ބަދަލު ކުޅުންތެރިއެއްގެ ގޮތުގައި ނިކުތް ޖޯޓާ ލިވަޕޫލް ސަލާމަތްކޮށްދީފި

އިންގްލިޝް ޕްރިމިއަރ ލީގުގެ ޕޮއިންޓު ޓޭބަލްގެ ކުރީގައި އޮތް ލިވަޕޫލު ބަލިވާން ދަނިކޮށް، އަނިޔާއިން ރަގަޅުވެ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޑިއޯގޯ ޖޯޓާ އެ ޓީމު ސަލާމަތްކޮށްދީފިއެވެ.  

ހޮނިހިރު ދުވަހު ފުލަމްއާ ދެކޮޅަށް ލިވަޕޫލްގެ އެންފީލްޑްގައި ކުޅުނު މި މެޗުގެ 17 މިނެޓު ކުޅުނު އިރު، އެ ޓީމަށް އޮތީ ރަތްކާޑަކާއެކު އެއް ކުޅުންތެރިއަކު ގެއްލި، އެއް ގޯލު ފަހަތުގައި އޮވެ ކުޅެންޖެހިފައެވެ. އަދި ދެ ފަހަރެއްގެ މަތިން މި މެޗުގައި ފުލަމް ލީޑު ނެގިއިރު، ފަހަތުން އަރައި އެއްވަރުކޮށް ލިވަޕޫލުން މެޗު ނިންމާލީ 2-2 އިންނެވެ.

ކޯޑީ ގަކްޕޯ އާއި ލުއިޒް ދިއާޒްގެ ނުރައްކާތެރި ކުޅުމާއެކު، ލިވަޕޫލުން މި މެޗު ފެށީ ވަރަށް ރަގަޅަށެވެ. ނަމަވެސް މެޗުގައި ފުރަތަމަ ލީޑު ނަގާފައިވަނީ ފުލަމްއެވެ. އެ ޓީމުގެ ވާތް ފަރާތުން ފަހަތަށް ކުޅޭ އެންޓޮނީ ރޮބިންސަން ގޯލު ކުރިމައްޗަށް ހުރަސްކޮށްލި ރީތި ބޯޅައެއްގެ ބޭނުން ހިފައި، އެންޑްރިއާ ޕެރޭރާ ވަނީ މެޗުގެ 11 ވަނަ މިނެޓުގައި އެ ޓީމަށް ލީޑު ނަގާދީފައެވެ. 

އޭގެ 6 މިނެޓުފަހުން ލިވަޕޫލްގެ އެންޑީ ރޮބަޓްސަންއަށް ވަނީ ރަތް ކާޑު ދައްކާފައެވެ. ރޮބަޓްސަންއަށް މި ރަތް ކާޑު ދެއްކީ އޭނާގެ އަތުން ގެއްލުނު ބޯޅައެއް އަނބުރާ ހޯދުމަށް މަސައްކަކުރުމުގެ ތެރޭގައި ފުލަމްގެ ހެރީ ވިލްސަންއަށް ކުރި  ނުރައްކާތެރި ފައުލަކާ ގުޅިގެންނެވެ. 

ރަތް ކާޑަކާއެކު ޑިފެންޑަރެއް މެޗުގެ ކުރީކޮޅު ގެއްލުމުން ލިވަޕޫލްގެ ކޯޗު، އާނޭ ސްލޮޓް ވަނީ އެ ޓީމުގެ ޑިފެންސް ހަމަޔަކަށް އެޅުވުމަށް ބަދަލުތަކެއް ގެނަސްފައެވެ. އެގޮތުން މެދުތެރެއަށް ކުޅެމުން ދިޔަ ރްޔަން ގްރެވެންބާޗް ޑިފެންސަށް ޖެއްސުމަށްފަހު، އެތަނަށް ކުޅެމުން ދިޔަ ޖޯ ގްމޭޒް ވަނީ ރޮބަޓްސަންގެ މަގާމަށް ޖައްސާފައެވެ.

މެޗުގެ ނަތީޖާ ހަމަހަމަ ކުރުމަށް ލިވަޕޫލުން އަވަސް ހަމަލާތަކެއް އުފެއްދި ނަމަވެސް، ފުލަމްގެ ޑިފެންސް ލައިނުގެ ހުޝިޔާރުކަމާ ހެދި، ލިވަޕޫލަށް ވަނީ ފުރަތަމަ ހާފުގައި ގޯލެއް ކާމިޔާބުކުރެވޭ ގޮތް ނުވެފައެވެ.

ލިވަޕޫލަށް މެޗުގެ ނަތީޖާ ހަމަހަމަ ކުރެވުނީ ދެވަނަ ހާފުގެ ދެވަނަ މިނެޓުގައެވެ. ނޮވެމްބަރު މަހު ޕްރިމިއަރ ލީގުގެ އެންމެ މޮޅު ކުޅުންތެރިޔާގެ މަގާމު ހޯދި މުހައްމަދު ސަލާހް ފުލަމްގެ ޕެނަލްޓީ އޭރިއާ ތެރެއަށް ހުރަސްކޮށްދިން ބޯޅަ ބޮލުން ޖަހާ ގޯލުގެ ތެރެއަށް ފޮނުވާލީ ކޯޑި ގަކްޕޯއެވެ.

ނަމަވެސް މެޗު ނިމެން 14 މިނެޓަށްވެފައި ވަނިކޮށް، ރޮޑްރީގޯ މުނީޒްގެ ގޯލަކުން ފުލަމް ދެވަނަ ފަހަރަށް ލީޑު ނެގިއެވެ.

ފުލަމްގެ މި ގޯލަށްފަހު ލިވަޕޫލު ޓީމަށް އަނެއްކާ ވެސް ބަދަލުތަކެއް ގެނައެވެ. އަދި މިފަހަރު ލިވަޕޫލުން ހަތިޔާރެއްގެ ގޮތުގައި ބޭނުންކުރީ، އޮކްޓޫބަރުން ފެށިގެން އަނިޔާގައި ހުރި ޑިއޯގޯ ޖޯޓާއެވެ. އޭނާ ލިވަޕޫލަށް ދެވަނަ ފަހަރަށް މެޗުގެ ނަތީޖާ ހަމަހަމަކޮށްދިނީ 86 ވަނަ މިނެޓުގައެވެ. 

މި ނަތީޖާއާއެކު، ފަހުން ކުޅުނު ދެ މެޗުން ލިވަޕޫލް މިވަނީ އެއްވަރުވެފައެވެ. އަދި މި ނަތީޖާތަކާއެކު 4 ޕޮއިންޓު ގެއްލުމުން، އެއްވަނައިގައި އޮތުމަށް ލިބުނު ބޮޑު ލީޑު މިވަނީ މިހާރު ހަނިވެފައެވެ.