އަންނަ އަހަރަކީ ވަރަށް ގިނަ މައްސަލަތަކަށް ޙައްލު ހޯދުމުގެ މަސައްކަތް ފެށޭނެ އަހަރު: ރައީސް މުޢިއްޒު

އަންނަ އަހަރަކީ ވަރަށް ގިނަ މައްސަލަތަކަށް ޙައްލު ހޯދުމުގެ މަސައްކަތް ފެށޭނެ އަހަރުކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވީ އދ.އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅުގެ އޮމަދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ.

އެމަނިކުފާނުގެ ވާހަކަފުޅުގައި ވިދާޅުވީ އަންނަ އަހަރަކީ ވަރަށް ގިނަ މައްސަލަތަކަށް ހައްލު ހޯދުމުގެ މަސައްކަތް ފެށޭނެ އަހަރުކަމަށާއި، ރަށްރަށް ވެވަޑައިގެންނެވި ވަޢުދުތައް ފުއްދުމުގެ އަމަލީ މަސައްކަތް ފެންނާނެކަމަށެވެ.

މީގެއިތުރުން އެތައް އަހަރެއްވެ އެއްކޮށް ވީރާނާވެފައިވާ އދ. އޮމަދޫގެ ބަނދަރުގެ މައްސަލަ ޙައްލުކޮށްދެއްވުމަށް ސަރުކާރުން އެންމެ އިސްކަންދޭ މަޝްރޫޢުތަކުގައި ހިމަނައިގެން އަންނަ އަހަރުގެ ކުރީކޮޅު ތަރައްޤީކޮށްދެއްވާނެކަމަށް ރައީސް ޑރ މުޢިއްޒު ވަނީ ވިދާޅުވެފައެވެ. އޮމަދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ދެއްވި ޔަޤީންކަމަކީ، އެރަށުގެ ތަރައްޤީއަށް ރައްޔިތުން އެދޭގޮތަށް، އެ ރައްޔިތުންގެ އަޑުއަހައިގެން ކަންކަން ކޮށްދެއްވާނެކަމެވެ.

 މިގޮތުން އެންމެ މުހިންމު ކަމަކީ ބަނދަރު މައްސަލަ ހައްލުކުރުންކަން ކަމަށާއި، އެކަމަށް ރަނގަޅު ހައްލެއް ގެނެސްދެއްވާނެކަަމަށް ރައީސް މުޢިއްޒު ވަނީ ވިދާޅުވެފައެވެ. ހިނގަމުންދާ އަހަރުގެ ބަޖެޓުގެ ތެރެއިން ކަންކަންކުރަން ދަތިތަކެއް ހުރިނަމަވެސް ފެށޭ އަހަރުގެ ބަޖެޓުން ވަރަށް ގިނަ މައްސަލަތަކަށް ހައްލު ގެނެވޭނެކަމަށާއި، އެގޮތުން ހުރިހާ މައްސަލައެއް ހައްލުވާނެ ފުރިހަމަ ބަނދަރެއް ތަރައްޤީކޮށްދެއްވާނެކަމަށް އެމަނިކުފާނު ވިދާޅުވިއެވެ.

 އަދި ބަނދަރުގެ މަޝްރޫޢުއާއެކު އޮމަދޫގެ ރަށްގިރުގެ މައްސަލަވެސް އަންނަ އަހަރުގެ ކުރީކޮޅު އެންމެ އިސްކަމެއްދީގެން މަސައްކަތް ކޮށްދެއްވާނެކަމަށްވެސް ރައީސް ޑރ މުޢިއްޒު ވިދާޅުވިއެވެ.

އަންނަ އަހަރު އޮމަދޫގައި ކުޅިވަރުގެ ވަސީލަތްތައްވެސް ތަރައްޤީކޮށްދެއްވާނެކަމަށާއި، އެގޮތުންއަންހެންގެ ހޭންޑްބޯލް ކޯޓަކާއެކު ކުޅިވަރުގެ އިތުރު ވަސީލަތްތައްވެސް ޤާއިމްކޮށްދެއްވާނެކަމަށް ރައީސް މުޢިއްޒު ވިދާޅުވިއެވެ. މީގެ އިތުރުން ކުނި މެނޭޖުކުރުމަށް މުޅިރާއްޖޭގައި ވަށާޖެހޭ ހައްލެއް ގެނައުމަށް ކުރާ މަސައްކަތުގެ ދަށުން އޮމަދޫގެ ކުނި މެނޭޖުކުރާ މަރުކަޒަށް ވަސީލަތް ހޯދައިދޭނެކަމަށްވެސް އެމަނިކުފާނު ވިދާޅުވިއެވެ.