ޚަބަރު
ގެދޮރުވެރިކަމާ ބެހޭ ވުޒާރާގެ ޚިދުމަތް ހޯދުމަށް ދަރުބާރުގެއަށް ވަޑައިގަންނަވާ ބޭފުޅުން ބޭނުންކުރައްވާނީ އަމީނީމަގު ދޮރޯށި
ދަރުބާރުގޭގައި ތިން ވުޒާރާގެ މަސައްކަތްތައް ފެށުމަށް ތައްޔާރުވަމުން ދިޔައިރު.
ގެދޮރުވެރިކަމާ ބިމާއި ޢުމްރާނީ ތަރައްޤީއާ ބެހޭ ވުޒާރާގެ ޚިދުމަތްތައް ހޯއްދެވުމަށް ދަރުބާރުގެއަށް ވަޑައިގަންނަވާ ބޭފުޅުން ބޭނުންކުރައްވާނީ ދަރުބާރުގޭގެ އަމީނީމަގު ދޮރޯށި ކަމަށް އެވުޒާރާއިން ބުނެފިއެވެ.
ގެދޮރިވެރިކަމާ ބެހޭ ވުޒާރާއިން ނެރެފައިވާ ނޫސްބަޔާނެއްގައި ބުނެފައިވަނީ އެވުޒާރާ ހިންގަމުންދިޔަ އިމާރާތުގައި މިދިޔަ ބުރާސްފަތިދުވަހު ހިނގި އަލިފާނުގެ ހާދިސާއާއި ގުޅިގެން އެ ވުޒާރާގެ ޚިދުމަތްތައް މެދުކެނޑުމަށް ފަހު ދަރުބާރުގޭގައި އެވުޒާރާގެ ޚިދުމަތްތައް ވަގުތީ ގޮތުން ދޭން ފަށައިފައިވާ ކަމަށެވެ.
އެވުޒާރާގެ ޚިދުމަތްތައް ހޯދުމަށް ދަރުބާރުގެއަށް ވަޑައިގަންނަވާ ފަރާތްތަކުން ބޭނުން ކުރާނީ ދަރުބާރުގޭގެ އަމީނީމަގުގެ ދޮރޯށި ކަމަށް ގެދޮރުވެރިކަމާ ބެހޭ ވުޒާރާއިން ޚާއްސަކޮށް ފާހަގަކޮށްފައިވެއެވެ.
އަދި އެވުޒާރާގެ މަސައްކަތްތައް ވީހާވެސް އަވަހަކަށް އަލުން ފެށުމަށް އެހީތެރިވި ހުރިހާ އިދާރާތަކަކަށް އެވުޒާރާއިން ވަނީ ޝުކުރުއަދާކޮށްފައެވެ.
