ލިވަޕޫލް އެއްވަރުވުމުގެ ފައިދާ އާސެނަލްއަކަށް ނުނެގުނު

އިންގްލިޝް ޕްރިމިއަރ ލީގުގެ ތައްޓާއި މި ސީޒަނުގައި ވެސް ވާދަކުރަމުން އަންނަ އާސެނަލް އެވަޓަން އާއި ދެކޮޅަށް ކުޅުނު މެޗުން 0-0 އިން އެއްވަރުވުމުން، މުހިންމު ދެ ޕޮއިންޓެއް އެ ޓީމަށް ގެއްލި، ކޯޗު މައިކަލް އާޓެޓާގެ ނުތަނަވަސްކަން އިތުރު ވެއެޖެއެވެ. 

ލީގުގައި އާސެނަލް އެންމެ ފަހުން ކުޅުނު މެޗު ފުލަމްއާ ބައްދަލުކޮށް 1-1 އިން އެއްވަރުވެފައިވާއިރު، ލިވަޕޫލާއި އޮތް ފަރަގު ކުޑަ ކުރުމަށް އެ ޓީމަށް ލިބުނު ރަގަޅު ފުރުސަތުތައް މިވަނީ ބޭކާރުވެފައެވެ. ލިވަޕޫލް ވެސް ފަހު ދެ މެޗުން އެއްވަރުވެފައިވާއިރު، އާސެނަލްއަށް މި ގެއްލުނީ އެ ޓީމާއި ދެ ޕޮއިންޓު ކައިރިއަށް ޖެހިލުމަށް ލިބުނު ފުރުސަތުތަކެކެވެ. 

ނަމަވެސް، އެވަޓަންއާ ދެކޮޅަށް މޮޅަށް ކުޅެ، މުޅި މެޗުގައި އެ ޓީމުގެ ގޯލަށް ފޮނުވާލި 13 ހަމަލާގެ ތެރެއިން އެއްވެސް ހަމަލާއެއް ކާމިޔާބު ކުރެވިފައެއް ނުވެއެވެ. އެވަޓަންގެ ކީޕަރު ޖޯޑަން ޕިކްފޯޑު ވަނީ، އާސެނަލްގެ ކެޕްޓަން މާޓިން އޮޑެގާޑާއި ބުކާޔޯ ސަކާ ފޮނުވާލީ ނުރައްކާތެރި ހަމަލާތައް ދިފާއުކޮށްފައެވެ.

ލީގު ކާމިޔާބު ކުރުމަށް އާސެނަލް ގޯލު ޖެހުމުގައި ރަގަޅު ކުރަންޖެހެއެވެ. އަދި މިކަން ކުރެވޭނީ ޖެނުއަރީގައި އެ ޓީމަށް އިތުރު ފޯވާޑަކު ގެނަސްގެންކަމަށް އެ ޓީމުގެ ބައެއް ސަޕޯޓަރުން އަންނަނީ ބުނަމުންނެވެ. 

މެޗަށްފަހު ނޫސްވެރިންނާ ވާހަކަ ދައްކަމުން އާސެނަލްގެ ކޯޗު އާޓޭޓާ ބުނީ، ރޭގެ މެޗުން އެ ޓީމަށް މޮޅެއް ހައްގު ކަމަށާއި ގޯލެއް ކާމިޔާބު ކުރުން ނޫން ހުރިހާ ކަމެއް އާސެނަލް ކުރީ ރަގަޅަށް ކަމަށެވެ. އަދި ޓީމުން މިހާރު ރަގަޅު ކުރަންޖެހޭ ކަމަކީ، އިދިކޮޅު ޓީމުގެ ގޯލުގެ ކުރިމަތީގައި ހާސްކަން ކުޑަކުރުން ކަމަށް ވެސް އޭނާ ފާހަގަ ކުރިއެވެ. 

މި މެޗުގެ ފަހުކޮޅު އާޓޭޓާ ވަނީ އެ ޓީމުގެ ކެޕްޓަން އޮޑެގާޑް ބަދަލުކޮށްފައެވެ. އޭނާގެ ބަދަލުގައި ކުޅެން ނިކުތީ 17 އަހަރުގެ އީތަން ނުވަނޭރީއެވެ. މި ބަދަލާ ގުޅިގެން ކުރި ސުވާލަކަށް ޖަވާބު ދެމުން އާޓޭޓާ ބުނީ، އެއީ ޓެކްޓިކަލް ބަދަލެއް ކަމަށާއި، އީތަން ކުޅެން އެރުމަށްފަހު ގޯލެއް ކާމިޔާބުކުރިނަމަ، އޭނާއާއި އެ ބަދަލާ ގުޅިގެން ސުވާލު ނުކުރާނެ ކަމަށެވެ.