މާލޭގައި އެއް ރެއެއްގައި ތިން ތަނެއްގައި ގޭންގު މާރާމާރީ ހިންގައިފި

މާލޭގައި  2024 ޑިސެމްބަރު 14 ވަނަ ދުވަހުގެ ރޭ އެއް ރެއެއްގައި ތިން ތަނެއްގައި މާރާމާރީ ހިންގާފައިވާކަން ފުލުހުންނަށް ރިޕޯޓުކޮށްފައިވެއެވެ.

ފުލުހުންގެ މަޢުލޫމާތު ދޭގޮތުގައި، މުނިޔާމަގު ދި-ރިޕަބްލިކް ކެފޭ ތެރެއަށް ހެލްމެޓް އަޅައިގެން ތިބި ބަޔަކު ސައިކަލެއްގައި އައިސް ވަދެ މާރާމާރީ ހިންގާފައިވެއެވެ. މީގެ އިތުރުން، ޝަހީދު ކުޑަނެވި ތުއްތުމަނިކު ހިނގުމުގައި ހުންނަ ކިންޒާ ކެފޭ ކުރިމަތީގައި 6 މީހަކު ސައިކަލުގައި އައިސް ތޫނު ހަތިޔާރު ބޭނުންކޮށްގެން މާރާމާރީ ހިންގާފައިވެއެވެ. އަދި ހަމަ އެރޭ، ފިލިގަސްމަގު ނޫރު މިސްކިތް ކައިރީގައިވެސް ބަޔަކު މީހުން މާރާމާރީ ހިންގާފައިވާކަމަށް ފުލުހުންނަށް ރިޕޯޓުކޮށްފައިވެއެވެ.

މި ހާދިސާތަކުގެ އިތުރުން، 2024 ޑިސެމްބަރު 12 ވަނަ ދުވަހު ލެޓްސްގޯ ކެފޭއަށް ބަޔަކު ވަދެ ގެއްލުންދިން މައްސަލައެއްވެސް ފުލުހުންނަށް ހުށަހެޅިފައިވާކަމަށް ފުލުހުން މަޢުލޫމާތު ދެއެވެ.

ފުލުހުންގެ ފަރާތުން މި ހުރިހާ މައްސަލަތަކެއްގެ ތަޙްޤީޤު ކުރިއަށްދާކަމަށާއި، ތަޙްޤީޤު ކުރިއަށްދާ މިންވަރަކުން އިތުރު ތަފްޞީލު ހާމަކުރަމުން ގެންދާނެކަމަށް ބުނެފައިވެއެވެ. މި ހާދިސާތަކާ ގުޅިގެން އަދި އެއްވެސް މީހަކު ހައްޔަރުކުރިކަން އެނގިފައެއް ނުވެއެވެ.