ތައިލެންޑުގެ އުންފަންގް ފެއަރއަށް ދިން ބޮމުގެ ހަމަލާއެއްގައި 3 މީހުން މަރުވެ 48 މީހުން ޒަޚަމްވެއްޖެ

ތައިލެންޑުގެ އުތުރުގައި އޮންނަ ތަކް ޕްރޮވިންސްގެ އުންފަންގް ޑިސްޓްރިކްޓުގައި ބޭއްވުނު ރެޑް ކްރޮސް ޑޯއި ލޮއިފާ ފެއަރގައި ބޮމެއް ގޮއްވާލުމުގެ ސަބަބުން މަދުވެގެން 3 މީހުން މަރުވެ، 48 މީހުން ޒަޚަމްވެއްޖެއެވެ. މި ހަމަލާ ދީފައިވަނީ ހުކުރު ދުވަހުގެ ރޭ މެންދަމު ކައިރިވެފައިވަނިކޮށެވެ.

ފުލުހުންނާއި ލޯކަލް މީޑިއާތަކުން ދޭ މަޢުލޫމާތުގައިވާ ގޮތުން، މި ހާދިސާއާ ގުޅިގެން ދެ މީހަކު ބަންދުގައި ބަހައްޓާފައިވާ ކަމަށާއި، ނަމަވެސް އަދި އެއްވެސް ދަޢުވާއެއް ކޮށްފައިނުވާ ކަމަށް ބުނެފައިވެއެވެ. ޒަޚަމްވި 48 މީހުންގެ ތެރެއިން 6 މީހުންގެ ހާލަތު ވަރަށް ބޮޑަށް ސީރިއަސްވެފައިވާ ކަމަށް ފުލުހުން މަޢުލޫމާތު ދީފައިވެއެވެ.

އުންފަންގް ރެސްކިއު ޓީމުން ދީފައިވާ ބަޔާނެއްގައި ބުނެފައިވަނީ،  ޒަޚަމްވި ބައެއް މީހުން ކައިރީގައިވާ ހޮސްޕިޓަލަކަށް ގެންގޮސްފައިވާ ކަމަށެވެ.

މި ހާދިސާއާ ގުޅިގެން ބޮޑު ހިތާމައެއް ލިބިފައިވާ ކަމަށް ބުނެ، ތައިލެންޑުގެ ބޮޑުވަޒީރު ޕެއިޓޯންގްޓަރން ޝިނަވަތްރާ ވަނީ މަރުވި އަދި ޒަޚަމްވި މީހުންގެ ޢާއިލާތަކަށް ތަޢުޒިޔާ ފޮނުވާފައެވެ. އަދި މި ހާދިސާގެ ސަބަބު ބަލައި، އަސަރުކުރި ފަރާތްތަކަށް އެހީތެރިވުމަށް ފުލުހުންނާއި ސަލާމަތީ އިދާރާތަކަށް އަންގާފައިވާ ކަމަށާއި، ހުރިހާ ފެސްޓިވަލްތަކެއްގައި ފުލުހުންގެ ޙިމާޔަތް އިތުރުކުރުމަށް އަންގާފައިވާ ކަމަށްވެސް ބުނެފައިވެއެވެ.

މި ފެސްޓިވަލްގައި މިއަހަރު 8000 އާއި 9000 އާ ދެމެދުގެ އަދަދެގެ އަދަދެއްގެ މީހުން ބައިވެރިވެފައިވާ ކަމަށް ބެންކޮކް ޕޯސްޓުން ރިޕޯޓުކޮށްފައިވެއެވެ. އަދި މި ހަމަލާ ދީފައިވަނީ ފެސްޓިވަލްގެ ފަހު ދުވަހުގެ ކުރީ ދުވަހު ކަމަށްވެސް ބުނެފައިވެއެވެ.