތައްވެސް ކުރިއަށްދާނެއެވެ. މިއަހަރުގެ ކޮންފަރެންސްގެ ތީމަކީ "އިޤްތިޞާދީ ދިރާސާތައް ފުޅާކުރުމުގައި ދެމެހެއްޓެނިވި ކުރިމަގަކަށް ސިޔާސަތުތައް ބައްޓަންކޮށް އީޖާދުކުރުން" އެވެ.
