ޚަބަރު
އޮމަދޫއިންް ސަރުކާރަށް ފުރިހަމަ އެއްބާރުލުން ދޭނެ: އޮމަދޫ ކައުންސިލް
އޮމަދޫ ކައުންސިލާއި ރައީސް މުޢިއްޒު ބައްދަލުކުރެއްވުން
އދ.އޮމަދޫއިން ސަރުކާރަށް ފުރިހަމަ އެއްބާރުލުން ދޭނެ ކަމަށް އެރަށު ކައުންސިލުން ބުނެފިއެވެ.
އޮމަދޫ ކައުންސިލުން މިހެން ބުނެފައިވަނީ މިއަދު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އޮމަދޫ އަށް ވަޑައިގެން އެރަށު ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި އެކު ބޭއްވި ބައްދަލުވުމުގައެވެ.
މިބައްދަލުވުމުގައި އޮމަދޫ ރައްޔިތުންގެ ކަންބޮޑުވުންތަކަށް ހައްލު ހޯދުމަށް މަސައްކަތްކުރައްވާނެކަމުގެ ޔަޤީންކަން ރައީސް މުޢިއްޒު ވަަނީ ދެއްވައިފައެވެ.
ރަށު ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ރަށުގެ މުވައްސަސާތަކުގެ ބޭފުޅުން ބައިވެރިވެވަޑައިގެންނެވި މިބައްދަލުވުމުގައި ބަނދަރުގެ މައްސަލައަކީ އޮމަދޫގެ ހުރިހާ ރައްޔިތުންނަށް ކުރިމަތިވެފައިވާ އެންމެ ބޮޑު ގޮންޖެހުންކަމުގައި ކައުންސިލުން ފާހަގަކުރެއްވިއެވެ.
އަދި ހެލްތު ސެންޓަރ ތަރައްޤީކުރުމަށް ބޭނުންވާކަމަށާއި ބިމުގެ ޖާގައިގެ ދަތިކަން ކައުންސިލުން ފާހަގަކުރެއްވިއެވެ. މީގެ އިތުރުން ކައުންސިލުން ވަނީ ސުކޫލުގެ ކަންކަން ރަނގަޅުކުރަން ބޭނުންވާކަންކަންވެސް ޙިއްޞާކުރައްވާފައެވެ. މި ބައްދަލުކުރެއްވުމުގައި އޮމަދޫގެ ފަރާތުން ސަރުކާރަށް ފުރިހަމަ އެއްބާރުލުން ދެއްވާނެކަންވެސް އެރަށު ކައުންސިލުން ވަނީ ފާހަގަކޮށްފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ މުޢިއްޒުގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ އޮމަދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.
މިއަދުގެ ބައްދަލުކުރެއްވުމުގައި ރައީސް މުޢިއްޒު ވިދާޅުވީ ސުކޫލުގެ ކަންކަން ހައްލުކުރުމަށް މަސައްކަތްކުރައްވާނެކަމަށެވެ. އަދި ބަނދަރު މަޝްރޫޢާއެކު ރަށްގިރުމުގެ މައްސަލައަށްވެސް ހައްލު ހޯދުމުގެ މަސައްކަތް ކުރިއަށްގެންދަވާނެކަމުގައި އެމަނިކުފާނު ވިދާޅުވިއެވެ.
އަދި ދެންވެސް ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ރައީސް މުޢިއްޒު ވަނީ ވިދާޅުވެފައެވެ.
މިބައްދަލުވުން އޮތީ އޮމަދޫ ކައުންސިލްގެ އިދާރާގައެވެ.
