އަލިފާނުގެ ހާދިސާގައި ގެއްލުންވި ވުޒާރާތަކުގެ ޚިދުމަތް ދަރުބާރުގޭގައި ފަށައިފި

މިދިޔަ ބުރާސްފަތި ދުވަހު ތިން ވުޒާރާއެއް ހިންގަމުން ދިޔަ ދެ އިމާރާތުގައި ރޯވެ ހިނގި އަލިފާނުގެ ހާދިސާގައި ގެއްލުންވި ވުޒާރާތަކުގެ މަސައްކަތްތައް ދަރުބާރުގެއަށް ބަދަލުކޮށް ޚިދުމަތް ދޭން ފަށައިފިއެވެ.

އަމީނީ މަގުގައި ހުންނަ ގެދޮރުވެރިކަމާއި ބިމާއި އުމްރާނީ ތަރައްޤީއާއި ބެހޭ ވުޒާރާ އަދި އިމާރާތްކުރުމާއި ބިނާވެށްޓާ ބެހޭ ވުޒާރާ ހިންގަމުންދިޔަ އިމާރާތް، އަލިފާނުގެ ހާދިސާގައި ބޭނުން ނުކުރެވޭ ވަރަށް އަނދައިގެން ގޮސްފައިވެއެވެ. މީގެ އިތުރުން، އެ އިމާރާތާ ޖެހިގެން ހުންނަ ގްރީން ބިލްޑިންގގައިވެސް އަލިފާން ރޯވެ ގެއްލުންތަކެއް ވެފައިވެއެވެ. މި އިމާރާތަކީ މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) ހިންގަމުން އައި އިމާރާތެވެ.

މި އަލިފާނުގެ ހާދިސާއާ ގުޅިގެން، މި ތިން ވުޒާރާއިން ދެމުން ގެންދިޔަ ޚިދުމަތްތައް ވަގުތީ ގޮތުން މެދުކެނޑުނު ނަމަވެސް، ވުޒާރާތަކުގެ މަސައްކަތްތައް ކުރުމަށްޓަކައި ވަގުތީގޮތުން ދަރުބާރުގެ ސަރުކާރުން ވަނީ ހަމަޖައްސައިދީފައެވެ. މި ވުޒާރާތައް ހިންގުން ވަގުތީ ގޮތުން ދަރުބާރުގެއަށް ބަދަލުކުރުމުގެ މަސައްކަތް އަލިފާނުގެ ހާދިސާ ހިނގި ދުވަހުން ފެށިގެން ކުރިއަށް ގެންދެވުނެވެ.

މި މަސައްކަތް ކުރިއަށް ގެންދެވިފައިވަނީ މި ވުޒާރާތަކުގެ މުވައްޒަފުންގެ އިތުރުން ސަރުކާރު ހިއްސާވާ ކުންފުނިތަކާއި ކަމާބެހޭ އިދާރާތަކުގެ ބައިވެރިވުމާއި އެހީތެރިކަމާއެކުގައެވެ. ދަރުބާރުގޭގައި މި ވުޒާރާތަކުގެ މަސައްކަތްތައް ހިންގުމަށް ބޭނުންވާ ޖާގަތަކާއި، އިދާރީ ޚިދުމަތްތައް ދިނުމަށް ބޭނުންވާ ޖާގަތަކުގެ އިތުރުން މީޓިންގ ރޫމުތަކުގެ ސެޓަޕްތައް ވަނީ ޤާއިމުކޮށްފައެވެ. އަދި އެތަނަކީ ގިނަ އަދަދެއްގެ މުވައްޒަފުން މަސައްކަތްކުރާނެ ތަނެއްކަމަށްވުމުން އިމާރާތް ފިނިކުރުމަށްޓަކައި އިތުރަށް އޭސީ ހަރުކުރުމުގެ މަސައްކަތްވެސް ކޮށްފައިވެއެވެ.

މި ތިން ވުޒާރާގެ މަސައްކަތްތައް ދަރުބާރުގެއަށް ބަދަލުކޮށް ޚިދުމަތް ދޭން ފަށާފައި މިވަނީ ގާތްގަނޑަކަށް 48 ގަޑިއިރުގެ މަސައްކަތުންނެވެ. މި ބަދަލާއެކު، އަލިފާނުގެ ހާދިސާއިން ގެއްލުންވި ވުޒާރާތަކުން ރައްޔިތުންނަށް ފޯރުކޮށްދޭ ޚިދުމަތްތައް މެދުނުކެނޑި ކުރިއަށް ގެންދެވޭނެ ކަމަށް ބެލެވެއެވެ.