މިދިޔަ މަހު އަރިދަފުސް ރޯގާގެ 40،000އަށް ވުރެ ގިނަ ކޭސް ރިޕޯޓު ކުރެވިފައިވޭ

މިދިޔަ މަހު އަރިދަފުސް ރޯގާގެ 40،000އަށް ވުރެ ގިނަ ކޭސް ރިޕޯޓު ކުރެވިފައިވާ ކަމަށް ހެލްތް ޕްރޮޓެކްޝަން އޮތޯރިޓީ އިން ބުނެފިއެވެ. 

އެޗްޕީއޭގެ ތަފާސްހިސާބުތައް ދައްކާގޮތުގައި މިދިޔަ ނޮވެމްބަރު މަހު އަރިދަފުސް ރޯގާ ޖެހިގެން 40،504 މީހަކު ވަނީ ރިޕޯޓްކޮށްފައެވެ. މިއީ އޮކްޓޫބަރު މަހާ އަޅާބަލާއިރު ބޮޑު ތަނުން އިތުރު ޢަދަދެއްކަން ފާހަގަކޮށްލަންޖެހެއެވެ. އޮކްޓޫބަރު މަހު ރިޕޯޓްކޮށްފައިވަނީ 29،515 ކޭސްއެވެ.

 މިއީ މިދިޔަ އަހަރުގެ މިމުއްދަތުގައި އަރިދަފުސް ރޯގާ ޖެހިގެން ރިޕޯޓުކުރި އަދަދާ އަޅާބަލާއިރުވެސް އިތުރު ޢަދަދެކެވެ. މިިދޔަ އަހަރުގެ ނޮވެންބަރު މަހު އަރިދަފުސް ރޯގާ ޖެހިގެން ރިޕޯޓްކޮށްފައިވަނީ 37،028 މީހެކެވެ.

އެޗްޕީއޭއިން ބުނެފައިވަނީ އޮކްޓޫބަރު މަހާ އަޅާބަލާއިރު، އިންފުލުއެންޒާގެ އަލާމާތްތައް ހުރެގެން ޓެސްޓް ކުރި މީހުންގެ ޢަދަދުވެސް ނޮވެމްބަރުމަހު ގިނަކަމަށެވެ. މިއަހަރުގެ މިހާތަނަށް 2،375 މީހުން އިންފުލުއެންޒާއަށް ޓެސްޓް ކުރިއިރު އޭގެ ތެރެއިން 476 ސާމްޕަލް ޕޮޒިޓިވްކަން ތަފާސްހިސާބުތަކުން ދައްކައެވެ. މީގެ ތެރެއިން ނޮވެންބަރު މަހު 164 ސާމްޕަލް ޓެސްޓުކުރިއިރު 42 މީހަކު އިންފުލުއެންޒާއަށް ޕޮޒިޓިވްވެފައިވެއެވެ.

ޑެންގީ ހުމުގެ ތަފާސްހިސާބަށް ބަލާއިރު އޮކްޓޫބަރު މަހު 126 ކޭސް ރިޕޯޓުކޮށްފައިވާއިރު ނޮވެންބަރު މަހުގެ ރިޕޯޓްކޮށްފައިވަނީ 140 ކޭސްއެވެ. ބޭރަށް ހިންގާ ރޯގާއެއް ވެސް މިދުވަސްވަރު ފެތުރެމުންދާއިރު ބޭރަށް ހިންގުން ޖެހިގެން މިދިޔަ އޮކްޓޫބަރު މަހު 3،164 ކޭސް އަދި ނޮވެމްބަރު މަހު 3،635 ކޭސް ރިޕޯޓުކޮށްފައިވެއެވެ.

އެޗްޕީއޭއިން ރާއްޖޭގައި ރޯގާގެގޮތުގައި ފެތުރެމުންދާ ބަލިތަކުގެ ތަފާސްހިސާބުތައް ކޮންމެ މަހަކުވެސް ޚިއްސާކުރެއެވެ.