މިއަހަރުގެ މިހާތަނަށް ދައުލަތަށް ޢާމްދަނީގެ ގޮތުގައި 31.9 ބިލިއަން ރުފިޔާ ލިބިފައިވޭ

މިއަހަރުގެ މިފާއިތުވި 11 މަސް ދުވަހުގެ ތެރޭފައި ދައުލަތަށް ޢާމްދަނީ އާއި ހިލޭ އެހީގެ ގޮތުގައި 31.9 ބިލިޔަން ރުފިޔާ ލިބިފައިވާ ކަމަށް މާލީ ވުޒާރާގެ ތަފާސްހިސާބު ތަކުން ދައްކައިފިއެވެ. 

މާލީ ވުޒާރާއިން ހާމަކޮށްފައިވާ ތަފާސްހިސާބު ތަކުން ދައްކާ ގޮތުގައި ޑިސެމްބަރ 5 ވަނަ ދުވަހުގެ ނިޔަލަށް ދައުލަތަށް ޢާމްދަނީއާއި ހިލޭ އެހީގެ ގޮތުގައި 31.9 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި ލިބިފައިވަނީ 31.1 ބިލިޔަން ރުފިޔާއެވެ.

މިއަހަރުގެ ފުރަތަމަ 11 މަސްދުވަހު ދައުލަތަށް ލިބުނު ޢާމްދަނީގެ އެންމެ ބޮޑު ބައެއް ހިއްސާކޮށްފައިވަނީ ޓެކްސްގެ ގޮތުގައި ލިބިފައިވާ ފައިސާއެވެ. މި މުއްދަތުގެ ތެރޭގައި ޓެކްސް އާމްދަނީގެ ގޮތުގައި ދައުލަތަށް 24.3 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި ޓެކްސްގެ ގޮތުގައި ލިބިފައިވަނީ 22.3 ބިލިޔަން ރުފިޔާއެވެ.

ޓެކްސް އާމްދަނީގެ ގޮތުގައި އެންމެ ބޮޑު އަދަދެއް ލިބިފައިވަނީ ގުޑްސް އެންޑް ސަރވިސް ޓެކްސް، ޖީއެސްޓީގެ ގޮތުގައެވެ. އެގޮތުން 13.2 ބިލިޔަން ރުފިޔާ ވަނީ ގުޑްސް އެންޑް ސަރވިސަސް ޖީއެސްޓީގެ ގޮތުގައި ވަނީ ލިބިފައެވެ.

ބިޒްނަސް އެންޑް ޕްރޮޕަޓީ ޓެކްސް، ބީޕީޓީގެ ގޮތުގައި 5.8 ބިލިޔަން ރުފިޔާ އަދި އެއަރޕޯޓް ސަރވިސް ޗާޖާއި ޑިޕާޗަރ ޓެކްސްގެ ގޮތުގައި 1 ބިލިޔަން ރުފިޔާ ވަނީ ލިބިފައެވެ.

މާލީ ވުޒާރާގެ ރިޕޯޓުގައި ވާގޮތުން ޓެކްސް ނޫން އާމްދަނީގެ ގޮތުގައި މިއަހަރުގެ މި މުއްދަތުގައި ލިބިފައިވަނީ 7 ބިލިޔަން ރުފިޔާއެވެ. އަދި ހިލޭ އެހީގެ ގޮތުގައި 691 މިލިއަން ރުފިޔާ ވަނީ ލިބިފައެވެ.

މި މުއްދަތުގެ ތެރޭގައި ދައުލަތުގެ ޚަރަދު ހުރީ 43 ބިލިޔަނުގައެވެ. އެއީ ރިކަރަންޓް ޚަރަދުތަކަށް ހޭދަކުރި 12.4 ބިލިޔަން ރުފިޔާއާއި ކެޕިޓަލް ޚަރަދުތަކަށް ހޭދަކުރި 12.9 ބިލިޔަން ރުފިޔާއެވެ.

މި މުއްދަތުގައި ދައުލަތުން އެންމެ ބޮޑު ޚަރަދެއް ކޮށްފައިވަނީ މުވައްޒަފުންނަށް މުސާރަ ދިނުމަށް ކަން ފާހަގަކޮށްލަން ޖެހެއެވެ. އެގޮތުން ދައުލަތުގެ މުވައްޒަފުންގެ މުސާރައަށް 5.6 ބިލިޔަން ރުފިޔާ ވަނީ ޚަރަދުކޮށްފައެވެ.

ދައުލަތުގެ ޢާމްދަނީއާއި ޚަރަދުތައް ހިމެނޭގޮތުން ކޮންމެ ހަފްތާއަކުވެސް މާލީ ވުޒާރާއިން އަންނަނީ "ވީކްލީ ފިޒްކަލް ޑިވެލޮޕްމަންޓް" ރިޕޯޓް އާންމުކުރަމުންނެވެ.