އުޅަނދު ފަހަރުގެ އަހަރީ ފީ އާއި ޖޫރިމަނާ ބަހާލައިގެން ދެއްކޭނެހެން ޤަވާއިދު ހަދައިފި

އެއްގަމާއި ކަނޑުގައި ދުއްވާ އުޅަނދު ތަކުގެ އަހަރީފީ އާއި ޖޫރިމަނާ ބަހާލައިގެން ދެއްކޭނެހެން، ދަތުރުފަތުރާއި މަދަނީ އުދުހުން ތަކާ ބެހޭ ވުޒާރާއިން ޤަވާއިދެއް ހަދައިފިއެވެ.

ދަތުރުފަތުރާ ބެހޭ ވުޒާރާއިން އެކުލަވައިލި މި ޤަވާއިދު މިހާރު ވަނީ ގެޒެޓްކޮށްފައެވެ. 

މިއަދު ގެޒެޓް ކުރެވުނު މި ޤަވާއިދުގެ މަޤްސަދަކީ، އެއްގަމުގައި ދުއްވާ އުޅަނދުތަކުންނާއި ކަނޑު ދަތުރުފަތުރުކުރާ އުޅަނދުފަހަރުން ކޮންމެ އަހަރަކު އެއްފަހަރު ދައްކަންޖެހޭ އަހަރީފީއާއި އަހަރީފީ ނުދެއްކުމުގެ ސަަބަބުން އަރައިފައިވާ ޖޫރިމަނާގެ ފައިސާއާއި، އަދި އެނޫންވެސް ޖޫރިމަނާގެ ތެރެއިން ދައުލަތަށް ދައްކަން ޖެހި ނުދެއްކި ހުރި ފައިސާ އެކީ އެއްފަހަރާ ދައްކަން ދަތިވާ ފަރާތްތަކަށް ލުއިފަސޭހަ ގޮތެއް ހަދައިދީ އެ ފައިސާ ދައުލަތަށް ދެއްކޭނެ މަގު ފަހިކޮށްދިނުމެވެ.

އެގޮތުން ބަހައިލައިގެން އިންސްޓޯލްމަންޓަށް ފައިސާ ދައްކަން ޖެހޭ މީހުންގެ ޝަރުތުތަކެއް ކަނޑަޅާފައި ވެއެވެ. 

ކަނޑައަޅައިފައިވާ ޝަރުތު ތަކުގެ ތެރޭގައި ހިމެނެނީ:-

• ދައްކަންޖެހި ނުދައްކާހުރި ފައިސާގެ އަދަދު 10،000 ރުފިޔާއަށްވުރެ އިތުރުވެފައިވާ ފަރާތްތައް.
• އެ ފައިސާއަކީ ފައިސާ ދެއްކުމުގެ ސުންގަޑި ފާއިތުވެފައިވުން.
•  މި ޤަވާއިދުގެ ދަށުން ފައިސާ ބަހާލައިގެން ދެއްކުމަށް ހުށަހަޅާ ފަރާރްތަކަށާއި، މީގެ ކުރިން ބަހާލައިގެން ފައިސާ ދެއްކުމުގެ ފުރުސަތު މީގެ ކުރިން ދީފައިވާ ފަރާތަކަށް ނުވުން.
•  މިގޮތަށް އެދޭ ފަރާތަކީ އުޅަނދުގެ ވެރިފަރާތް ކަމުގައި ވުން.

ބަހާލައިގެން ފައިސާ ދެއްކުމަށް އެދި ހުށަހަޅާނީ، އެކަމަށް ކަނޑައަޅައިފައިވާ ފޯމް އެ ވުޒާރާއަށް ހުށަހަޅައިގެންނެވެ.

އަދި ބަހާލައިގެން އިންސްޓޯލްމަންޓަށް ދެއްކުމުގެ ފުރުސަތު ދެވޭނީ، ކޮމިޓްމަންޓް ފީ ދެއްކުމުން ކަމަށް މިއަދު ގެޒެޓް ކުރި އެ ޤަވާއިދުގައި ވެއެވެ. 

އަދި ކޮމިޓްމަންޓް ފީ ދެއްކުމަށް ގިނަވެގެން ދެވޭނީ 14 ދުވަސް ކަމަށް ބުނެފައިވާއިރު، އެ މުއްދަތުގެ ތެރޭގައި ކޮމިޓްމަންޓް ފީ ދައްކައިފައި ނުވާ ނަމަ، އިތުރު އެންގުމަކާ ނުލައި، ހުށަހަޅާ ފަރާތުގެ ފޯމު ބާތިލުކުރެވޭނެ ކަމަށްވެސް ޤަވާއިދުގައި ބުނެފައި ވެއެވެ.