އޯޕަން އޭއައި ގެ ކުރީގެ ތަޙުޤީޤުވެރިއެއް ސެން ފްރެންސިސްކޯގައި މަރުވެފައިއޮށްވައި ފެނިއްޖެ

އޯޕަން އޭއައި ގެ ކުރީގެ ތަޙުޤީޤުވެރިއެއް ކަމުގައިވާ 26 އަހަރުގެ ސުޗިރު ބަލާޖީ ސެން ފްރެންސިސްކޯގެ އެޕާޓްމަންޓެއްގައި މަރުވެފައި ވަނިކޮށް ފެނިއްޖެއެވެ. ފުލުހުން ބުނާ ގޮތުގައި އޭނާގެ ހާލު ބެލުމަށް އެދި އައި ފޯނުކޯލަކާއި ގުޅިގެން 26 ނޮވެމްބަރުގައި އޭނާގެ ހަށިގަނޑު ފެނިފައިވާކަމަށެވެ.

ސެން ފްރެންސިސްކޯ މެޑިކަލް އެގްޒެމިނަރުގެ އޮފީހުން ކަނޑައަޅާފައިވަނީ އޭނާ އަމިއްލައަށް މަރުވީ ކަމަށެވެ. އަދި ފުލުހުންނަށް އެއްވެސް ކުށުގެ ހެއްކެއް ފެނިފައި ނުވާކަންވެސް ވަނީ ހާމަކޮށްފައެވެ.

ފާއިތުވި މަސްތަކުގައި ބަލާޖީ ވަނީ އޯޕަން އޭއައިގެ އަމަލުތަކާ ދެކޮޅަށް ހާމަކޮށް ވާހަކަ ދައްކާފައެވެ. އޯޕަން އޭއައި އަކީ މިހާރު ޑޭޓާ އެއްކުރުމުގެ އުސޫލުތަކާ ގުޅިގެން އެކި ދަޢުވާތަކާ ކުރިމަތިލަމުންދާ ކުންފުންޏެކެވެ.

އޮކްޓޯބަރު މަހު ނިއު ޔޯކް ޓައިމްސްގައި ޝާއިޢުކުރި އިންޓަވިއުއެއްގައި ބަލާޖީ ބުނެފައިވަނީ އޯޕަން އޭއައި އިން ޗެޓްޖީޕީޓީ ތަރައްޤީކުރުމުގައި އެމެރިކާގެ ކޮޕީރައިޓް ޤާނޫނާ ޚިލާފުވެފައިވާ ކަމަށެވެ. އަދި ޗެޓްޖީޕީޓީ ފަދަ ޓެކްނޮލޮޖީތަކުން އިންޓަނެޓަށް ގެއްލުން ދެމުންދާ ކަމަށް އޭނާ ދެކޭ ކަމަށްވެސް ބުނެފައިވެއެވެ.

އޯޕަން އޭއައި އިން ބުނެފައިވަނީ އެ ކުންފުނީގެ މޮޑެލްތައް ތަމްރީނު ކުރަނީ އާންމުކޮށް ލިބެންހުރި މަޢުލޫމާތުން ކަމަށެވެ. ބަލާޖީ ވަނީ އޯގަސްޓު މަހު ކުންފުނިން ވަކިވެފައެވެ. އަދި އޭގެ ފަހުން އަމިއްލަ މަޝްރޫޢުތަކެއްގައި މަސައްކަތް ކުރަމުންދިޔަ ކަމަށް ނިއު ޔޯކް ޓައިމްސްއަށް ބުނެފައިވެއެވެ.

އޯޕަން އޭއައިގެ ތަރުޖަމާނެއް ސީއެންބީސީ ނިއުސްއަށް ދީފައިވާ ބަޔާނެއްގައި ބުނެފައިވަނީ މި ހިތާމަވެރި ޚަބަރު އަޑުއިވުމުން ވަރަށް ބޮޑަށް ކަންބޮޑުވެފައިވާ ކަމަށާއި، މި  ވަގުތުގައި ސުޗިރުގެ އާއިލާއަށް ހަމްދަރުދީ އޮތް ކަމަށެވެ.